მალე საკუთარ ბაზაზე! - "ბათუმის" ბაზის მშენებლობა წინმსწრები გრაფიკით მიმდინარეობს

ბათუმის "დინამოს" ბაზის მშენებლობა წინმსწრები გრაფიკით მიმდინარეობს. ეს სიახლე აჭარის საზოგადოებრივი მაუწყებლის ეთერში გაჟღერდა.

ამჟამად მიმდინარეობს სარწყავი სისტემის მონტაჟი. მაუწყებლის ცნობით, მშენებელი კომპანია "მონოლითი 2005" სამუშაოებს დაჩქარებულად ასრულებს...

ანგისას ბაზაზე ბათუმის "დინამო" არა მხოლოდ ივარჯშებს, არამედ ითამაშებს კიდეც და ტრიბუნების ჩონჩხის მშენებლობა უკვე დასრულებულია. სტადიონმა 1575 მაყურებელი უნდა დაიტიოს.

აქვე ვიტყვით იმაზეც, რამაც გაურკველობა გამოიწვია. ანგისაში პირველად ხელოვნურის დაგება დაიწყეს, რომელიც მე-4 თაობისაა. ამის გამო გულშემატკივარი უკმაყოფილო იყო და ჩათვალა, რომ მხოლოდ ხალიჩა დაიგებოდა.

რეალურად, ბათუმელთა ბაზაზე 2 სტანდარტული მოედანი მოეწყობა, ხელოვნური და ბუნებრივი საფარით. მაგრამ "დინამომ" ანგისაში ვარჯიშთან ერთად, უნდა ითამაშოს კიდეც, ასეთ დატვირთვას კი მხოლოდ ხელოვნური გაუძლებს და ის უკვე დააგეს. ბუნებრივი მინდორის დაგება კი მშენებლობის ბოლოს დაიწყება.

ამავე დროს, უკვე აშენებულია სამსართულიანი შენობა, სადაც განთავსდება, ბათუმის "დინამოს" ადმინისტრაცია, საშხაპეები, გასახდელები, მსაჯთა და დელეგატთა ოთახები, სავარჯიშო დარბაზები, სამედიცინო მომსახურების ცენტრი, ასევე სასტუმრო ოთახები და კომერციული ფართები.

დაპირების მიხედვით, ბათუმის "დინამოს" ბაზის კეთილმოწყობა 25 დეკემბრისთვის უნდა დასრულდეს.

"ერთ კვირაში ხელოვნურსაფრიანი მოედანი სრულად მზად იქნება - კარებიც დამონტაჟდება და დაიხაზება. რაც შეეხება ბუნებრივსაფრიან მოედანს, მის დაგებას დაახლოებით თვე-ნახევარი დასჭირდება და სექტემბრის ბოლოსთვის მზად უნდა გვქონდეს.

სამუშაოები დეკემბრისთვის უნდა დაგვესრულებინა, მაგრამ ისეთი გრაფიკით მივდივართ, დიდი იმედი მაქვს, რომ ბაზას ორი თვით ადრე ჩავაბარებთ", - ამბობს მშენებელი კომპანია "მონოლითი 2005-ის" წარმომადგენელი ზაურ გათენაძე.

ჯემალ დევაძე, ბათუმის მერიის კეთილმოწყობის სამსახურის უფროსი სპეციალისტი: "ამ ეტაპზე დასრულებულია მიწისქვეშა კომუნიკაციების მონტაჟი, რაც მოიცავს სანიაღვრე, სარწყავი და სადრენაჟე სისტემებს. ხელოვნური საფარის გარდა, დამონტაჟდა 6 ცალი 30-მეტრიანი გალვანიზებული განათების ანძა, ამჟამად კი შენობაში მიმდინარეობს ოთახების გატიხვრა, ცივი და ცხელი წლებისა და ელექტროსისტემების მონტაჟი".

აქვე ვიტყვით, რომ აჭარის მთავრობის ხელმძღვანელმა ზურაბ პატარიძემ ბათუმის სტადიონის წლობით გაჯანჯლებული მშენებლობის თაობაზე გააკეთა კომენტარი და ახალი დეტალები გაამხილა. მისი თქმით, მშენებლობაზე ახალი ტენდერი ზაფხულში გამოცხადდება.

აჭარის მთავრობის ხელმძღვანელმა ზურაბ პატარიძემ საკითხთან დაკავშირებით ახალი დეტალების შესახებ ისაუბრა და განაცხადა, რომ სტადიონის პროექტი, ქალაქის ხელმძღვანელობას უახლოეს მომავალში ჩაბარდება.

"სამხარაულის ეროვნული ბიუროს წარმომადგენლებს ველაპარაკე ახლახან. ბოლო ინფორმაციით, ფაქტობრივად, კონსტრუქციულ ნაწილზე ბოლო რევიზია დასრულებულია. 99 პროცენტით დამპირდნენ, რომ ბათუმის საფეხბურთო სტადიონის პროექტს სატენდეროდ ამ თვის ბოლოს ჩაგვაბარებენ. ეს იმას ნიშნავს, რომ მშენებლობაზე ტენდერს ზაფხულში გამოვაცხადებთ", - ეს პატარაძემ აჭარის საზოგადოებრივ მაუწყებელთან განაცხადა.

ზოგადი გეგმით, ბათუმის სტადიონმა 20 ათასი მაყურებელი უნდა დაიტიოს. შეგახსენებთ, რომ ბათუმელი გულშემატკივარი "დინამოს" სტადიონის აშენებას 2006 წლიდან ელის, როდესაც ის ტურისტული მიზნებით დაანგრიეს და ბულვარის ტერიტორია გაზარდეს. მას შემდეგ ბათუმში კიდევ ორი სტადიონი გასხვისდა - ეგრეთ წოდებული "ბეენზე" და "ადელი".

ასე რომ, ქალაქი, სადაც ერთ-ერთი უძველესი ქართული კლუბია დაფუძნებული, სტადიონის გარეშეა დარჩენილი. მას შემდეგ მშენებლობის პირობა ყოველ წელს გაიცემოდა და არაერთი ტენდერიც ჩატარდა, თუმცა დღემდე ბათუმში სტანდარტული, თანამედროვე სტადიონი არ ჩანს.

ლოგიკურია, რომ ეროვნული ლიგის გუნდებში ქვეყნის შიგნით მივლინებებში დახარჯული თანხით ორი უსტადიონო გუნდი რომ ლიდერობს - ფოთის "კოლხეთი 1913" (რომელმაც 49,402 ლარი დახარჯა) და ბათუმის "დინამო", რომელმაც ქვეყნის შიგნით ამ მიზნით 33,970 ლარი მოიხმარა.

არადა, ეს ხარჯები საშინაო არენის შემთხვევაში ორივეს შეუმცირდება და საქართველოში ხანმოკლე შეკრებას სავსებით ეყოფა.

მეორე მხარეც არის, რაც საქართველოში დასრულებული 19-წლამდელ ფეხბურთელთა ევროპის ჩემპიონატის შემდეგ სპორტისა და ახალგაზრდობის საქმეთა მინისტრმა ტარიელ ხეჩიკაშვილმა გაამხილა. მისი თქმით, ტურნირის ორგანიზებაზე ქვეყანამ 10 მილიონ ლარამდე დახარჯა, ხოლო მოგებამ 33 მილიონი ლარი შეადგინა.

19-წლამდელთა ევროპის ჩემპიონატის შედეგებმა უდავოდ გვაჩვენა, რომ ქვეყანაში სპორტული ტურიზმის განვითარება მნიშვნელოვანია და ეს ქვეყნის ბიუჯეტში დამატებითი შემოსავლის წყარო შეიძლება გახდეს.

ამ კუთხით კი ბათუმი ყველაზე მიმზიდველი ქართული ქალაქია, სადაც ახლო გუნდები სამეზობლოდან სიამოვნებით ჩამოვლენ. ბევრს სურვილიც ჰქონდა, მაგრამ ბათუმში სტადიონის არქონის გამო ვერ ჩამოდიოდნენ, ამით კი აჭარა და ქვეყანა საკმაოდ სოლიდურ შემოსავლებს კარგავდა.

(იბეჭდება მცირე ცვლილებით)
ყოველდღიური სპორტული გაზეთი "ლელო"