ერთმა ქართველმა მწვრთნელმა მათხოვა რინუს მიხელსის წიგნი "გუნდის შენება". ეს სახელმძღვანელო პირველ რიგში მწვრთნელისთვისაა განკუთვნილი და არ წარმოადგენს ავტობიოგრაფიას. მწვრთნელობა ჩემი პროფესია არ არის და ბევრ რამეს ვინძლო ვერც ჩავუღრმავდი ამ წიგნში, თუმცა იმაში კიდევ ერთხელ დავრწმუნდი, რომ ფეხბურთიცა და საფეხბურთო გუნდის მწვრთნელობაც გვარიანად რთული საქმეა.
მიხელსის წიგნი ქართულად არ არის ნათარგმნი და მასზე ხელი ალბათ ბევრ ჩვენებურ მწვრთნელს არ მიუწვდება, თუმცა მხოლოდ წიგნების კითხვაც ვერ არის საკმარისი. მწვრთნელი მოწოდებით უნდა იყო და ვფიქრობ, "დინამო თბილისის" დამრიგებელიც მასეთია.
გიორგი დევდარიანის
"დინამოში" რომ ყველაფერი რიგზე არ არის, მხოლოდ დევდარიანის და მისი წინამორბედის ბრალი არ უნდა იყოს. სტატისტიკაზე კი, გინდა არ გინდა, პირველ რიგში მწვრთნელია პასუხისმგებელი.
დავუშვათ, "დინამოში" კიდევ ერთხელ შეიცვალა მწვრთნელი - როგორ ფიქრობთ, ამით საქმეს ეშველება?
მწვრთნელის შეცვლა სეზონის ბოლოს - როცა კლუბის ხელმძღვანელობა ამაზე დაფიქრდება, ეს იმას უნდა ნიშნავდეს, რომ უკვე დაშვებული აქვს მძიმე შეცდომები. ასეთი იაღლიშები კი უცბად ვერ გამოსწორდება.
ჰოდა, მეც მგონია, რომ მიხელსის წიგნი მხოლოდ მწვრთნელებმა არ უნდა წაიკითხონ, წიგნი იმ ხალხმაც უნდა გადაშალოს, ფეხბურთში შემთხვევის და მომენტის წყალობით რომ მოგვევლინებიან და ჰგონიათ, ადვილად გაუძღვებიან საქმეს.
"დინამოს" უწინდელი მმართველი დირექტორი ზურაბ პოლოლიკაშვილი გახლდათ, დიპლომატი, ნასწავლი და განათლებული კაცი. მაშინ ყველამ არ იცოდა, თუ რა იყო ჩადებული პოლოლიკაშვილის ასეთნაირად დაწინაურებაში, კულუარებში მერეღა გაჩნდა ინფორმაცია იმაზე, რომ პოლოლიკაშვილს ფეხბურთის ფედერაციის პრეზიდენტად ამზადებდნენ და "დინამო" მისთვის აუცილებელი ეტაპი იყო.
რა გაეწყობა, საქართველო დღეს ასეთი ქვეყანაა, ყველაფერი, რაც მაღალ დონეზე კეთდება, რაღაცას უნდა დაუკავშირონ, მიხელსი და მისი წიგნი კი არავის არ სჭირდება, რეფორმატორებმა ყველაფერი ისედაც კარგად იციან და ეს "დინამოც" ამ ყველაფრის პროდუქტია.
* * *
საქართველოს ჩემპიონატში დაიწყო მწვრთნელობა გია გურულმა. ის მუყაითი კაცი ჩანს. საფრანგეთში სამწვრთნელო საქმეს რომ ვსწავლობდი., დილის შვიდ საათზე მეწყებოდა დღის გრაფიკიო - ასე თქვა ერთ-ერთ ძველ ინტერვიუში და ისიც დააყოლა, სიყრმიდან მიყვარდა სირთულეებთან ბრძოლაო.
გურულმა სეზონის ბოლოს ჩაიბარა "ბათუმი" და ბევრის გამოსწორებას ვერ შეძლებს. მას ევროპაში უთამაშია ფეხბურთი, საქართველოს ნაკრებში ალენ ჟირესის თანაშემწე იყო - გემოვნების ჩამოსაყალიბებლად საკმაოდ კარგი ბიოგრაფია აქვს.
გურულის აქტივშია ისეთი კონტაქტებიც, საქართველოში კარგი აფრიკელი ფეხბურთელების ჩამოყვანა რომ შეუძლია. გურული ქართულ ფეხბურთში "ბათუმის" მწვრთნელობამდეც იყო ფიგურა - ზურგს ავტორიტეტი და რეპუტაციაც უმაგრებს.
ახლა ჯერი იმაზეა, რა საშუალებები ექნება გურულის დამსაქმებელ კლუბს. ბათუმში ფეხბურთის აღორძინება, რა ხანია, აქტუალურია, თუმცა ჯერ ჭაჭის შადრევანის ჯერია, მერე კი ვნახოთ....
* * *
6 აპრილს სანდრო იაშვილის თამაშმა მნიშვნელოვნად განაპირობა "ჩიხურას" გამარჯვება. რაღაცნაირი, თითქოს სევდიანი ამბავია, რადგან იაშვილი ნიჭიერია და გაცილებით დიდ სარბიელზე უნდა შემოეტრიალებინა თამაშები.
ასეთი ფეხბურთელი მართლაც ძვირი სანახავია, კარგი ცენტრფორვარდი "დინამოსაც" უჭირს. იაშვილი მალე ალბათ გოლების გატანასაც დაიწყებს და ჩვენს ჩემპიონატსაც უფრო გააფერადებს.
სევდა კი დარჩა და ესეც ფეხბურთის ნაწილია. მხოლოდ იაშვილს შეუძლია ასე მაღლა აიწიოს ჰაერში და ბურთი თავით თუ მკერდით მოათვინიეროს, მას სხვა კარგი ფორვარდული თვისებებიც აქვს და ის ისევ მოედანზეა, მისი გამოჩენით ალბათ ქომაგიც მოიმატებს "ჩიხურას" თამაშებზე...
ყოველდღიური სპორტული გაზეთი "ლელო"
რაც მთავარია არ არის მიკერძოებული და ჩანს რომ ჟურნალისტი იმას წერს რასაც ფიქრობს.
დევდარიანი კარგი კაცი და კარგი მწვთნელი მგონია.
გურულმა გვაჩვენოს რა შეუძლია.
სანდრო იაშვილი მიმაჩნია რომ ძალიან კარგი ფეხბურთელი იყო, თუმცა საკმრაისად ჭკვიანი ვერ გამოდგა.
რაც შეეხება პოლიკას: კარგი ბიჭია მაგრამ დინამს პრეზიდენტობას ჭირდება საფეხბურთო ჭკუა, ფეხბურთის და დინამოს ფანატიკური სიყვარული.
ფიფიას კიდე სულ რა ძალით შეტენს დინამო აი ეგ არის პრობლმა ისევე როგორც სიჭინავას. სიჭი საერთოდ რა სპორტშია მგონი დარწმუნებული არაა.
გაუმარჯოს დინამოს საქართველოს ნაკრებს.
პ.ს. ჟურნალისტებო გააგრძელეთ ო ბ ი ე ქ ტ უ რ ა დ წერა