"ჯენტლმენური შეთანხმების დრო დგება" - ამ სათაურით რუბრიკაში "კვირის 1000 წვრილმანი" გასულ 20 ოქტომბერს "ლელოში" გამოქვეყნდა წერილი, რომელშიც საფეხბურთო კლუბ "დინამოს" აბურდულ ბედზე მოგითხრობდით (იხილეთ სტატია). პუბლიკაციისადმი მკითხველთა დაინტერესება მოსალოდნელი იყო და ასეც მოხდა. ყველას გასაგონად ვამბობთ, დიახ, "დინამოს" საქმეს გაგრძელება აუცილებლად მოჰყვება".
რას აპირებს მერაბ ჟორდანია, რომელიც თავის დროზე "დინამოს"კლუბის პრეზიდენტი იყო? ცხადია, მკითხველს ეს საკითხიც აინტერესებს. ბატონ მერაბთან დაკავშირება ოპერატიულად ვერ მოვახერხეთ. შემწეობა მის უახლოეს მეგობარს თბილისში ვალერი ჩოლარიას ვთხოვეთ, რომელმაც ჟორდანიას ჩამოსვლის ინფორმაცია თავად მოგვაწოდა.
- დანამდვილებით
როგორც ნებისმიერ პატრიოტს, მასაც სურს, თავისი წვლილი შეიტანოს იმ სერიოზული პრობლემების გადაჭრაში, რაც დაგროვდა ქართულ ფეხბურთში. თუ რა ფორმით, ამას მისგან შეიტყობთ თბილისში ჩამოსვლისას - გვითხრა ვალერი ჩოლარიამ.
- ხელისუფლებაში "ქართული ოცნების" მოსვლის შემდეგ გაჩნდა სამართლიანობის აღდგენის იმედი. ხომ არ უკავშირდება სწორედ ახლა და ამ დროს მერაბ ჟორდანიას თბილისში ჩამოსვლა საფეხბურთო კლუბ თბილისის "დინამოს" გარშემო ატეხილ აჟიოტაჟს?
- მესმის თქვენი. ბუნებრივია, მერაბ ჟორდანიას ექნება კითხვები როგორც სფფ-ის, ისე "დინამოსთან" დაკავშირებით. დეტალებზე მას ჰკითხეთ.
მე კი ვფიქრობ, რომ ის დაარღვევს შვიდწლიან დუმილს. ეს გამომდინარეობს თბილისში მისი ჩამოსვლის ძირითადი მიზნიდან. საბოლოო სიტყვა, რა თქმა უნდა, თავად მასზეა.
- თუ გავითვალისწინებთ საერთაშორისო ფეხბურთში მის მდიდარ გამოცდილებას, ალბათ, ჩვენი ქვეყნის სპორტის მესვეურებთან შეხვედრისას ახალ იდეებსაც გააჟღერებს, რაც მისაღები იქნება ქართული ფეხბურთისთვის...
- რა თქმა უნდა, მაგრამ მე მინდა ჯერ შეგახსენოთ, თუ რა გაკეთდა საქართველოს ფეხბურთის ფედერაციაში მისი პრეზიდენტობისას. მან ისე დაფარა მემკვიდრეობით მიღებული სფფ-ის ვალები, სახელმწიფოსგან არანაირი დახმარება არ მიუღია - ერთი თეთრიც კი.
ააშენა კლუბის ტექნიკური ცენტრი "ბასა", მოიზიდა ცნობილი სპონსორები - "ლოტო" და "პუმა".
ფედერაციასთან გახსნა მსაჯთა აკადემია და მწვრთნელთა მუდმივმოქმედი კურსები; საკუთარი ტრანსპორტი გაუჩნდა ეროვნულ ნაკრებს; ბათუმსა და მცხეთაში კი ფედერაციის რეგიონული ოფისების მშენებლობა დაიწყო.
იმდროინდელი ეროვნული ნაკრების გამოსვლები კი აღმაფრთოვანებელი თუ არ იყო, პატივისცემას მაინც იმსახურებს. ჩივაძისა და ყიფიანის ხელმძღვანელობით ორჯერ დაიკავა ნაკრებმა მსოფლიოს და ევროპის შესარჩევ ტურნირებში მესამე ადგილი და სულ ცოტა დააკლდა შემდეგ ეტაპზე გასასვლელად.
"დინამომ" კი მოიგო "თანამეგობრობის თასი" და ითამაშა უეფას თასის ჯგუფურ ტურნირში. 19-წლამდელები ევროპის ჩემპიონატის ფინალისტები გახდნენ. იმ პერიოდში პირველები საქართველოში ორი ჩვენი შესანიშნავი ვეტერანი, ალექსანდრე ჩივაძე და დავით ყიფიანი (სიკვდილის შემდეგ) ფიფამ და უეფამ ღირსეული ჯილდოთი დააფასა.
- აქვე გკითხავთ მერაბ ჟორდანიას საფეხბურთო კლუბ "ვიტესზე". რა არის ბოლო ახალი ამბები?
- ქართველმა გულშემატკივრებმა კარგად იციან, მერაბმა რა კლუბი შეიძინა და სადამდე დააწინაურა. ჰოლანდიის 2012-2013 წლების ჩემპიონატში "ვიტესი" უკვე ერთ-ერთ საპრიზო ადგილს და, ჩემი აზრით, ევროლიგაზე მეორედ მოხვედრას გეგმავს.
ესაუბრა თენგიზ გაჩეჩილაძე
ყოველდღიური სპორტული გაზეთი "ლელო"
