ხორვატიის ნაკრების მთავარი მწვრთნელი სლავენ ბილიჩი თურქეთის ეროვნულ გუნდთან და სახელოვან გუუს ჰიდინკთან ევროპის ჩემპიონატის საგზურისთვის დაპირისპირებამდე მაქსიმალურად ცდილობს საუკეთესო განწყობა შეიქმნას და სამწვრთნელო კარიერის უმთავრეს თამაშებს მობილიზებული შეხვდეს. ამ მიზნით 5 ნოემბერს ის საშობლოში ბოლო ხანს გაპოპულარულებულ ბიოენერგეტიკოს დენის ბუშელიჩს ესტუმრა. "ბიოენერგეტიკული სეანსის ჩატარება მხოლოდ გარკვეული მანძილიდან არის შესაძლებელი. ხანდახან ის ადამიანის ჯანმრთელობაზე უსაშველოდ ცუდ ზემოქმედებას ახდენს.
სლავენი ჩემთან სწორედ თავისი პრობლემების გამო მოვიდა, ალბათ იცით, რომ მას დიდი ხანია ბარძაყი და ზურგი აწუხებს", - განუცხადა ჟურნალისტებს ბუშელიჩმა. ეს
ეს ყოველივე ხორვატიის ნაკრებთან დაკავშირებით ლირიკულ გადახვევად მიიღეთ, ახლა კი უშუალოდ ფეხბურთს დავუბრუნდეთ.
შვეიცარიის ნაკრების მთავარმა მწვრთნელმა ოტმარ ჰიტცფელდმა ევროპის ჩემპიონატის პლეი ოფებამდე რამდენიმე დღით ადრე წყვილებს შორის ფავორიტებზე ისაუბრა. მან ხორვატებსა და თურქებს შორის გამარჯვება პირველებს უწინასწარმეტყველა. "ამ გუნდების დაპირისპირება უაღრესად საინტერესო იქნება. ხორვატებს ბევრად უფრო ნიჭიერი ფეხბურთელები ჰყავთ, რომლებიც საფეხბურთო კლასს ინგლისში, ესპანეთსა და გერმანიაში იმაღლებენ. თურქები უმთავრესად საშინაო შეხვედრებში არიან სახიფათონი, გასვლაზე კი შედარებით სუსტად გამოიყურებიან. აქედან გამომდინარე ვფიქრობ, რომ ევროპის ჩემპიონატის საგზურს ხორვატია მოიპოვებს," – განაცხადა ჰიტცფელდმა.
კიდევ ერთხელ შეგახსენებთ, რომ ხვალ პირველ შეხვედრას სტამბული უმასპინძლებს, 15-ში კი ეს გუნდები ერთმანეთს ზაგრებში დაუპირისპირდებიან.
ყოველდღიური სპორტული გაზეთი "ლელო"
