რეალი-ბარსელონა 2:2რეალი (4-2-3-1): კასილიასი - სერხიო რამოსი, პეპე, რიკარდო კარვალიო, მარსელო - ჩაბი ალონსო, ხედირა (57. კალეხონი) - დი მარია (53. ფაბიო კოენტრაო), იოზილი, რონალდო - ბენზემა (80. იგუაინი).
ბარსელონა (4-3-3): ვალდესი - დანი ალვეში, მასკერანო, აბიდალი, ადრიანო (60. პიკე) - ტ. ალკანტარა (57. ჩავი), კეიტა, ინიესტა - სანჩესი, მესი, ვილია (72. პედრო).
გოლები: 1:0 იოზილი (13), 1:1 ვილია (35), 1:2 მესი (45), 2:2 ჩაბი ალონსო (53)
გაფრთხილება: ჩაბი ალონსო, ხედირა, კოენტრაო - სანჩესი, ალვეში
კუთხური: 9-2; ჯარიმა: 26-13; თამაშგარე:
მაყურებელი: 80 354
მაშ ასე, ესპანეთის საფეხბურთო სეზონს სუპერდასაწყისი ჰქონდა - 14 აგვისტოს გადაჭედილ "სანტიაგო ბერნაბეუზე" ქვეყნის სუპერთასის პირველი მატჩი გაიმართა, რომელიც იმავდროულად სუპერკლასიკოც იყო - აპრილის ბატალიების შემდეგ ჟოზე მოურინიოს "რეალი" და ხოსეპ გვარდიოლას "ბარსელონა" კვლავ დაეჯახნენ ერთამენთს. რამხელა სიამოვნება ელით წინ ფეხბურთის ესპანელ (და სხვა) მოყვარულებს, როცა ამ ორ სუპერგუნდს სეზონის პირველივე ოფიციალურ მატჩში ასე თამაში შეუძლიათ!
მოურინიომ 4-2-3-1 სისტემა ირჩია და სასტარტოში ერთი ახალწვეულიც კი არ დააყენა - მან ისევ ის შემადგენლობა ათამაშა, რომელსაც ყველაზე მეტად ენდობოდა გასულ სეზონში, თუმცა თვისობრივად ეს მაინც ახალი "რეალი" იყო, რომელმაც "ბარსას" ბურთის წართმევა და შეტევა გაუბედა (და გამოუვიდა კიდევაც). პეპმა კი, ერთი შეხედვით, ექსპერიმენტებს მიმართა (ზოგი, აუცილებლობით იყო გამოწვეული), სისტემას (4-3-3) ბუნებრივია, ის არ შეხებია. დაცვის ცენტრში ერიკ აბიდალს ხავიერ მასკერანო შეუწყვილდა, ნახევარდაცვაში ტიაგო ალკანტარა გამოჩნდა, სასტარტოში იყო სეიდუ კეიტაც, შეტევაში კი ვიხილეთ "ბარსას" ჩილელი ახალწვეული ალექსის სანჩესი, რომელმაც ახალ გუნდში საომარი ნათლობა მიიღო.
თამაშის პერიპეტიებით თავს აღარ შეგაწყენთ, მხოლოდ გოლებს აღვწერთ. გოლი კი ამ თამაშში სულ 4 გავიდა. "რეალის" უპირატესობა მალე ისე შესამჩნევი გახდა, რომ ცხადი იყო, ვიქტორ ვალდესის კართან გოლი "მწიფდებოდა", შესაშურ ფორმაში მყოფმა ქარიმ ბენზემამ ყველაფერი გააკეთა იმისთვის, რომ მესუთ იოზილს მე-13 წუთზე ანგარიში გაეხსნა.
"ბარსას" პასუხმა დიდ ხანს არ დაახანა - 35-ე წუთზე დავიდ ვილიამ საჯარიმოს მარცხენა კუთხიდან ისეთი დაარტყა, რომ იკერ კასილიასი უფუნქციოდ დატოვა (თუმცა "რეალის" კაპიტანს უკეთ გარჯა ჰმართებდა), ტაიმის მიწურულს კი მანამდე ჩრდილში მყოფმა ლეო მესიმ სამი ხედირას შეცდომით ისარგებლა, აჯობა პეპეს (რომელმაც რაღაც მანქანებით ეს შეხვედრა ყვითელი ბარათის გარეშე ჩაამთავრა, არადა, ერთი-ორჯერ გაძევებასთანაც ახლოს იყო) და ტაიმი "ბარსას" მოაგებინა.
მეორე ტაიმში "რეალის" უპირატესობა აბსოლუტური გახდა, 53-ე წუთზე პეპემ მეტოქის საჯარიმოში იომა, უკან ჩაბი ალონსოს დაუგორა და ბასკმაც, 4 ბარსელონელს შორის "გააძვრინა" ბურთი - 2:2. არც ამის თამაშს ეთქმოდა ცუდი, თუმცა მეტი გოლი აღარ გასულა. საპასუხო თამაშის წინ, რომელიც ოთხშაბათს "კამპ ნოუზე" გაიმართება, "ბარსელონა", რა თქმა უნდა, ფავორიტია, მაგრამ მოურინიოს "რეალმა" ისე ითამაშა, რომ კიდევ ერთხელ განგვიმტკიცა რწმენა - ამ სეზონში "სამეფო კლუბი" დიდ საჩემპიონო ომს გაუმართავს კატალონიურ გრანდს, ამით კი ისევ ფეხბურთის მოყვარულები იხეირებენ. პირველი ტაიმის მიწურულს "რეალის" ბურთის ფლობის პროცენტი 66-ს მიუახლოვდა, ბოლოს როდის წააგო "ბარსამ" ბურთი, ვერც კი ვიხსენებთ (თუმცა მეორე ტაიმში სტუმრებმა ეს მაჩვენებელი გამოასწორეს).
ყოველდღიური სპორტული გაზეთი "ლელო"
