ჟოზემ მესამე დივიზიონის გუნდს ვერ მოუგო

"ნამდვილი, სუფთა ფეხბურთი" - ასე უწოდა გუშინ "მალიორკას" დანიელმა თავკაცმა მიქაელ ლაუდრუპმა ესპანეთის სამეფო თასის გათამაშებას. ეს შეჯიბრება 1902 წელს დაარსდა და მას მერე "სამეფო თასს" ყველაზე მეტჯერ "ბარსელონა" შეწვდა - 25-ჯერ. ბოლო ფინალში, რომელიც "კამპ ნოუზე" გაიმართა, "სევილიამ" 2:0 დაამარცხა "ატლეტიკო". ესპანეთის თასის 107-ე გათამაშება 21 აგვისტოს დაიწყო და 20 აპრილს ფინალური მატჩით დასრულდება.

"სამეფო თასის" სამი ეტაპი უკვე გავლილია, 1/16-ფინალებიდან კი გათამაშებაში პრიმერა დივიზიონის კლუბები ჩაერთნენ, მათ შორის "ბარსელონა" და "რეალი". ჟოზე მოურინიოს გუნდი მურსიას ეწვია და "ესტადიო ნუევა კონდომინაზე" ვერ შეძლო სეგუნდა დივიზიონიდან გავარდნილი "მურსიას" დამარცხება - 0:0. მასპინძლებმა მეტოქეს ბურთი დაუთმეს ("რეალი" I ტაიმში 86%-ით აკონტროლებდა ბურთს) და მხოლოდ კარის უსაფრთხოებაზე ფიქრობდნენ. კრიშტიანო რონალდომ, სერხიო კანალესმა და პედრო ლეონმა შორი დისტანციიდან სცადეს "მურსიას" კარის დალაშქვრა, მაგრამ ამაოდ. ყველაზე უკეთ ესტებან გრანერომ დაარტყა, თუმცა მასპინძელთა კარი ხარიხამ იხსნა. პირველი ტაიმის დასრულებამდე 5 წუთით ადრე ქარიმ ბენზემამ გაიტანა, მაგრამ ოფსაიდიდან. შანსი ვერც რაულ ალბიოლმა გამოიყენა.

II ნახევარიც ანალოგიური სცენარით წარიმართა, ბურთი უმთავრესად "მურსიას" საჯარიმოსთან ტრიალებდა, მაგრამ გოლი არაფრით გადიოდა. მატჩის საუკეთესო მომენტი 70-ე წუთზე შეექმნა "რეალს", როცა "მურსიას" ვენესუელელმა გოლკიპერმა დანი ერნანდესმა სასწაულებრივ მოიგერია რონალდოს საჯარიმო დარტყმა და პედრო ლეონის დამატებულსაც გაუმკლავდა. ორ კვირაში "რეალი" "სანტიაგო ბერნაბეუზე" შეეცდება "კერკეტი კაკლის" გატეხვას.

ჟოზე მოურინიო: "გუნდის თამაშით კმაყოფილი ვარ. ბიჭებმა იბრძოლეს და გამარჯვებას იმსახურებდნენ, მაგრამ "მურსიას" კარს ფანტასტიკური გოლკიპერი იცავდა. საპასუხო მატჩში აუცილებლად მოვიგებთ".

რეალი: კასილიასი - ს. რამოსი, ალბიოლი, პეპე, არბელოა - გრანერო (62. ხედირა), პედრო ლეონი, კანალესი, მ. დიარა - რონალდო (69. დი მარია), ბენზემა (62.იგუაინი).

"მურსია" სეგუნდა ბ დივიზიონის ლიდერია, იქვე თამაშობს "სეუტა", რომელიც "ბარსელონას" მასპინძლობდა. ჩრდილო აფრიკაში "ბარსელონამ" პირველივე ტაიმში გადაწყვიტა მატჩის ბედი, მაქსველმა და პედრომ გაიტანეს, შემდეგ კი პეპ გვარდიოლას გუნდმა 2:0 შეინარჩუნა. მოურინიოსგან განსხვავებით, რომელმაც თითქმის ოპტიმალური შემადგენლობით ითამაშა, გვარდიოლამ ექსპერიმენტებს მიმართა.

პირველ ტაიმში "ბარსელონას" შემტევმა ჟეფრენ სუარესმა მხარი ამოიგდო და ოთხი კვირით დააკლდა ფეხბურთს.

ბარსელონა: პინტო - ბარტრა, მაქსველი, ფონტასი, ადრიანო - მასკერანო, ტ. ალკანტარა (86. ჯ. დოს სანტოსი), კეიტა - პედრო, ჟეფრენი (32. ნოლიტო), კრკიჩი.       
გოლები: 0:1 მაქსველი (16), 0:2 პედრო (25)

ყოველდღიური სპორტული გაზეთი
"ლელო"