რონალდო VS მესი - ვინ უფრო მაგარია

ბავშვობაში ასეთი ტიპის თემებს გვაწერინებდნენ: "ტარიელისა და ავთანდილის შედარებითი დახასიათება "ვეფხისტყაოსნის" მიხედვით". აი, დაახლოებით ასეთი ტიპის "თემის" დაწერას ვაპირებ: კრიშტიანო რონალდოსა და ლეო მესის შედარებით დახასიათებას ლა ლიგის მიხედვით, "ჰედ თუ ჰედ", როგორც ინგლისელები იტყვიან. ამაში კი goal.com-ის შესაბამისი რუბრიკა დაგვეხმარება.

თავიდანვე ხომ ცხადი იყო, რომ ლა ლიგა ორი ბედაურის დოღი უნდა ყოფილიყო, მაგრამ სხვა კლუბებმა დასაწყისში შეძლეს "ბარსელონასთან" და "რეალთან" ტოლსწორად ბრძოლა, მაგრამ ახლა გრანდების უპირატესობა უკვე გამოიკვეთა - 11 ტურია გასული და "რეალი" 29 ქულით ლიდერობს, "ბარსელონას" ქულით ნაკლები აქვს. "ბლაუგრანა" მესამეადგილოსან "ვილიარეალს" უკვე 5 ქულით უსწრებს. ამ ორ გრანდში კი, ისევე როგორც შარშან, ორი ფეხბურთელია გამორჩეული: კრიშტიანო რონალდო და ლეო მესი.

როგორ ითამაშეს ბოლო ტურში
რომელმა იყოჩაღა ბოლო ტურში?
ლეო მესი ("ბარსელონა"-"ვილიარეალი" - 3:1): მესიმ დუბლი შეასრულა და ლა ლიგის ბოლო 4 მატჩში გოლების რიცხვი 7-მდე გაზარდა. პირველი გოლი (გუნდის მეორე) ასე გაიტანა - "ბარსელონამ" უმალ გაითამაშა საჯარიმო, მესიმ და პედრომ მეტოქის საჯარიმოში ორჯერ გაითამაშეს კედელი, რასაც არგენტინელის აუღებელი დარტყმა მოჰყვა. მეორე გოლი კვლავ პედროს აქტიურობას მოჰყვა, რომლის ჩაწოდებას თუ დარტყმას რიკოშეტი მოჰყვა, ბურთი არგენტინელმა ჩაიგდო და ნამდვილი ფორვარდის კლასი გამოავლინა. ამ მატჩში მსაჯებმა მას ნაღდი "საგოლე პასი" მოჰპარეს, როცა პედროზე თამაშგარე დააფიქსირეს.

რონალდო ("სპორტინგი"-"რეალი" - 0:1): ზედიზედ მეორე ტურში რონალდომ გოლი ვერ გაიტანა, მან ვერც "ატლეტიკო" დაამწუხრა და ვერც "სპორტინგი". მეტიც, კრიშტიანოს ასტურიაში კარში ზუსტად ერთხელაც არ დაურტყამს! პორტუგალიელმა ორჯერ ბრწყინვალე პასით დასარტყამ პოზიციაზე იგუაინი და ბენზემა გაიყვანა, მაგრამ ფორვარდებმა ვერ ივარგეს. მიუხედავად შედარებით "მშვიდი" თამაშისა, ხიხონში რონალდომ რამდენჯერმე შეძლო ტექნიკის დემონსტრირება. ერთხელ მის განავარდებას ფლანგზე ალბერტო ბოტიას უხეშობა და წითელი ბარათი მოყვა.

მესი რონალდო
გოლი 2 0
დარტყმა 6 (4) 1 (0)
პასი 0 0
დაკარგვა 11 9
მოპოვება 2 2
მასზე დაჯ. 1 7
გოლ.კომ-ის შეფასება 8 6


სიმბოლურ ნაკრებში
11 ტურია გასული და მესი სიმბოლურ ნაკრებში 5-ჯერ მოხვდა. შედარებით არადამაჯერებელი სტარტის შემდეგ პირველად არგენტინელი სიმბოლურში მე-3 ტურში მოხვდა (2:1 გამარჯვება "ვისენტე კალდერონზე"). მერვე ტურიდან მოყოლებული მესი მუდამ სიმბოლურშია. სტუმრად "სარაგოსასთან" დუბლს "სევილიას" წინააღმდეგ გაბრწყინება მოყვა. შემდეგ მესიმ "ხეტაფეს" ორი გოლი გაუტანა და ერთი საგოლე პასიც მიითვალა, ახლა კიდევ მორიგი დუბლი "ვილიარეალის" კარში.

კრიშტიანო რონალდო სიმბოლურ ნაკრებში ოთხჯერ მოხვდა. სეზონის სტარტი ვერც მას გამოუვიდა კარგი, სიმბოლურში კი პირველად მეოთხე ტურში შეიყვანეს - გოლი და საგოლე პასი "ესპანიოლის" წინააღმდეგ. შემდეგ ზედიზედ მე-7, მე-8 და მე-9 ტურებში მადეირელი სიმბოლურში ვიხილეთ. ყველაზე მეტად მან "რასინგი" გაამწარა, რომელსაც პოკერი შეუსრულა.


რომელი უკეთეს სეზონს ატარებს ლა ლიგაში?
 მესი რონალდო
წუთები 849 1041
გოლები 10 11
პენ. 0 3
საჯარიმო 0 0
პირველი გოლი 5 2
კარში დარტყმა 44 (24) 82 (31)
საგოლე პასი 3 5
პასი 553 520
ზუსტი 462 382

მოკლედ, ჩვენ გვიჭირს გამარჯვებულის გამოვლენა და ჯერი თქვენზეა. დავძენთ მხოლოდ, რომ, მიუხედავად იმისა, რომ რონალდოს 1 გოლით, ხოლო მის გუნდს 1 ქულით მეტი აქვს, ოდნავ წინ მაინც მესია.