დიახ, შარშან ამ დროს ხავიერ ერნანდესის ვინაობა მექსიკის გარეთ ერთი-ორმა ადამიანმა თუ იცოდა. საფეხბურთო ოჯახიდან გამოსული გვადალახარელი ბიჭი იმედისმომცემი ახალგაზრდა იყო, რაც თავისთავად კარგია, მაგრამ... კაცმა რომ თქვას, ასეთი დედამიწის ზურგზე ბევრია.
"ჩემი ცხოვრება ძალიან შეიცვალა, თუმცა პიროვნულად ყოველთვის ვცდილობ იგივე დავრჩე. რა მნიშვნელობა აქვს რას მიაღწიე, რაც ხარ, ის უნდა იყო", - თქვა
ერნანდესმა თავისი მანჩესტერელი თანაგუნდელები ორშაბათს გაიცნო. ადვილად ითქმის, არა? რეალურად კი ახალგაზრდა ბიჭისთვის ეს გახლდათ შეხვედრა იმ ხალხთან, რომელთაც ტველეეკრანიდან და "პლეისთეიშენით" იცნობდა - ერნანდესი პირველი მექსიკელია "მანჩესტერ იუნაიტედის" ფორმა რომ მოირგო.
"ზეწოლას, რასაკვირველია განვიცდი, მაგრამ ვცდილობ, ყველაფერს სხვა თვალით შევხედო. იმან, რაც ჩემს გარშემო ხდება, მოტივაცია უნდა შემმატოს. აბა, წარმოიდგინეთ, დედამიწაზე ხომ მილიონობით ადამიანი ინატრებდა ჩემს ადგილზე ყოფნას. ხანდახან, ჩვენს წარმატებებსა და ოცნებებზე იმდენს ვფიქრობთ, რომ ამ წარმატებებით და ახდენილი ოცნებებით სიამოვნება გვავიწყდება. მე ამ ფეხბურთელების მხარდამხარ თამაშს ვნატრულობდი და მინდა მათგან ბევრი რამ ვისწავლო. კიდევ, მინდა ჩემი წილი ქვიშის მარცვალი შევმატო საერთო საქმეს. ვიმედოვნებ, რომ ჩემი აქ ყოფნის პერიოდში "იუნაიტედი" ძალიან დიდი გუნდი იქნება. მე მანჩესტერელ ფეხბურთელებს ყოველთვის ვეთაყვანებოდი. აღფრთოვანებული ვიყავი რუნით, მანამსე კი ვან ნისტელროითა და რონალდოთი".
ერნანდესთან ერთად მანჩესტერში მისი მშობლები და დაც გადასახლდებიან. მამა, ხავიერ ერნანდეს-უფროსი, მექსიკის ნაკრების შემადგენლობაში 1986 წლის მსოფლიოს ჩემპიონატზე თამაშობდა, ხოლო პაპა ტომას ბალკასარი 1954 წლის მუნდიალზე ასპარეზობდა და საფრანგეთის ნაკრების კარში გოლიც შეაგდო. სწორედ ასე მოიქცა ხავიერიც ამ ზაფხულს, სამხრეთ აფრიკაში.
2010 წლის მსოფლიოს ჩემპიონატის ყველაზე სწრაფმა ფეხბურთელმა, რომელსაც მწვანე თვალების გამო მეტსახელად მამამისივით "ჩიჩარიტოს" ანუ ბარდის მარცვალს ეძახიან, ერთი გოლი არგენტინასაც შეუგდო.
"ძალიან მაგარია, როდესაც მეტსახელიც კი ოჯახურ ტრადიციად იქცევა და თაობიდან თაობაზე გადადის. ბედნიერი ვარ, რადგან, სახლში დამატებით ორი მწვრთნელი მყავს - მამაჩემი და პაპაჩემი. ისინი ყოველთვის მასწავლიან და მეუბნებიან რა სწორად გავაკეთე და რა არასწორად. მათი შენიშვნები რეალობის გრძნობას არ მაკარგვინებს. სწორედ მათ მასწავლეს, რომ თავი თანაგუნდელებზე უკეთესი არავითარ შემთხვევაში არ უნდა მეგონოს".
ინგლისში ცხოვრების თავისებურებებზე კი ერნანდესს მისი თანამემამულეები, "ტოტენჰემში" ნათამაშები ჯოვანი დოს სანტოსი და "არსენალში" გამოვლილი კარლოს ველა ელაპარაკებიან. კაცმა რომ თქვას, პრემიერლიგაში ვერც ერთმა ივარგა და ვერც მეორემ, აი, ერნანდესისზე კი უკვე წერენ, რომ "იუნაიტედში" ისეთსავე წარმატებას მიაღწევს, თავის დროზე "რეალში" დიდმა უგო სანჩესმა რომ მიაღწია.
"მექსიკელთათვის სახელის განთქმას ყველგან და ყოველთვის შევეცდები, მაგრამ შედარებეი არ მიყვარს და ნამდვილად ზედმეტი მგონია. ყველას თავისი კარიერა და ბედი აქვს", - ამბობს მექსიკის ნაკრების მეთოთხმეტე ნომერი.
"მანჩესტერ იუნაიტედის" თავკაცმა სერ ალექს ფერგიუსონმა კი თავისი ახალი შენაძენის შესახებ ასე ბრძანა: "ჩვენ გვინდა ის რაც შეიძლება მალე ვაქციოთ ჩვენი გუნდის ორგანულ ნაწილად".
ამერიკულ ტურს "იუნაიტედი" გვადალახარაში სწორედ ერნანდესის ყოფილ გუნდთან, "ჩივასთან" დაპირისპირებით ამთავრებს. "ჩიჩარიტო" ერთ ტაიმს "ჩივასის" შემადგენლობაში ითამაშებს, მეორეში კი ახალი გუნდის მაისურს მოირგებს. ფერგიუსონს ჰკითხეს, რას იტყვის ის თუ ერნანდესი გოლს "ჩივასის" შემადგენლობაში თამაშის დროს გაიტანს. სერ ალქსმა უპასუხა: "დავაჯარიმებ და გვადალახარაში დავაბრუნებ", - იყო პასუხი.
