"არსენალის" თავკაცმა, არსენ ვენგერმა თქვა, ჩემი ფეხბურთელები მიმდინარე სეზონში იმდენს მოახერხებენ, რომ "ემირეით სთედიუმის" დატოვება არ მომიხდებაო. ამ თემაზე ლაპარაკი ჯერ კიდევ შაბათიდან დაიწყო, როდესაც ფრანგმა სპეციალისმა განაცხადა, თუ ვერ ვივარგებთ, სეზონის ბოლოს სამსახურიდან წასვლაზე დავფიქრდებიო. თუმცა, იმ საღამოს "მეთოფეებმა" ნორვიჩში 2:1 გაიმარჯვეს და მწვრთნელის ინტონაცია შეიცვალა. დღის ბოლოს მან უკვე თქვა, რომ რწმენით არის აღსავსე და იმედოვნებს, რომ კონტრაქტით გათვალისწინებული წლებიდან კიდევ ორს მაინც გაატარებს ჩრდილოეთ ლონდონში.
"კლუბისთვის თავდადებული რომ ვარ, ამ სეზონის ბოლოს ერთხელაც დაგიმტკიცებთ - ბრძანა 62
ყველას კარგად მოეხსენება, რომ ვენგერმა ზაფხულში ორი წამყვანი ფეხბურთელი, სამირ ნასრი და სესკ ფაბრეგასი დაკარგა, თუმცა "მეთოფეთა" თავკაცი ხედავს, რომ ახალწვეულების ოსტატობისა და დაჟინების წყალობით გუნდს პრემიერლიგაშიც შეუძლია მაღალი ადგილებისთვის ბრძოლა და არც ჩემპიონთა ლიგაში ჩამოყრის ყურებს.
"ჩვენ ყველას, უპირველეს ყოვლისა კი საკუთარ თავს უნდა ვაჩვენოთ, რომ შორს შეგვიძლია წასვლა. რა მოხდება წინასწარ ვერ გეტყვით, მაგრამ მიზნად სწორედ ეს გვაქვს დასახული. პლიუსების და მინუსების გამოსაკვეთად ჯერ მაინც დრო არის საჭირო. ამიტომაც, არ ვჩქარობ, არაფერს ვიქადნები და მოთმინებით ველოდები სეზონის ბოლოს, როდესაც გამოჩნდება სად ვიქნებით. იმედით აღსავსე კი გახლავართ, მაგრამ ნამდვილ დიდ წარმატებას როდის მივაღწევთ, ამწუთას ვერ გეტყვით.
ერთი სიტყვით, შემდეგი რამდენიმე თვის განმავლობაში ბევრი რამ გამოჩნდება. ჩემი ოპტიმიზმი კი ფეხბურთელების განწყობას ემყარება. ვხედავ, რომ გუნდს უმაღლესი მიზნებისთვის ბრძოლა უნდა".
შაბათს, "ნორვიჩთან" "არსენალმა" დიდებულად ითამაშა. საუცხოო იყო 28 წლის ჰოლანდიელი თავდამსხმელი რობინ ვან პერსი, რომელმაც 2011 წელს თავისი 30-ე და 31-ე გოლები გაიტანა, მაგრამ გერმანელ პერ მერტეზაკერს დაცვაში კვლავ უჭირს. ამის დასტური იყო "მეთოფეთა" კარში სტივ მორისონის მიერ გატანილი. ამ ეპიზოდში ნორვიჩელმა 27 წლის არსენალელი უბრალოდ დაჯაბნა.
ვენგერს მიაჩნია, რომ მერტეზაკერს მაინც დრო სჭირდება. როგორც ჩანს ფეხბურთელი ახალ გარემოს მძიმედ ეგუება, თორემ, წინააღმდეგ შემთხვევაში, როგორ უნდა აიხსნას ის, რომ გარმანელმა, ამასწინათ, ეროვნული გუნდის შემადგენლობაში, ჰოლანდიელებთან შეხვედრაში საქმეს შესანიშნავად გაართვა თავი?
"ნაკრებიდან დაბრუნებული მერტეზაკერი დაღლილი იყო და ძალების აღდგენა ვერ მოასწრო - განმარტა "არსენალის" შეფმა - გარდა ამისა, ინგლისში თამაშს სხვანაირი შეგუება სჭირდება. აქ, მცველს ყოველ წუთას გამოცდა აქვს ჩასაბარებელი. პრემიერლიგაში შეღავათიანი თამაშები არ არსებობს, ამას კი გაძლება სჭირდება. გახსოვთ, როგორი იყო ლორან კოშელნი აქ რომ ჩამოვიდა და როგორია ის დღეს?"
ყოველდღიური სპორტული გაზეთი "ლელო"
