დღეს
სტოკ სიტი-ვესტ ჰემი 15:45
ასტონ ვილა-ბოლტონი 18:00
ბლექბერნი-ფულჰემი 18:00
ევერტონი-ნიუკასლი 18:00
ტოტენჰემი-ვულვზი 18:00
ვესტ ბრომვიჩი-ბირმინგემი 18:00
სანდერლენდი-არსენალი 20:30
ხვალ
მანჩესტერ იუნ-ლივერპული 16:30
უიგანი-მანჩესტერ სიტი 18:00
ჩელსი-ბლექპული 18:00
ინგლისში მეხუთე ტურის მთავარი თამაში, რასაკვირველია, "ოლდ ტრეფორდზე" გაიმართება. აქ, "იუნაიტედი" "ლივერპულს" უმასპინძლებს. სერ ალექს ფერგიუსონი ამ შეხვედრაში ჩემპიონთა ლიგაში დასვენებულ საუკეთესო ფეხბურთელებს უპირებს დატვირთვას. ალბათ, მიხვდით, იმ ფეხბურთელებზეა ლაპარაკი, რომლებზეც ლეგენდარული სქოთი "რეინჯერსთან" თამაშის შემდეგ ამბობდა, ესენი სათადარიგონი სულაც არ არიან, მათგან რვამ "ქომუნითი შილდის" შეხვედრაში თვით
"რეინჯერსთან" შეხვედრაში, მოგეხსენებათ, სასტიკად დაშავდა ანტონიო ვალენსია, რომელზეც ახლა უკვე ამბობენ, რომ თებერვლამდე ვერ ითამაშებს, მის წილ საქმეს კი, ალბათ, ნანი იტვირთავს.
"მანჩესტერ იუნაიტედმა" მიმდინარე სეზონში უკვე დაკარგა ქულები, რომლებიც წესითა და რიგით არ უნდა დაეკარგა - "ფულჰემსა" და "ევერტონთან" შეხვედრებს მოგახსენებთ - და მერსისაიდელთა ძლევით ამ ჩამორჩენის გამოსწორება შეუძლია. რიო ფერდინანდმა, რომელმაც შესაძლოა მიმდინარე სეზონში პირველად ითამაშოს ამ შეხვედრის შესახებ ასე თქვა:
"ასეთი თამაშის მოგება ყოველთვის ძალიან მნიშვნელოვანია. მას უპირველეს ყოვლისა საბრძოლო სულისკვეთებისა და ნირის გამოსწორებისთვის აქვს მნიშვნელობა. ჩვენ, ჯერჯერობით, შედეგებით ვართ უკმაყოფილო მაგრამ თამაშის ხარისხით ეს არ ეხება".
მოგეხსენებათ, კვირის შუაში ძირითადი შემადგენლობის უდიდესი ნაწილი დაასვენა "ლივერპულის" მწვრთნელმა როი ჰოჯსონმაც. "სტიაუასთან" ევროპის თასის შეხვედრაში მან ფერნანდო ტორესიც დაასვენა და სტივენ ჯერარდიც.
"ასტონ ვილა", რომელსაც ახალი მწვრთნელი ჟერარ ულიე უხელმძღვანელებს "ბოლტონს" მასპინძლობს. ბოლტონელები, "ვილა პარკზე" სავარაუდოდ, კევინ დევისის გარეშე იქნებიან. წინა ტურში არსენალელ ლორან კოშელნისთან შეტაკების გამო დევისს მთელი კვირა არ უვარჯიშია. კიდევ, ბოლტონელებს უნდოდათ, ფეხბურთის ასოციაციისთვის დისდკვალიფიცირებული კეჰილის შეწყალება გამოეთხოვათ, მაგრამ არ გამოუვიდათ და ფეხბურთელი სამი თამაშის გამოტოვებას იწყებს. მეორე შეხვედრას გამოსტოვებს იმავე დღეში მყოფი მეკარე იაასკელაინენიც. ამ ორი კაცის ნაცვლად ენდი ობრეინი და ადამ ბოგდანი ითამაშებენ. "ვილას" თავდამსხმელი იონ კარეუ უბრუნდება.
"ფულჰემი" "ბლექბერნს" ესტუმრება და დემიენ დაფიც ეყოლება, ბობი ზამორა კი ვაგლახ, ხუთი თვის განმავლობაში ვეღარ დაეხმარება თავისიანებს. ოთხი კვირით არის დაშავებული ენდრიუ ჯონსონი.
"ევერტონთან" სათამაშოდ ლივერპულს მიემგზავრება "ნიუკასლი", რომლის მწვრთნელს კრის ჰაფტონს ახალი დაშავებული არავინ ჰყავს. ენდი კეროლი კვლავ კოჭს მკურნალობს, მაგრამ "გუდისონ პარკზე" ითამაშებს.
"სტოკ სიტის" მწვრთნელი ტონი პულისი "ვესტ ჰემთან" გამარჯვებას, სავარაუდოდ, გამოცდილი შემადგენლობით შეეცდება - ამ ჩემპიონატში ხომ ყველა "ვესტ ჰემის" ძლევით ფიქრობს ქულების მოპოვებას. პულისს ამ კვირაში დედა გარდაეცვალა, მაგრამ ლონდონელებთან ის მაინც სამსახურში იქნება. თან, სტოკელთა ბანაკი ჩინებულ გუნებაზეც არის, რადგან ორშაბათს "ასტონ ვილას" ძლევით ზედიზედ სამწაგებიანი სერია დაასრულა. რაც შეეხება "ვესტ ჰემს" მის მწვრთნელს ავრამ გრანტს ახალი დაშავებული არავინ ჰყავს.
"არსენალი" "სანდერლენდს" აბუ დიაბისა და ტომას ვერმალენის გარეშე ეწვევა. მოგეხსენებათ, ჩრდილო ლონდონელების გუნდში ჩინებულ ფორმაშია კაპიტანი სესკ ფაბრეგასი, რომლის მხარდამხარ, სავარაუდოდ, კვლავ ითამაშებს ჯეკ უილშერი. კაპიტნის გარეშე იქნებიან მასპინძლები - ლი კეტერმოლი "არსენალს" ვერ შეებრძოლება. საქმე ის არის, რომ 22 წლის ფეხბურთელმა ამ სეზონში უკვე მეორე წითელი ბარათი მიიღო და დისკვალიფიკაცია აქვს მოსახდელი.
"ვულვზს" სავარაუდოდ, ვერ შეუტევს "ტოტენჰემის" ახალი ვარსკვლავი რაფაელ ვან დერ ვაარტი. ლონდონელთა მწვრთნელს ჰარი რედნაპს როგორც თავად ამბობს, შვიდი თუ რვა ფეხბურთელი ჰყავს დაშავებული და როტაცია მოუწევს. "ვულვზს" დისკვალიფიცირებული ჰყავს კრისტოფ ბერა.
"ვესტ ბრომვიჩის" თავკაცს რობერტო დი მატეოს "ბირმინგემთან" შეხვედრაში გრემ დორანსი დაუბრუნდება. ბირმინგემელთა თავკაცს ალექს მაკლიშს კი ახალი დაშავებული არავინ ჰყავს.
"ჩელსის" "ბლექპულთან" შეხვედრაში არ ეყოლება ფრანკ ლემპარდი რომელმაც ნატკენი საზარდული ვერ მოირჩინა. "უიგანი" კი "მანჩესტერ სიტის" ელოდება, რომლის მწვრთნელი რობერტო მანჩინიც თავის მხრივ ემანუელ ადებაიორის ჯანმრთელობის შესახებ ელის ექიმთა დასკვნას. მანჩინის ყველაზე დიდი საწუხარი სწორედ ეს არის.
ილია ბაბუნაშვილი
