ბენ არფა მოედნიდან საკაცით გაიყვანეს და სასწრაფო დახმარების მანქანით მანჩესტერის უახლოეს ჰოსპიტალში გააქანეს. იქ ფეხბურთელს რენტგენი გადაუღეს და ყველაზე ცუდი მოლოდინიც გამართლდა – ბენ არფას ფეხის ორი ძვალი აქვს გატეხილი და ორშაბათს ქირურგიული ოპერაციაც
"რენტგენმა ცხადყო, რომ ჰატემს ორი ძვალი აქვს გატეხილი. მას ოპერაცია ელის. კლუბი ბენ არფას მუდმივად ეკონტაქტება და მალე გამოჯანმრთელებას უსურვებს. ამ ეტაპზე მისი დაბრუნების თარიღებზე მსჯელობა ნაადრევია. ოპერაციის შემდეგ სიტუაცია უფრო გაირკვევა", - თქვა "ნიუკასლის" წარმომადგენელმა.
დე იონგის ზღვარგადასული სიხისტე კი უკვე შემაშფოთებელი ხდება. მსოფლიოს ჩემპიონატამდე, ჰოლანდიისა და აშშ-ის ნაკრებთა საკონტროლო მატჩის მსვლელობისას 25 წლის ამსტერდამელმა შუახაზელმა ამერიკელ სტიუარტ ჰოლდენს ფეხი მოტეხა. ის მომენტი საფეხბურთო საზოგადოებას რაღაცნაირად მიავიწყდა. უშუალოდ მუნდიალზე კი ნაიჯელის უხეშობამ კვლავ გამოიწვია აღშფოთება – ფინალურ მატჩში ჰოლანდიელმა საყრდენმა ნახევარმცველმა თავის ესპანელ კოლეგას შაბი ალონსოს არა საფეხბურთო, არამედ რომელიღაც აღმოსავლური ორთაბრძოლის ილეთი ჩაუტარა და საფეხბურთო ექსპერტები ერთხმად აღნიშნავდნენ, რომ კიდევ კარგი, დე იონგის უსასტიკესი წიხლი მკერდში გლადიატორის აღნაგობის ალონსოს მოხვდა და არა ჩია ინიესტას ან ჩავი – იქვე გამოასალმებდა სიცოცხლესო...
კვირას კი დე იონგმა ბენ არფა იმსხვერპლა და არათუ კრიტიკის, არამედ განკიცხვის ობიექტად იქცა. "ნაიჯელთან ამ თემაზე სერიოზული საუბარი მექნება", - თქვა ჰოლანდიის ნაკრების მთავარმა მწვრთნელმა ბერტ ვან მარვეიკმა. როტერდამის "სპარტას" დამრიგებელი იან ევერსე უფრო პირდაპირი იყო: "დე იონგი ფსიქიატრთან უნდა მივიდეს". ტელეკომენტატორმა ჰიუგო ვორსტმა კი კატეგორიული განცხადება გააკეთა: "ნაიჯელ დე იონგი არის კრიმინალი, რომელიც ფეხბურთს როგორმე უნდა ჩამოვაშოროთ!"
და კიდევ ერთი საოცარი მომენტი: დე იონგის სისასტიკე შეხვედრის არბიტრ მარტინ ატკინსონს გამორჩა – რეფერიმ წესების დარღვევაც კი ვერ დააფიქსირა...
