სნეიდერი მანჩესტერში?

"მანჩესტერ იუნაიტედის" თავკაც სერ ალექს ფერგიუსონს, რომელმაც ორიოდ დღის წინ განაცხადა, ამ ზაფხულზე მეტი ფეხბურთელის დამატებას აღარ ვაპირებო, ჰოლანდიის ნაკრებისა და მილანის "ინტერის" ვარსკვლავის ვესლი სნეიდერის შეძენა მონდომებია. სნეიდერი, რასაკვირველია, "იუნაიტედის" შეტევას კიდევ უფრო გაამწვავებს, მაგრამ ჯიბეს 35 მილიონ გირვანქას დააკლებს - მის გადასაბირებლად "ოლდ ტრეფორდიდან" "სან სიროზე" შესაძლოა სწორედ ამ თანხის გადარიცხვა გახდეს საჭირო. სნეიდერის ფასი უფრო ზუსტად, რომ წარმოვიდგინოთ, ასე ვთქვათ: 35 მილიონი გირვანქაი 53 მილიონი ამერიკული დოლარი ან 42,3 მილიონი ევროა.

როგორც მანჩესტერში ამბობენ, ფერგი პოლ სქოულზის პოზიციაზე გამწვავების უნარის მქონე ფეხბურთელს ეძებს. ამბობენ იმასაც, რომ მართალია მწვრთნელს სატრანსფერო საქმეებისთვის მაინც და მაინც ბევრი ფული არ გამოუყვეს, მაგრამ სნეიდერი მას ისე მოეწონა, რომ მზად არის ბოლო პენიც გაიღოს და უეინ რუნის უკან გამოჩენილი სივრცე ამ ვარსკვლავით შეავსოს. შეგახსენებთ, რომ სნეიდერმა ერთი ხნის წინ მადრიდის "რეალში" ვერ მოიკიდა ფეხი და შარშან იგი "ინტერმა" 13 მილიონ გირვანქაად იყიდა.

მილანში გადაბარგებულმა 170 სანტიმეტრი სიმაღლის ვარსკვლავმა იტალიის ჩემპიონობაში, ქვეყნის თასისა და ჩემპიონთა ლიგის მოპოვებაში ძალიან დიდი წვლილი შეიტანა. ჟოზე მოურინიოს ხელში ის სხვანაირად ათამაშდა და აგერ, ახლაც, მსოფლიოს მიმდინარე ჩემპიონატზეც გამოიჩინა თავი.

კეთილი და პატიოსანი, მაგრამ, შეელევა სნეიდერს "ინტერის" ახალი თავკაცი რაფა ბენიტესი, რომელიც აქამდე პრემიელიგაში, "ლივერპულში" მუშაობდა და მთელი ექვსი წლის განმავლობაში ფერგიუსონთან ისედაც დიდი ქიშპი ჰქონდა? ხომ არ გააღიზიანებს, რომ ძველი კონკურენტი იტალიაშიც გამოედევნა და ფეხბურთელის წართმევას ლამობს? ვერ გეტყვით, ემოცია სხვა სფეროა, რომლის გარდა არსებობს პრაქტიკული მოსაზრებებიც და ეს მოსაზრებები საფეხბურთო ბიზნესში ძალიან ბევრს წყვეტს.

როგორც ამბობენ, ბენიტესს "სან სიროზე" თავისი, მოურინიოს გუნდისგან ძალიან განსხვავებული გუნდის შექმნა სურს და ამდენად, სულაც არ არის გაკვირვებული, სნეიდერს მართლა რომ შეელიოს, თან 53 მილიონ დოლარად. ესპანელმა სპეციალისტმა კარგად იცის, რომ ძველი შემადგენლობით "ინტერს" წარმატებაც რომ მოუტანოს, ცინიკოსები ყოველ ნაბიჯზე წამოაძახებენ, ეს ისევ მოურინიოს გუნდია, ბენიტესი კი სხვის გაკვალულ გზაზე დადისო.

და კიდევ, თუ სნეიდერი მართლა "მანჩესტერ იუნაიტედში" გადავა, ბენიტესს კიდევ უფრო თამამად შეეძლება "ინტერის" დირექტორატთან მისი ფავორიტის, არგენტინელი ნახევარმცველის ხავიერ მასკერანოს გადაბირებაზე ილაპარაკოს. შეგახსენებთ, რომ მასკერანო "ლივერპულის" წევრია.