"მანჩესტერ სიტიმ" "ოლდ ტრეფორდზე" მოგებით გარკვეულწილად რეაბილიტაცია გაიარა. რობერტო მანჩინის გუნდმა პრინციპულ მეტოქეზე უკეთ ითამაშა და 3 ქულა ალალად დაიმსახურა. თამაშის ხასიათი ჩვეულებრივი იყო, როგორც ეს პრემიერლიგაში დერბის შეხვედრებს ახასიათებს. გუნდებმა თავიდანვე უარი თქვეს ერთი მტკაველი მიწის დათმობაზეც კი. ხისტი თამაში ერთია, მაგრამ, ყვითელი ბარათების სიმრავლის მიუხედავად, როგორც მაღალი კლასის გუნდებს შეჰფერით, უხეშობას ადგილი არ ჰქონია. სტუმართა უპირატესობა კი იყო გამოკვეთილი, მაგრამ 100%-იან საგოლე მომენტებამდე საქმე არ მიდიოდა.
მეორე ტაიმში ბრძოლამ და ტემპმა იმატა. "იუნაიტედმა" ის იყო, მცირე უპირატესობა მოიპოვა,
"იუნაიტედმა" მალევე უპასუხა. რობინ ვან პერსის საჯარიმოს შემდეგ ჯონსის თავური ვენსან კომპანის ზურგში მოხვდა. ეს რომ არა, გოლი ნამდვილად არ გავიდოდა. მატჩს წერტილი სერხიო აგუერომ დაუსვა. არგენტინელს სამი "ეშმაკი" ფეხზე დააჯდა, მაგრამ მან მაინც მოახერხა და დავიდ დე ხეას ახლო მაღალ კუთხეში გაუტანა.
მატჩის შემდგომ
რობერტო მანჩინი (მანჩესტერ სიტი): "ჩვენ შეგვიძლია მომდევნო სეზონში ჩემპიონობისთვის ბრძოლა, მაგრამ ამისთვის შემადგენლობაში სერიოზული ცვლილებები გვჭირდება. ამისთვის წინ 2-3 თვე გვაქვს. წელს "იუნაიტედმა" ტიტული აშკარად დაიმსახურა. ის ჩვენზე სტაბილურად თამაშობდა. ეს ფაქტია და ვერსად გავექცევით. უკანასკნელი მარცხი მას ნოემბერში ჰქონდა.
ჩვენი წარუმატებლობის რაღაც წილი წამყვანი ფეხბურთელების ტრავმების დამსახურებაა. გარკვეულწილად თავად ვართ დამნაშავენი, როცა ისეთ თამაშებს ვერ ვიგებდით, სადაც ულაპარაკოდ უნდა აგვეღო სამი ქულა. დღევანდელმა თამაშმა დაადასტურა, რომ არ ვიმსახურებთ ჩემპიონატში 15-ქულიან ჩამორჩენას. ეს გამარჯვება მეორე ადგილისთვის ბრძოლაში ძალიან მნიშვნელოვანი იყო. ახლა მთავარია, დარჩენილ თამაშებშიც წარმატებით ვითამაშოთ, წინ ხომ კიდევ 7 შეხვედრა გველის."
ალექს ფერგიუსონი (მანჩესტერ იუნაიტედი): "ნორმალურად ვითამაშეთ, დროდადრო კი, უბრალოდ, კარგად გამოვიყურებოდით. ამ ფონზე განსაკუთრებით გულსატკენია ჩემპიონატში 18-თამაშიანი წაუგებელი სერიის შეწყვეტა და თანაც დერბიში, სადაც წარმატებას განსაკუთრებული მნიშვნელობა აქვს. ჩვენ ჯერ კიდევ დიდი უპირატესობით ვლიდერობთ, მაგრამ გუნდში არავინ ფიქრობს, რომ ეს ფორა საკმარისია და დანარჩენი ყველაფერი თავისით მოვა. ამიტომ განსაკუთრებით მნიშვნელოვანია "სტოკ სიტისთან" მომდევნო თამაშის მოგება.
უშუალოდ თამაშზე კი იმას ვიტყვი, რომ ასეთ მნიშვნელოვან მატჩებში პირველი გოლი, როგორც წესი, ძალიან ბევრს წყვეტს ხოლმე. ამ შემთხვევაშიც ასე მოხდა. არადა, მოედანზე კონტროლი უკვე დაწესებული გვქონდა და თამაშის ლოგიკიდან გოლი ამოვარდნილი იყო. მეორე ბურთზე კი სერხიო აგუეროს მეტისმეტად დიდი სივრცე მივეცით დასარტყმელად, რითაც მან ისარგებლა კიდეც. სერხიოს შეტევების დასრულება ხომ ისედაც მშვენივრად ეხერხება".
სილვას გასაჭირი
ორშაბათს, XXXII ტურის დამაგვირგვინებელ შეხვედრაში, მანჩესტერის "ოლდ ტრეფორდზე" "მანჩესტერ სიტის" 27 წლის ნახევარმცველმა დავიდ სილვამ მთელი თამაში მაღალ დონეზე ჩაატარა. მისდა სამწუხაროდ, შეხვედრის ბოლო წუთებზე მან მუხლის ტრავმა მიიღო, რის გამოც რობერტო მანჩინი იძულებული გახდა, მის ნაცვლად მინდორზე ჯოლეონ ლესკოტი გამოეყვანა.
ფეხბურთელი გასახდელისკენ კოჭლობით გაემართა. როგორც სამედიცინო გამოკვლევამ აჩვენა, დავიდს მუხლის მყესები აქვს დაჭიმული. მას მინიმუმ ერთი კვირა მოუწევს დასვენება, რაც იმას ნიშნავს, რომ 14 აპრილს "უემბლიზე", ასოციაციის თასის 1/2-ფინალში, "ჩელსის" წინააღმდეგ თამაშს ვერ შეძლებს.
დავიდის ტრავმა "ქალაქელებისთვის" უზარმაზარი დანაკლისია. ესპანელის ანგარიშზე მიმდინარე სეზონში 41 თამაშში 5 გოლი და 14 საგოლე გადაცემაა.
სამაგიეროდ, მანჩინის შეუძლია გული იმით დაიმშვიდოს, რომ მალე მწყობრში ჩადგებიან და მოედანზე გასვლას შეძლებენ მაიკონი და მიკა რიჩარდსი. პირველს თებერვლის შუა რიცხვების შემდეგ არ უთამაშია, მეორე კი 2012 წლის ოქტომბრის შემდეგ მკურნალობს. ამ ფეხბურთელებმა ორშაბათს დუბლების შემადგენლობაში ითამაშეს. შესაბამისად, მზად არიან, პირველ გუნდსაც დაეხმარონ.
დერბის კიდევ ერთი მსხვერპლი
"იუნაიტედი"-"სიტის" თემატიკას ვერა და ვერ ვცილდებით. "ოლდ ტრეფორდზე", დავიდ სილვას გარდა, უკანასკნელ წუთებზე ტრავმა მიიღო და გარკვეული პერიოდი უფეხბურთოდ მოუწევს ცხოვრება "ეშმაკების" განაპირა ნახევარმცველს, 27 წლის ეშლი იანგს. თითქმის გარკვეულია, რომ 14 აპრილს, კვირას, "სტოკ სიტისთან" გასვლით შეხვედრაში ის თამაშს ვერ შეძლებს. ტრავმის მიზეზი პაბლო საბალეტასთან შეჯახება გახდა. ერთი თამაშის გამოტოვებას კიდევ რა უშავს? პირველადი პროგნოზი ხომ ბევრად უფრო პესიმისტური იყო.
ყოველდღიური სპორტული გაზეთი "ლელო"
ასევე იხილეთ:
მანჩესტერული დერბი "სიტიმ" მოიგო - რობერტო მანჩინი აგუერომ გადაარჩინა
