"ლონდონელებმა
როგორც ამბობენ, თუ დიდიე დროგბა ისტლენდზე გადაბარგდება, სამ წელიწადში 18 მილიონ ფუნტს მიიღებს. შეგახსენებთ, რომ კოტ დივუარელმა გასულ სეზონში 29 გოლი გაიტანა და პრემიერლიგის საუკეთესო ბომბარდირის ტიტული, ეგრეთწოდებული "ოქროს ბუცი" მოიპოვა. გარდა ინდივიდუალური წოდებისა, დროგბამ გუნდური ტიტულებიც მიგო: ინგლისის ჩემპიონობა და ფეხბურთის ასოციაციის თასი. დროგბას კონტრაქტის თანახმად, მან "სტემფორდ ბრიჯზე" კიდევ ორი წელიწადი უნდა გაატაროს. როგორც მიმომხილველები წერენ, იმ შემთხვევაში თუ თავდამსხმელი "ჩელსიდან" წასვლას მაინც გადაწყვეტს, ლონდონელები "ლივერპულს" მიმართავენ და იქიდან "ფერნანდო ტორესის" წამოყვანას შეეცდებიან.
იმის დასამტკიცებლად, რომ "სიტის" პატრონებს ფული არ უჭირთ, შეგახსენებთ, რომ ამ ზაფხულს მათ უკვე იყიდეს სამი ფეხბურთელი: იაია ტურე "ბარსელონადან", დავიდ სილვა "ვალენსიადან" (მართალია "სელტაში" თამაშობდა, მაგრამ ვალენსიელთა საკუთრება იყო) და ჯერომ ბოატენგი "ჰამბურგიდან". ეს სამი ტრანსფერი ისტლენდელებს 60 მილიონი ფუნტი დაუჯდათ, თუმცა ამით დაკმაყოფილებას არ აპირებენ. კერძოდ, მანჩინის "ლაციოდან" სერბი მცველის ალექსანდრ კოლაროვის გადაბირება უნდა. რაც შეეხება დროგბას, მასში "სიტი" 20 მილიონი ფუნტის გადახდას ვარაუდობს.
ასეთი ვაჭრობის შემდეგ კი, მანჩინის შეუძლებელია მომავალი სეზონისთვის დიდი გეგმები არ ჰქონდეს დასახული - ოთხეულში შესვლა და რომელიმე ჯილდოს მოპოვება, ასეთია გეგმა. გახსოვთ, რა იყო გასულ სეზონში? იტალიელი მწვრთნელის ხელმძღვანელობით გუნდმა მეხუთე ადგილი მოიპოვა და ლიგის თასზე ნახევარფინალში გავიდა.
"რასაკვირველია, შემართებული და აღელვებული ვარ - უთხრა მანჩინიმ ჟურნალისტებს - დღესაც კი, როდესაც სატრანსფერო ბაზრის დახურვამდე ჯერ ძალიან ადრეა და არ ვიცი კიდევ ვის დავიმატებთ, ვფიქრობ, რომ დიდებული სეზონი გველის. ვგონებ, ასეთი შემადგენლობა მხოლოდ წარმატებისთვის თუ იბრძოლებს და ჩვენი გულშემატკივარიც დიდი ხანია ჯილდოს იმსახურებს. სხვათაშორის, გასული სეზონიც ძალიან კარგი გვქონდა. მართალია, ჩემპიონთა ლიგაში თამაშის უფლება კვლავ ვერ მოვიპოვეთ, მაგრამ რაც იყო, მანც ძალიან მომეწონა. ახლა კი უკვე დროა "სიტიმ" დიდების დარბაზში ახალი ჯილდოები გამოფინოს.
ხომ ხედავთ, იაია, ბოატენგი და სილვა უკვე დავიმატეთ. სამივე კარგი მოთამაშეა. თან, სილვა და ბოატენგი ახალგაზრდები არიან, ასე რომ ეს კლუბისთვის ინვესტიციაც არის. რაც შეეხება იაიას, გაიხსენეთ, ის ჯილდოები, რომლებიც მან "ბარსელონაში" მოიპოვა და იოლად დაასკვნით, რა გამოცდილების კაცი დაგვემატა. ასეა, თუ გვინდა პრემიერლიგის საუკეთესო გუნდებთან სხვაობა შევამციროთ, უნდა გავძლიერდეთ".
და კიდევ ერთი საკითხი: მანჩინიმ "სიტის" მთავარი გუნდის ერთ-ერთ მწვრთნელად წარსულში ცნობილი ინგლისელი ფეხბურთელი დევიდ პლატი დაასახელა.
"მე და დევიდი ორი წლის განმავლობაში ერთად ვთამაშობდით "სამპდორიაში". ის თავის დროზე ინგლისის ნაკრებს კაპიტნობდა და შემდეგ 21 წლამდელთა გუნდს წვრთნიდა. ვფიქრობ, ასეთი ადამიანი ჩვენთვის ძალიან მნიშვნელოვანი იქნება. თუ ჩვენ ახალი ეპოქის დაწყება და ტიტულების მოგება გვინდა, კლუბში ყველა პოზიცია უნდა გავაძლიეროთ".
