ბევრისთვის მოულოდნელად, მარკ ვან ბომელი "მილანს" შესანიშნავად შეეწყო და გუნდის ერთ-ერთ ლიდერად მოგვევლინა. დიახ, არ ვაჭარბებთ, რადგან ჰოლანდიელმა ფაქტობრივად ანდრეა პირლოს ფუნქციები იტვირთა და ეს საქმე შესანიშნავად გამოსდის.
მართალია, პირლოს დარი მოედნის ხედვა არ აქვს და პასებსაც ისეთს ვერ აკეთებს, მაგრამ ყველაფერ ამის გარეშეც ახერხებს, რომ გუნდის თამაშს დირიჟორობა გაუწიოს.
თუ დააკვირდებით, მთელი შეხვედრის განმავლობაში კარნახობს თანაგუნდელებს, ვინ სად უნდა იდგეს და რა მომენტში, რა გააკეთოს - მოკლედ, ვან ბომელი "როსონერიში" ისე გრძნობს თავს, როგორც თევზი წყალში და ამის შესახებ
"დიდი სურვილი მაქვს, რომ კარიერა ჩემ საყვარელ გუნდში, პსვ-ში დავასრულო, მაგრამ ჯერჯერობით ჰოლანდიაში დაბრუნებაზე ნამდვილად არ ვფიქრობ. მართალია, უკვე 34 წლის ვარ, მაგრამ თავს შესანიშნავად ვგრძნობ და ვფიქრობ, რომ კიდევ სამი-ოთხი წელი შემიძლია უმაღლეს დონეზე თამაში. შესაბამისად, ძალიან მინდა, რომ "მილანთან" ხელშეკრულება გავახანგრძლივო.
"როსონერიში" საოცრად კარგად ვარ და სწორედ ამის დამსახურებაა, რომ ვარჯიშებზეც კი უდიდესი ენთუზიაზმით მივდივარ. ჩემს ხელშეკრულებას ვადა ივნისში გადის და უახლოეს დღეებში ადრიანო გალიანისთან ვაპირებ დალაპარაკებას - მსურს გავიგო რას მიპირებენ და დიდი იმედი მაქვს, რომ კონტრაქტის მინიმუმ ერთი წლით გახანგრძლივებას შემომთავაზებს. მოკლედ, ყველაფერი უახლოეს მომავალში გაირკვევა".
რობინიო დაშავდა
მიმდინარე სეზონში, "მილანის" მთავარი პრობლემა ტრავმირებულ ფეხბურთელთა სიმრავლეა და ამ პრობლემას არა და არ დაადგა საშველი. "გაძეტა დელო სპორტის" მიერ გავრცელებული ინფორმაციის თანახმად, გუნდის ბოლო ვარჯიშზე რობინიომ ტრავმა მიიღო და წვრთნის ჩამთავრება ვერ მოახერხა.
პირველადი დასკვნით ტრავმა მსუბუქი უნდა იყოს, მაგრამ გადაჭრით რაიმეს მტკიცება ჯერ მაინც რთულია. ყველაფერი დეტალური გამოკვლევის შემდეგ გაირკვევა, ერთი კი აქედანვე ცხადია, ბრაზილიელი ფორვარდი სერია A-ს მომდევნო ტურის პაექრობას გამოტოვებს, რომელიც "მილანმა" "პარმასთან" უნდა გამართოს "ენიო ტარდინიზე".
მასიმილიანო ალეგრი საგონებელშია და თუ არ გჯერათ, მოუსმინეთ მას: "შეტევის ხაზში სერიოზული პრობლემების წინაშე აღმოვჩნდით, რადგან თავდამსხმელთა აბსოლუტური უმეტესობა ტრავმირებული გვყავს. ანტონიო კასანოს შესახებ ყველაფერი კარგად ვიცით, მაქსი ლოპესი და ალეშანდრე პატო ისევ ლაზარეთში არიან, მათ რიცხვს კი რიბინიოც შეუერთდა. ანუ, გამოდის, რომ "პარმასთან" პაექრობაში ზლატან იბრაჰიმოვიჩისა და სტეფან ელ შაარავის ტანდემით უნდა გავიდეთ ფონს. შესაძლოა, ერთი ფორვარდითაც ვითამაშოთ, ამას მატჩის წინა დღეს გადავწყვეტ".
ალეგრი: სკუდეტომდე შორია
მას შემდეგ, რაც სერია A-ს სატურნირო ცხრილში "მილანსა" და "იუვენტუსს" შორის სხვაობა ოთხ ქულამდე გაიზარდა, ბევრი ალაპარაკდა იმის შესახებ, რომ ლომბარდიულმა გრანდმა ფაქტობრივად გაინაღდა სკუდეტო.
ჩემპიონატის დასრულებამდე მთელი თერთმეტი ტურია დარჩენილი და ასეთ ხმამაღალ განცხადებას რთულია დაეთანხმო, თუმცა "როსონერიმ" რომ დიდი ნაბიჯი გადადგა სკუდეტოსკენ, ეს ცხადზე ხადია. აქ არა იმდენად ქულებზე, არამედ კალენდარზეა ლაპარაკი, რომელიც "იუვენტუს" ურთულეს ბატალიებს ჰპირდება, "მილანს" კი შედარებით იოლს და უეკლო გზას. მასიმილიანო ალეგრის კი მიაჩნია, რომ ასეთი თამამი პროგნოზების სრულიად უადგილოა - ბოლოს, კიდევ ერთხელ გადავცეთ სიტყვა "მილანის" თავკაცს:
"ჩემპიონატის დასრულებამდე თერთმეტი ტურია დარჩენილი, უახლოეს მდევარს კი მხოლოდ ოთხი ქულით ვუსწრებთ, რომელ სკუდეტოზეა ლაპარაკი? - ჩვენ კონკრეტულ მატჩებზე უნდა მოვახდინოთ კონცენტრირება და დანარჩენი უკვე მაისში გამოჩნდება.
კალენდარზე ლაპარაკიც აბსოლუტური სისულელეა, რადგან სერია A-ში იოლად ქულებს არავინ თმობს. მთავარი ბრძოლები წინ გველის და რაც დრო გავა, თითოეულ ქულას კიდევ უფრო მეტი ფასი დაედება. ჩემი პირადი აზრით, სკუდეტოსთვის ბრძოლა ბოლო ტურებამდე გაგრძელდება".
ყოველდღიური სპორტული გაზეთი "ლელო"
