"იუვენტუსი" იტალიის ჩემპიონია, მთავარი ამოცანა უკვე შესრულებულია და რა გასაკვირია, რომ ტურინში უკვე საზაფხულო ტრანსფერებსა და სამომავლო გეგმებზე ფიქრობენ. მართალია, "ვეკია სენიორას" წინ იტალიის თასის ფინალი ელის, მაგრამ ამ შეხვედრაზე მეტად ბევრს კონკრეტული სატრანსფერო ცნობები აინტერესებს.
სწორედ ამად იყო, რომ "კორიერე დელო სპორტის" ჟურნალისტი კლუბის სპორტულ დირექტორს, ჯუზეპე მაროტას შეეხმიანა და მას სწორედ საზაფხულო გეგმებზე ჩამოუგდო სიტყვა. გასაგებ მიზეზთა გამო მაროტა შესანიშნავ ხასიათზეა და ჟურნალისტისთვის უარი არ უთქვამს - საუბარი კი მართლაც საინტერესო გამოვიდა და კონკრეტულ ფეხბურთელებს შეეხო. მოვუსმინოთ სენიორ
მარკო ბორიელო
მარკოს თავიდან გაუჭირდა, თუმცა დროთა განმავლობაში გაიხსნა და ჩემპიონატის ფინიშზე დიდი დახმარება გაგვიწია.
თანაც, ანტონიო კონტე მისი თამაშის სტილით აღფრთოვანებულია და ბოლომდე ენდობა. ამიტომ მის გამოსყიდვას ვაპირებთ და "რომას" მესვეურებთან მოლაპარაკებებში ვართ ჩაბმულნი. დრო 22 ივნისამდე გვაქვს და არა მგონია, რომ შეთანხმებას ვერ მივაღწიოთ. ფაქტია, რომ ბორიელო რომაელთა გეგმებში არ ჯდება, რაც ჩვენს წისქვილზე ასხამს წყალს.
ელჯერო ელია
მიმდინარე სეზონი მისთვის ადაპტაციის გამოდგა და მჯერა, რომ მომავალში შესაძლებლობებს სრულად წარმოაჩენს.
ელჯერომ ნათლად დაინახა, რომ სერია A ბუნდესლიგისგან რადიკალურად განსხვავდება - აქ სხვა კომპონენტებზე უნდა იმუშაოს და ვიცი, რომ თავს არ ზოგავს. ელიასთან განშორება ჩვენს გეგმებში არ შედის და იმედია, არც მას სურს წასვლა.
ალესანდრო დელ პიერო
მოდი, ამ საკითხზე იტალიის თასის ფინალის შემდეგ ვისაუბროთ. ეს ის თემაა, რომელიც ჩემს კომპეტენციაში არ შედის და რომელსაც მე ყველაზე ნაკლებად ვწყვეტ.
დელ პიეროს მომავალთან დაკავშირებით, შეხვედრები თავად ფეხბურთელს და პრეზიდენტს შორის მიმდინარეობს. ამ პროცესში ანტონიო კონტეც ჩართულია და შეგიძლიათ მასაც შეეხმიანოთ. ასე რომ, მე საინტერესოს ვერაფერს გეტყვით.
მილოშ კრასიჩი
ერთი ხანობა, მილოში გუნდის ლიდერი იყო, მიმდინარე სეზონში კი თითქმის არ უწევს თამაში, რაც ძალიან საწყენია.
ვერ გეტყვით, რატომ ხდება ასე, მაგრამ ფაქტია, რომ კონტეს გეგმებში კრასიჩი ნაკლებად შედის. ამიტომ მის ტრანსფერზე მოგვიწევს მუშაობა და იმედია, ყველა მხარისთვის სასურველ შეთანხმებას მივაღწევთ.
რობინ ვან პერსი
მისი თამაშით აღფრთოვანებული ვარ და მიმაჩნია, რომ მსოფლიოს საუკეთესო ფორვარდთა ხუთეულში შედის.
უდიდესი სურვილი მაქვს, რომ "იუვენტუსში" ვიხილო, მაგრამ ჯერჯერობით ეს მხოლოდ სურვილია.
ლონდონელებთან ვაპირებთ მოლაპარაკების წამოწყებას და ვნახოთ, რა გამოვა... ვიცი, რომ რობინს "არსენალთან" ხელშეკრულებით კიდევ ერთი წელი აკავშირებს, რაც ნამდვილად გვირთულებს ამოცანას.
ვან პერსი იმ მასშტაბის ფეხბურთელია, რომლის ფასიც, სავარაუდოდ, ასტრონომიული იქნება. ამიტომ დღეს რაიმე დაპირების გაკეთება ჩემი მხრიდან უადგილო იქნება.
ალესანდრო ნესტა
ნესტამ თავად განაცხადა, რომ ერთადერთი გუნდი იტალიაში, სადაც შეიძლება გადაბარგდეს, "ლაციოა". ამ ყველაფრის შემდეგ გამიჭირდება, რომ მის ტრანსფერთან დაკავშირებით ოპტიმისტურად განვეწყო. ისე კი, ვადასტურებ, რომ ალესანდროს გადაბირება გვსურს და მასთან კონტაქტზეც არაერთხელ გავედით.
ამ საქმეში ანდრეა პირლოც იყო ჩართული, რომელიც ნესტას ახლო მეგობარია. ჩვენი წინადადება ძალაში რჩება, სანდროსთვის კარი ღიაა. დანარჩენი კი თავად ფეხბურთელმა უნდა გადაწყვიტოს.
ყოველდღიური სპორტული გაზეთი "ლელო"
