ფიფას წესების კომისიამ გადაწყვიტა, რომ თამაშების მიმდინარეობისას მწვრთნელებს თანამედროვე ტექნოლოგიების გამოყენება აუკრძალოს. კონკრეტულად ლაპარაკია "აიპოდსა" და "აიფოუნზე". ასოციაციაში ფიქრობენ, რომ აღნიშნული ტექნიკის დახმარებით მწვრთნელებს შეუძლიათ განმეორებით მომენტების ნახვა, თანაც შენელებული კადრით, რაც ხშირად მსაჯებისადმი მათი უკმაყოფილების დამატებითი საფუძველი ხდება. ტექნიკის დახმარებით შესაძლებელი ხდება ისეთ პირებთან მუდმივი კონტაქტიც, რომელთაც სათადარიგოთა სკამზე ყოფნის უფლება არ აქვთ. ჯგუფს სათავეში ფრანც ბეკენბაუერი უდგას. "შეუძლებელია ფიფამ დაუშვას თანამედროვე ტექნოლოგიების გამოყენება მატჩების დროს. ასეთ მოვლენებთან ბრძოლაა საჭირო," - აცხადებს ამ ჯგუფის ერთ-ერთი წევრი, იტალიის ნაკრებისა და
პირველი რეაქცია აღნიშნულ ინიციატივაზე საკმაოდ მშვიდი იყო. "რა თქმა უნდა სიამოვნებით გამოვიყენებ ნებისმიერ თანამედროვე ტექნიკას, რომელიც საქმეს გამიადვილებს, მაგრამ თუკი ფიფაში სურთ, რომ ისინი აიკრძალოს, ჩემი მხრიდან პრობლემა არ იქნება. ისედაც ტექნიკას მხოლოდ ოფიციალურ მატჩებში ვიყენებ. ამიერიდან კი ვარჯიშებზე თუღა ვისარგებლებ," - განაცხადა "რომას" ესპანელმა მთავარმა მწვრთნელმა ლუის ენრიკემ.
უნდა აღინიშნოს, რომ "აიპედით" სარგებლობის პიონერი თანამედროვე ფეხბურთში "რეალის" მთავარი მწვრთნელი ჟოზე მოურინიო იყო. რას იტყვის "განსაკუთრებული კაცი", შეიძლება მხოლოდ წარმოვიდგინოთ.
იმავე ჯგუფმა საინტერესო იდეა წამოაყენა საჯარიმო მოედანში ე.წ. "ბოლო იმედის ჯარიმასთან" დაკავშირებით. ამჟამად მოქმედი წესებით მსაჯს შეუძლია წესის დამრღვევი გუნდი პრაქტიკულად სამმაგად დასაჯოს - უჩვენოს ფეხბურთელს პირდაპირ წითელი ბარათი, რაც შემდგომში მის ავტომატურ დისკვალიფიკაციას გამოიწვევს და დანიშნოს პენალტი.
კომისიას მიაჩნია, რომ ასეთ ეპიზოდებში ყვითელი ბარათი და თერთმეტმეტრიანი სავსებით საკმარისი უნდა იყოს. წითელის ჩვენების უფლება კი არბიტრს წესის დამრღვევის მხრიდან განსაკუთრებული უხეშობის შემთხვევაში შეიძლება დარჩეს. კომისიამ განიხილა კონკრეტული შემთხვევა, როცა მსაჯის გადაწყვეტილებამ მატჩის ბედზე განსაკუთრებული გავლენა მოახდინა.
2010 წლის მსოფლიოს ჩემპიონატზე ურუგვაი-სამხრეთი აფრიკის შეხვედრის 76-ე წუთზე მეკარე იტუმელენგ ხუნემ ლუის სუარესთან ბრძოლაში წესები უმნიშვნელოდ დაარღვია, თუმცა მსაჯმა მასიმო ბუზაკამ გოლკიპერს პირდაპირ წითელი აუფრიალა. შედეგად კი ის მოხდა, რომ სამხრეთამერიკელებმა გადამწყვეტი უპირატესობა მოიპოვეს და პენალტის გარდა მატჩის ბოლო წამებზე მასპინძლებს კიდევ ერთი გოლი გაუტანეს.
"პენალტი საკმარისი სასჯელია ისეთი უმნიშვნელო დარღვევის გამო, რაც ბურთისთვის ბრძოლას მოჰყვება ხოლმე. განხილულ შემთხევვაში უხეშობა ზღვარს გადასული რომ ყოფილიყო, ბუზაკას გადაწყვეტილება გამართლებული იქნებოდა. ზედმეტი უხეშობის გამო კი ფეხბურთელს მინდვრიდან აძევებენ, სადაც არ უნდა ჩაიდინოს მან მსგავსი საქციელი," - განაცხადა კომისიის ხელმძღვანელმა ფრანც ბეკენბაუერმა. გარდა ამისა, "კაიზერმა" მოუწოდა არბიტრებს თავი შეიკავონ ბარათების ზედმეტად ფრიალისგან.
მისი აზრით, აუცილებლად უნდა ჩაიდოს წესებში, რომ საჯარიმოში პენალტი დაინიშნოს მხოლოდ გამიზნულად ხელით თამაშისთვის და არა ბურთის ხელზე ყოველი შეხების გამო. კომისია ამზადებს ცვლილებას ასევე თამაშგარე მდგომარეობის დეფინიციის გასამარტივებლად. საფეხბურთო წესებში შესატანი ცვლილებების პროექტს კომისია ფიფას აღმასრულებელ კომიტეტს 2012 წლის მარტში წარუდგენს.
ყოველდღიური სპორტული გაზეთი "ლელო"
