კიევის "დინამოს" 36 წლის გოლკიპერმა ალექსანდრ შოვკოვსკიმ 5 დეკემბერს უკრაინის ჩემპიონატის მე-19 ტურში დონეცკის "მეტალურგის" წინააღმდეგ თამაში გამოტოვა. მას მეორე დღესვე დაუკავშირდნენ ჟურნალისტები და უთამაშებლობის მიზეზები გამოჰკითხეს. აი, რას აცხადებს ფეხბურთელი:
"მეტალურგთან" თამაშის დაწყებამდე წვივების ტკივილმა შემაწუხა. გამოკვლევამ ცხადყო, რომ წლის ბოლომდე დარჩენილ ორ შეხვედრაში "კარპატისა" და "მაკაბის" წინააღმდეგ თამაშს ვეღარ შევძლებ". ვეტერანის მინდორზე დაბრუნების თარიღზე უკრაინული პრესა ჯერჯერობით არაფერს იუწყება.
დონეცკურ კლუბთან მატჩამდე ჯანმრთელობამ შეაწუხა "დინამოს" კიდევ ერთი დამსახურებული ვეტერანი ანდრეი შევჩენკოც.
35 წლის თავდამსხმელს მარცხენა მუხლი სერიოზულად ასტკივდა.
"დინამოს" ვებგვერდის ინფორმაციით, შოვკოვსკიცა და შევჩენკოც ინდივიდუალური, შემსუბუქებული პროგრამით ვარჯიშობენ.
ყოველდღიური სპორტული გაზეთი "ლელო"
