ფიფას პრეზიდენტი ზეპ ბლატერი კმაყოფილია იმით, რომ "ბარსელონას" პრეზიდენტი სანდრო როსელი ელიტურ ლიგებში გუნდების შემცირების აუცილებლობაზე ალაპარაკდა. კატალონიელი ფუნქციონერის თქმით, უკეთესი იქნება, თუკი ლა ლიგაში გუნდების რაოდენობა 16-მდე შემცირდება. "როსელს პირადად მივულოცავ ამ იდეის მოფიქრებას, როცა იაპონიაში საკლუბო ჩემპიონატის მიმდინარეობისას შევხვდები. მის იდეას 100%-ით ვიზიარებ. ამაზე ლაპარაკი ფიფაში 15 წლის წინ დავიწყეთ, მაგრამ ნაციონალურმა ფედერაციებმა მხარი არ აგვიბეს. მოხარული ვარ, რომ ისეთი დიდი კლუბის პრეზიდენტმა, როგორიც "ბარსელონაა", მსგავსი იდეა წამოაყენა," – განაცხადა ბლატერმა.
ადრიანო კიდევ ერთი წლით
ბრაზილიის 2011 წლის
ჩინური პერსპექტივა
ჩინეთის ჩემპიონატს უახლოეს ხანებში შეიძლება ორმა ვარსკვლავმა მიაშუროს. "ჩელსის" 32 წლის ფრანგი თავდამსხმელი ნიკოლა ანელკა რომ "არისტოკრატთა" მიტოვებას აპირებს, რა ხანია ყველამ იცის. ანდრე ვილაშ-ბოაში დენიელ სტარიჯის გუნდში დაბრუნების შემდეგ (იჯარით ის "ბოლტონში" თამაშობდა) ნიკოლას საერთოდ აღარ ათამაშებს. ასეთმა დამოკიდებულებამ კი ფრანგი ვარსკვლავი გააღიზიანა.
როგორც "ფრანს ფუტბოლი" წერს, ანელკა იანვარში სათამაშოდ "შანხაი შენხუაში" გადავა. ინფორმაციას ადასტურებს ჩინური კლუბის პრესსამსახურის ხელმძღვანელი მა იუეც. პრეზიდენტ ჟუ ჩჟუნის თქმით კი მხარეებმა უკვე შეათანხმეს სამწლიანი კონტრაქტი, რომელსაც ხელი მალე მოეწერება.
ჩინეთშივე განაგრძობს კარიერას "რეალისა" და "ბეშიქთაშის" ყოფილი ვარსკვლავი ხოსე მარი გუტიერესიც, ვინც ერთი კვირის წინ კარიერის დასრულების შესახებ განაცხადა, მაგრამ მალევე გადაიფიქრა. "ჩინეთიდან შემოთავაზებები ნამდვილად მაქვს და ალბათ მათ შემოთავაზებას დავთანხმდები კიდეც," – ამბობს 35 წლის ესპანელი.
კეჟმანი მიდის
მატეა კეჟმანი ფეხბურთის თამაშს როცა იწყებდა, მას ლეგენდარული თანამემამულის პრედრაგ მიატოვიჩის მომავალს უწინასწარმეტყველებდნენ. 19 წლისამ მან ბელგრადის "პარტიზანის" რიგებში ჩემპიონთა ლიგაში გამოიჩინა თავი. 2000 წელს კი "ეინდჰოვენს" მიაშურა, სადაც მისი ვარსკვლავი კიდევ უფრო აკიაფდა. ერედივიზიეს 122 შეხვედრაში მან 105 გოლი გაიტანა.
კეჟმანის უიღბლობა "ჩელსიში" ტრანსფერით დაიწყო. სერბი ვერაფრით შეეგუა პრემიერლიგას და ლამის ყველაფერზე აიცრუა გული.
"ჩელსის" "ატლეტიკოში", "ფენერბაჰჩეში", "პარი სენ-ჟერმენში", "ზენიტსა" და ჩინურ "საუთ ჩაინაში" ტრანსფერები მოჰყვა. მატეას კარიერა
აღარ აეწყო.
32 წლის ფეხბურთელი ამჟამად ბორისოვოს ბატე-ში ირიცხება, თუმცა ვერც აქ ხვდება ძირითად შემადგენლობაში. მოლდოველთა მთავარი მწვრთნელის ვიქტორ გონჩარენკოს თქმით, მატეა სერიოზულად ფიქრობს ფეხბურთიდან წასვლაზე. თავად კეჟმანს აღნიშნულ ინფორმაციაზე ჯერ კომენტარი არ გაუკეთებია.
პოლონეთი-პორტუგალია თებერვალში
ამ დღეებში პოლონეთისა და პორტუგალიის ფეხბურთის ფედერაციებმა საბოლოოდ მიაღწიეს შეთანხმებას, რომ 29 თებერვალს ამ ქვეყნის ნაკრებები ერთმანეთს ამხანაგურად გაეჯიბრებიან. მატჩი ვარშავის ნაციონალურ სტადიონზე შედგება. თამაში ახლადგახსნილ 58 ათასიან არენაზე პირველი იქნება. პოლონელებს ახალი სტადიონის მშენებლობა 500 მილიონი ევრო დაუჯდათ.
ყოველდღიური სპორტული გაზეთი "ლელო"
