ექვსი კილო ჰეროინი და აძურის ჯალათი

იტალიის ნაკრების ფანებს მივმართავთ: გახსოვთ მსოფლიოს 2002 წლის ჩემპიონატი? გახსოვთ ამ ტურნირზე თქვენი სათაყვანებელი გუნდის მერვედფინალური მატჩი? გახსოვთ, როგორ უნამუსოდ გაუუქმა ეკვადორელმა რეფერიმ ბირონ მორენომ დამიანო ტომაზის ალალად გატანილი გოლი? გახსოვთ, როგორ დაადანაშაულა სიმულაციაში და მინდვრიდან მიაბრძანა თქვენი კერპი და ზოგადად მართლაც სიმულანტი ფრანჩესკო ტოტი, რომელიც სამხრეთ კორეასთან მართლაც წააქციეს? ჰოდა, რასაც ქვემოთ გიამბობთ, მართალია 8-წლიანი დაგვიანებით, მაგრამ გულებს მაინც დაგიამებთ.

21 სექტემბრის გამთენიისას, ნიუ იორკის ჯონ ფიცჯერალდ კენედის სახელობის აეროპორტის უსაფრთხოების სამსახურის თანამშრომლებმა 40 წლის ბირონ ალდემარ მორენო რუალესი დააკავეს. როგორც მიხვდით, ეს სწორედ ის ეკვადორელია, რომელიც ოდესღაც საფეხბურთო არბიტრი იყო. თქვენ წარმოიდგინეთ და, სამხრეთ კორეა-იაპონიაში გამართული მუნდიალის მერე მორენომ სულ ერთი წელი იმუშავა საფეხბურთო არბიტრად, ვიდრე ეკვადორის საფეხბურთო ხელისუფლება არაკვალიფიციურობისთვის სამუდამო დისკვალიფიკაციით არ დასჯიდა.

როგორც საბაჟო ხელისუფლების მიერ ბრუკლინის სასამართლოში გადაცემული საბუთებიდან გამომდინარეობს, აეროპორტში ბარგის ჩხრეკისას ეკვადორელი მამაკაცი "შესამჩნევად ღელავდა", რამაც მებაჟეთა ყურადღება მიიპყრო. შედეგად, საბაჟო სამსახურის თანამშრომლებმა ბირონ მორენო სპეციალურ ოთახში გაიყვანეს და სამოსის გახდა აიძულეს, მაგრამ რაც აღმოაჩინეს, ამ მრავლისმნახველი ადამიანების ფანტაზიასაც აღემატებოდა. მორენოს ტანზე და ფეხებზე დამაგრებული ჰქონდა ცელოფნის პაკეტებში დაფასოებული 6 (!!!) კილოგრამი ჰეროინი.

კონტრაბანდისტული თავხედობის მასშტაბით გაოგნებულმა მებაჟეებმა მორენოს ნარკოტიკების კონტრაბანდაში ოფიციალური ბრალდება წაუყენეს და ციხის გზასაც გაუყენეს, ხოლო ბრუკლინის მოსამართლემ ზედ თავდებად გათავისუფლების ნებაც ჩამოართვა. პროგნოზი? ძნელი განსასჭვრეტია, მაგრამ იმას კი წყალი არ გაუვა, რომ მორენოს მრავალი წლის გატარება მოუწევს ვირის აბანოში.