საქართველოს ახალგაზრდულ ნაკრებს სპეციალისტები A ქვეჯგუფის ფავორიტებს მიაკუთვნებენ. ასეთი სტატუსის გამართლება იოლი ნამდვილად არ არის, რადგან მეორე ეტაპზე თითო ჯგუფის ექვსი გუნდიდან საუკეთესო ორი გადის. ქართველ 20-წლამდელებს სერიოზული გუნდების წინააღმდეგ უწევთ თამაში - პოლონეთის, მაკედონიის, ესტონეთის, შვეიცარიის (თუ ნებას მოგვცემთ, რუმინეთს პირველი დღის შემდეგ კონკურენტად არ ჩავთვლით). ვიდრე ჩვენი ახალგაზრდები ევროპის ჩემპიონატის შესარჩევ ტურნირში (B დივიზიონი) ჩაერთვებოდნენ, პოლონეთმა მაკედონიას მხოლოდ სამი ქულის სხვაობით მოუგო, ხოლო ესტონეთმა რუმინეთი დაარბია...
***
საინტერესო იყო შვეიცარიის ძალის განსაზღვრა. ეს საქმე პირველივე ტურში ქართველებს დაეკისრათ.
იყო ეპიზოდები, როცა ხან სანაძის, ხან ჩიკვილაძის, ხანაც შენგელიას მიერ ზედიზედ ჩაგდებული რამდენიმე უპასუხო ქულის შედეგად 9-10 ქულით დავწინაურდით, მესამე პერიოდში სულაც 49:37-ს ვიგებდით, მაგრამ "წითლებმა" დუბასის, ფონგეს და სტევანოვიჩის გააქტიურების შედეგად 9:0 გაქცევა მოაწყვეს.
მატჩის დასრულებამდე 6:40 წუთით ადრე ბურხალტერმა სამქულიანი გამოიყენა და შვეიცარია პირველად დაწინაურდა (62:61), ამას მოჰყვა დუბასის ზუსტი შორეული ტყორცნა და - 65:63. მალე შვეიცარიელთა ბომბარდირის დუბასისა (14 ქულა) და ქართველთა ლიდერის თორნიკე შენგელიას დუელი ჩვენიანის გამარჯვებით დასრულდა: მეტოქემ თორნიკესთან ორთაბრძოლაში მეხუთე ჯარიმა მიიღო და მოედანი სირენამდე 5:03 წუთით ადრე დატოვა. შენგელიამ ორი საჯარიმო გამოიყენა, თანაგუნდელები 68:67 დააწინაურა და მას მერე შვეიცარია წინ აღარ გასულა.
მატჩის დასრულებამდე 2:06 წუთით ადრე ტაბლოზე 73:73 ეწერა. მას მერე ჯერ შენგელიამ ჩააგდო ორქულიანი, შემდეგ ბაქრაძემ, დვალიშვილმა და ერთწუთიან მონაკვეთში 6:0 გაქცევამ ქართველებს პირველი მატჩი მოაგებინა.
***
დავით უსტიაშვილის გუნდმა შვეიცარიელებს რეალიზებულ ორქულიანებშიც აჯობა (25:20), საჯარიმოებშიც (23:10)... ჩვენი მეტოქე კი ძირითადად სამქულიანებით ცდილობდა დანაკლისის ანაზღაურებას - 8 შორეული ტყორცნა გამოიყენა, მაშინ, როცა ქართველებმა 3 სამიანი ჩააგდეს. მართალია, მოხსნების საერთო რაოდენობაში დიდი სხვაობა არ დაფიქსირებულა, მაგრამ ჩვენი მწვრთნელის წიგნაკში, ალბათ, წითელი ხაზით მოინიშნება ქართველთა ფარზე შვეიცარიელების 17 მოხსნა, მაშინ, როცა "კერკეტმა კაკლებმა" საკუთარზე უფრო ნაკლები მოხსნეს - 15. ასევე წითელი კალმით, ოღონდ დადებითი კუთხით უნდა აღინიშნოს შენგელიას მიერ ჩაგდებული 31 ქულა.
***
დღეს,15 ივლისს საქართველოს ახალგაზრდულ ნაკრებს უფრო მძიმე ბრძოლა ელის - ერთ-ერთ უშუალო კონკურენტ მაკედონიას ეთამაშება.
ყოველდღიური სპორტული გაზეთი "ლელო"
