დაძაბულ, დრამატულ, უაღრესად პრინციპულ მატჩში საქართველომ მასპინძელი მაკედონია დაამარცხა. გია კაზანჯიანის გაწვრთნილმა 16-წლამდელთა ნაკრებმა მაკედონიაში მიმდინარე ევროჩემპიონატის B დივიზიონის ჯგუფურ ეტაპზე მეორე გამარჯვება მოიპოვა და მომდევნო ეტაპზე გასვლის საკმაოდ კარგ შანსს ინარჩუნებს. 2 გამარჯვებითა და 1 მარცხით ქართველები მეორე ადგილზე არიან და თუკი ხვალ რუმინეთს მოუგებენ, მეორე ჯგუფურ ეტაპზე გავლენ. რაც შეეხება მაკედონიასთან გამარჯვებას, მართლაც რომ შთამბეჭდავი იყო. ქართველები თითქმის მთელი თამაშის მანძილზე იგებდნენ, თუმცა ბოლო მეოთხედში მასპინძლებმა იძალეს, თამაში გაათანაბრეს და დაწინაურდნენ კიდეც. ძირითადი დროის დასრულებამდე 2 ქუთით ადრე
დამატებუთი დროც ქულა–ქულაში წარიმართა. ძირითადად ქართველები ლიდერობდნენ 2–3 ქულით. დამატებითი დროის დასრულებამდე 1,18 წუთით ადრე ნიკა ცქიტიშვილის სროლის შემდეგ საქართველო 68:63 დაწინაურდა და თითქოს ყველაფერიც აქ გადაწყდა, თუმცა...
მაკედონიელმა კრასტევსკიმ 2 საჯარიმოთი ანგარიში 3 ქულამდე შეამცირა. შემდეგ მასპინძლებმა ტაქტიკური ჯარიმა მიიღეს და ზეზვა ლილუაშვილმა მხოლოდ ერთი საჯარიმო ჩააგდო – 69:65 დასრულებამდე 13 წამით ადრე. სიმეონ მიტრევმა საპასუხო შეტევაში სამქულიანი გაისროლა და მასპინძლებმა ჩამორჩენა მინიმუმამდე შეამცირეს – 68:69 დასრულებამდე 6 წამით ადრე. ისევ ტაქტიკური ჯარიმა და ზეზვა ლილუაშვილმა ისევ მხოლოდ 1 საჯარიმო ჩააგდო – 70:68. მაკედონიას თამაშის გადასარჩენად 5 წამი დარჩა და შეეძლო კიდეც მატჩის მეორე ოვერტაიმში გადაყვანა, მაგრამ... გამრეკლიძე დაჯარიმდა, საფინალო სირენამდე 2 წამით ადრე სიმეონ მიტროვი საჯარიმოს ხაზზე დადგა. პირველი ჩააგდო, მეორე კი ააცილა და ყველაფერიც აქ დამთავრდა. საქართველომ უმნიშვნელოვანესი გამარჯვება მოიპოვა.
17 ქულით ყველაზე შედეგიანი ნუგზარ აბულაძე გახლდათ, რომელმაც, აგრეთვე, 6 მოხსნა და 4 შედეგიანი გადაცემა განახორციელა. ალექსანდრე ბოლქვაძის ანგარიშზე 14 ქულა, 5 მოხსნა და 3 პასია, ჩვენ მიერ უკვე ნახსენებმა ლილუაშვილის აქტივი 13 ქულით, 2-2 მოხსნითა და პასით გამოიხატა. კარგად ითამაშა ჩვენმა მეფარემ არჩილ პულუზაშვილმა. მან 8 ქულისა და 6 მოხსნის გარდა 7-ჯერ დაუფარა მაკედონელებს.
პირველი ადგილი და მომდევნო ეტაპის საგზური ინგლისმა გაინაღდა, რომელსაც ოთხიდან 4 გამარჯვება აქვს. მეორე ადგილზე საქართველო–რუმინეთს შორის ხვალინდელ მატჩში გამარჯვებული გუნდი გავა. შეხვედრა თბილისის დროით 21 საათზე დაიწყება.
ევროპის ჩემპიონატი B დივიზიონი. შტრუმიცე. მაკედონია. 31 ივლისი
საქართველო 70:69 მაკედონია
19:16 14:13 12:18 13:11 12:11
1. ინგლისი 4 4/0 286/225 8
2. საქართველო 3 2/1 198/205 5
3. რუმინეთი 3 1/2 184/203 4
4. ლუქსემბურგი 3 1/2 209/224 4
5. მაკედონია 3 0/3 191/211 3
მომზადებულია gbf.ge-ს მიხედვით
