18-წლამდელთა ჩემპიონატის ნახევარფინალური განმეორებითი მატჩი შედგა აკადემიის საკალათბურთო დარბაზში, სადაც ფინალური საგზურისთვის ერთმანეთს "ჰიუნდაისა" და რუსთავის გუნდები დაუპირისპირდნენ.შეხვედრა "რუსთავის" მოგებით დასრულდა, რომელმაც მეტოქე დამაჯერებლად, 81:66 დაამარცხა, სერიაში 2:0 იმარჯვა და ფინალური საგზური მოიპოვა.
რუსთაველებმა მატჩი თავიდანვე დამაჯერებლად დაიწყეს და პირველ ტაიმში სოლიდური სხვაობით, 40:26 დაწინაურდნენ. ქვემოქართლელები მესამე მეოთხედში კიდევ უფრო აქტიურად ათამაშდნენ, მეტოქეს წინ გასვლის საშუალება არ მისცეს და მოპოვებული უპირატესობა კიდევ უფრო გაიმყარეს - 67:39.
დასკვნით მეოთხედში რუსთაველები კვლავ ჩინებულად გაისარჯნენ როგორც დაცვაში, ასევე შეტევაში და სრულიად დამსახურებული
"ჰიუნდაის" შემადგენლობაში ორმაგი დუბლით, 29 ქულითა და 10 მოხსნით თავი სანდრო ბოლქვაძემ გამოიჩია, ხოლო რუსთავის რიგებში 22 ქულით საუკეთესო გიორგი დვალი იყო. ორმაგი დუბლი შეასრულა დვალის თანაგუნდელმა ლევან ურიდიამ, რომლის ანგარიშზეც 21 ქულა და 16 მოხსნაა.
მატჩის შემდეგ
ირაკლი მებურიშვილი (რუსთავის მწვრთნელი): "გავაანალიზეთ წინა თამაშის შეცდომები და დღევანდელ მატჩში ჩვენი ხარვეზები გამოვასწორეთ. სასურველ შედეგს დაცვაში და თავდასხმაში მეტად მობილიზებული და თავდაჯერებული თამაშის ხარჯზე მივაღწიეთ, რისთვისაც მინდა დიდი მადლობა გადავუხადო ჩვენს ბიჭებს.
დიდი გავლენა ჰქონდა გიორგი დვალისა და ერეკლე ლორთქიფანიძის შორეულ ტყორცნებსაც. "რუსთავი", ძირითადად, 1995 წელს დაბადებული ბავშვებითაა დაკომპლექტებული, თუმცა ჩვენმა ბიჭებმა ძალიან იყოჩაღეს და ფინალამდე მივიდნენ, მაგრამ ეს არ არის ჩვენი მაქსიმუმი. ფინალი ძალიან დაძაბული და რთული იქნება, მაგრამ ჩვენი გუნდი ბოლომდე იბრძოლებს.
რაც შეეხება წლევანდელ სეზონს, მას ძალიან დადებითად შევაფასებდი, მაგრამ მიმაჩნია, რომ მეოთხედფინალი არ უნდა გრძელდებოდეს ერთ მოგებამდე. ამის გამო ძალიან კარგი გუნდები დაიჩაგრნენ, რომლებმაც თავიანთი შესაძლებლობები ბოლომდე ვერ გამოავლინეს - მაგალითად, "სოხუმი" და "აკადემია". ვფიქრობ, მეოთხედფინალში გუნდებს აუცილებლად უნდა მიეცეთ შანსი და უძლიერესი გამოვლინდეს".
ნიკო ჩერქეზიშვილი (ჰიუნდაის მწვრთნელი): "ბოლო რამდენიმე მატჩში ძალიან დაუძლურებულნი ვართ და არც სათადარიგო სკამი გვიწყობს ხელს. მეტოქემ ტემპით გვაჯობა. ვერცერთხელ მოვახერხეთ მათი გასწრება. ოთხივე პერიოდში ზონური დაცვა ითამაშეს და წინა შეხვედრის მსგავსად, ვერაფერი გავაწყვეთ. სამწუხაროდ, საფინალოდ მზად არ ვიყავით.
რაც შეეხება წლევანდელ ჩემპიონატს, ვთვლი, რომ სუპერლიგის დამსახურებით, წელს გაცილებით უკეთესი გუნდები ჩამოყალიბდა, მაგრამ თუ საერთაშორისო ასპარეზზე ვერ გავედით და მასში აქტიურად არ ჩავერთეთ, ვერ შევძლებთ კალათბურთში მოწინავე ქვეყნების დაწევას.
მიმაჩნია, რომ ასაკობრივი ჩემპიონატი სუპერლიგის დონეზე უნდა იდგეს და ბავშვთა კალათბურთის განვითარებას მაქსიმალური ყურადღება მიექცეს".
www.u-18.ge
