თსუ ბათუმში ვარჯიშობს

სხვა გუნდებთან ერთად სუპერლიგის ახალი სეზონისთვის თსუ-ც ემზადება. ნუგზარ ჭეიშვილის ხელმძღვანელობით სტუდენტური გუნდი შეკრებას ბათუმში გადის. ვიდრე თსუ-ს თავკაცის ინტერვიუს შემოგთავაზებდეთ, შემადგენლობას ჩამოგითვლით: რიჩარდ მათიაშვილი, გიორგი მარხვაშვილი, გიორგი გაფრინდაშვილი, შალვა კოხრეიძე, მიხეილ ფანჩულიძე, ილია ლონდარიძე, გიორგი ყველაშვილი, დავით ხიზანიშვილი, ზურაბ მაისურაძე, ვახტანგ ჩქარეული, ზვიად დეკანოიძე, გიორგი ორმოცაძე.

- როგორც ყოველთვის, წლეულსაც ნულიდან ვიწყებთ. თუმცა, საჩუქარი არავისთვის ვიქნებით. ვისაც სურს ახლა მოგვიგოს, რადგან შემდეგ ფორმაში რომ შევალთ, ჩვენი დამარცხება რთული იქნება. საერთოდ კი, საინტერესო ჩემპიონატი გველის, კალათბურთელები კლუბებში მეტ-ნაკლებადთანაბრად გადანაწილდნენ.

-

მზადების პროცესზეც ვთქვათ.
- უნივერსიტეტის ხელმძღვანელობა კალათბურთს სერიოზულად მიუდგა. დიდ ყურადღებას გვაქცევს. ამჟამად შეკრებაზე ბათუმში ვიმყოფებით. საკალათბურთო დარბაზთან ახლოს სასტუმრო "დუტაში" ვართ დაბინავებულნი, სადაც შესანიშნავ პირობებს გვიქმნიან.

- ბათუმური შეკრება როდის დაიწყეთ და რამდენ დღეს გასტანს?
- აქ 15 სექტემბერს ჩამოვედით და 26-მდე დავრჩებით. შეკრება ნაყოფიერად მიმდინარეობს - დღეში ორჯერ ვვარჯიშობთ.

- საკონტროლო მატჩებს თუ გეგმავთ?
- ვეთამაშეთ შსს-ს, რომელიც შეკრებას აჭარაში გადის. დავმარცხდით. ამავე გუნდს პარასკევსაც გავეჯიბრებით.

- შემადგენლობაში სერიოზული ცვლილებებია...
- შარშანდელი გუნდიდან ბევრი წავიდა. შემადგენლობა შეძლებისდაგვარად სრულად შევავსეთ.

- ჩამონათვალში არ გვხვდება შიო ხეცურიანი.
- იგი ამერიკაშია, იქ მუშაობს. ასე რომ, თსუ-ში მხოლოდ კალათბურთელებს კი არა, დიპლომატებსაც ვზრდით.

- შემადგენლობაში ცვლილებები მოსალოდელი ხომ არ არის?
- სეზონს ამ გუნდით დავიწყებთ. ერთი კალათბურთელის დამატება გვსურს, მეორე ნომრის... ამ საკითხზე ჯერ კონკრეტულად ვერ ვილაპარაკებ.


ყოველდღიური სპორტული გაზეთი
"ლელო"