საკალათბურთო კლუბი "ოლიმპი" ახალი სეზონისთვის გამალებით ემზადება. აი, რას ვკითხულობთ კლუბის პრესცენტრის მიერ ბოძებულ პრესრელიზში:"ოლიმპი" 3 იანვარს ლატვიაში, ქალაქ ვალმეირაში გაემგზავრა, სადაც 9-დღიან შეკრებას გაივლის და თბილისისკენ 12 იანვარს გამოეშურება. ლატვიაშია როგორც უმაღლესი ლიგის, ასევე 20-წლამდელების გუნდიც. ისინი ლატვიის ასაკობრივი და უმაღლესი ლიგის კლუბებთან სამ-სამ თამაშს ჩაატარებენ.
"ოლიმპის" რიგებში ცვლილებაა. ძირითადი გუნდი შეკრებაზე განახლებული შემადგენლობით წავიდა. ახალი მოთამაშე სერბი ლეგიონერი მარკო დუჟკოვიჩია, რომელიც ცენტრის პოზიციაზე ითამაშებს. მისი სიმაღლე 226 სმ-ია.
გუნდის მთავარი მწვრთნელი გია კაზანჯიანი:
- ლატვიის ქალაქ ვალმეირაში
20-წლამდელებს, რომლებიც ამჟამად საქართველოს ასაკობრივ ჩემპიონატში პირველ ადგილზე იმყოფებიან, თანატოლებთან მოუწევთ თამაში. ამასთანავე, ერთთვიან შესვენებას ინტენსიურ ვარჯიშებს დაუთმობენ და მოდუნების დრო არ ექნებათ.
ნუგზარ აბულაძე:
- ლატვიაში ყველა პირობა გვექნება სათანადოდ მოსამზადებლად. ეს ჩვენთვის განსხვავებული და კარგი გამოცდილება იქნება. ვფიქრობ, ლატვიაში პირველი ლიგის გუნდებთან თამაშით მიღებული გამოცდილებით უფრო მომზადებულები ჩავებმებით ეროვნულ და ასაკობრივ ჩემპიონატებში.
* * *
"ოლიმპმა" ლატვიაში უკვე ორი მატჩი ჩაატარა. პირველი შეხვედრა - ვალმეირას პირველი დივიზიონის გუნდთან, რომელსაც სამი ლეგიონერი ჰყავდა, აქედან 2 ამერიკელი და ერთი ლიტველი. მიუხედავად ვალმეირელთა გამარჯვებისა (80:74), "ოლიმპის" მთავარი მწვრთნელი გია კაზანჯიანი შეხვედრით კმაყოფილია:
- ძირითადმა გუნდმა ლატვიის უმაღლესი ლიგის წარმომადგენელს თანაბარი კონკურენცია გაუწია. თამაში ქულა-ქულაში მიდიოდა და, საბოლოო ჯამში, კარგი სანახაობა გამოვიდა.
"ოლიმპის" ძირითად გუნდს შემდეგი მატჩი 8 იანვარს "ელგავასთან" ელის, ბოლოს კი "ვია ვალმეირა გლასს" 10 იანვარს დაუპირისპირდება.
5 იანვარს "ოლიმპის" 20-წლამდელები "ვეფ რიგის" ახალგაზრდებს დაუპირისპირდნენ. შეხვედრა ჩვენების გამარჯვებით, ანგარიშით 66:62 დასრულდა.
ყოველდღიური სპორტული გაზეთი "ლელო"
