ასპროცენტიანი ცინცაძე

საქართველოს ნაკრების გამთამაშებელმა გიორგი ცინცაძემ "ტარტუ როკში" გადასვლის წინ თქვა - ესტონეთში იმიტომ მივდივარ, რომ ძველი ფორმა დავიბრუნოო. ბალტიის ლიგაზე ჯერ მხოლოდ ორი ტურია ჩატარებული და "ტარტუს" გულშემატკივარს ძველი ცინცაძე უკვე დაუბრუნდა. ის ლატვიურ "ვალმეირასთან" მატჩში თანაგუნდელებს კარგად გაუძღვა და 86:66 მოაგებინა.
ცინცაძის მონაგარი ასეთი იყო - 23 წუთი, 14 ქულა, 1 მოხსნა, 5 პასი, 1 ჩაჭრა. გიორგიმ ასპროცენტიანი სიზუსტით ისროლა 1 ორქულიანი, 2 სამიანი და 6 საჯარიმოდან ერთიც არ აუცილებია. მარგი ქმედების კოეფიციენტის მიხედვით ის "როკში" მეორე იყო (18), მხოლოდ ვაალო აალინგუს ჩამორჩა (21).
ცინცაძემ მატჩი სასტარტო ხუთეულში დაიწყო, პირველ 5 წუთში 1 სამქულიანი და 2 საჯარიმო ჩააგდო, ზედაც ორი პასი, ერთი ჩაჭრა მიაყოლა და 15:8... საწყისი პერიოდი ესტონელებმა 19:13 მოიგეს.
პირველ ტაიმში მასპინძლებმა ყველაზე დიდ უპირატესობას ცინცაძის საჯარიმოების შემდეგ მე-19 წუთზე მიაღწიეს - 40:28.
დიდი შესვენების მერე ლატვიელებმა სიტუაცია გამოასწორეს და სხვაობა 4 ქულამდე შეამცირეს (49:53), თუმცა მეოთხე პერიოდის დაწყებასთან ერთად გამოცდილმა ესტონელმა იანარ ტალტსმა ორი 3-ქულიანი გამოიყენა და "ვალმეირაც" გატყდა. ცინცაძემ მეორე 3-ქულიანი სირენამდე 3:44 წუთით ადრე ჩააგდო და თანაგუნდელთა 17-ქულიანი სხვაობა დააფიქსირა (74:57), საფინალო ანგარიში უკვე მოგახსენეთ - 86:66.
ბალტიის ლიგაზე "როკისთვის" ეს პირველი გამარჯვება იყო. გემახსოვრებათ, ესტონელებმა პირველ ტურში შვედეთში "დელფინებთან" ოვერტაიმში რომ წააგეს. მესამე ტურის მატჩს "როკერები" 14 ოქტომბერს შინ ჩაატარებენ. მათი მეტოქე ლიტვის "ნევეჟისი" იქნება.