ზაზა ფაჩულიას "მილუოკიმ" NBA-ს პლეი ოფში პირველი მატჩი წააგო

ამერიკის საკალათბურთო ასოციაციაში საპლეიოფო ციებ-ცხელება დაიწყო და პირველივე დღეს საქმეში ზაზა ფაჩულიას "მილუოკი" ჩაერთო.

მილუოკელ "ხარირმებს" აღმოსავლეთ კონფერენციის მეოთხედფინალში მეტოქედ ჩიკაგოელი "ხარები" შეხვდნენ. "ხარირმებისა" და "ხარების" პირველი ჯახი ამ უკანასკნელთა გამარჯვებით ანგარიშით 103:91 დასრულდა.

შეხვედრა ჩიკაგოში გაიმართა და ცხადია, "ბულსი", რომელმაც აღმოსავლეთ კონფერენციაში მე-3 ადგილი დაიკავა, ფავორიტად მიიჩნეოდა. ამავდროულად, პლეი ოფს სხვა ჟინი ახლავს და აქ ფავორიტებიც იოლად მარცხდებიან. შესაბამისად, მილუოკელებს, რომლებმაც პირველ მატჩში ღირსეულად იბრძოლეს, ყველაფერი წინ აქვთ. სერიის მეორე მატჩი კვლავ ჩიკაგოში, 20 აპრილს გაიმართება.

რაც შეეხება ზაზა ფაჩულიას, ქართველმა ცენტრმა სასტარტო ხუთეულში ითამაშა დ მოედანზე მთლიანობაში 22 წუთი დაჰყო. ზაზამ ღირსეული მეტოქეობა გაუწია ჩიკაგოელთა ცენტრს, ფრანგ ჟოაკიმ ნოას, რომელმაც მატჩი 6 ქულით და 11 მოხსნით დაასრულა. ანალოგიური მაჩვენებლები ჰქონდა ფაჩულიას, რომელმაც 6 ქულა და 11 მოხსნა მიითვალა. ზაზამ 8-დან 3 ორქულიანი ჩააგდო, 2 საჯარიმო კი ააცილა. ზაზას 1 პასი და 1 ჩაჭრაც ჰქონდა, ბურთი კი 2-ჯერ დაკარგა.

ჩიკაგოიელებს დერიკ როუზმა ულიდერა, რომელიც ბოლო წლებში ტრავმებისგან გაიტანჯა და 2012 წლის შემდეგ საპლეიოფო მატჩში მონაწილეობა პირველად მიიღო. როუზმა შეხვედრა 23 ქულით და 7 პასით დაასრულა, ხოლო მეორე ლიდერი ჩიკაგოელებში ჯიმი ბატლერი იყო 25 ქულით.

მილუოკელთაგან საუკეთესო კრის მიდლტონი იყო 18 ქულით, 15 ქულა ერსან ილიასოვას ანგარიშზეა.

წყარო: gbf.ge