როგორ დავამარცხოთ "ბარსელონა"? რეცეპტი ბექა ბურჯანაძისგან

ესპანეთის საკალათბურთო ჩემპიონატი, ისევე როგორც საფეხბურთო "ლა ლიგა" ევროპაში გამორჩეულია. მასში ადგილის დამკვიდრება იოლი სულაც არ არის. თუმცა დღეს ეს საკითხი უკვე გადაწყვეტილი აქვთ თორნიკე შენგელიას, გიორგი შერმადინსა და ბექა ბურჯანაძეს, რომლებიც თავ-თავის გუნდებში ლიდერები არიან.

ამას წინათ ბურჯანაძისა და შერმადინის "ანდორამ" დაძაბულ ბრძოლაში დაამარცხა კატალონიური გრანდი "ბარსელონა". ეს როგორ მოახერხა, ჟურნალისტური თვალსაზრისი გაზეთ "ლელოში" უკვე შემოგთავაზეთ, აქ კი ბექა ბურჯანაძის მოსაზრებას გავეცნოთ.

მას "ანდორაში" შევეხმიანეთ, ველაპარაკეთ როგორც ესპანურ, ასევე საქართველოს ნაკრების ამბებზე.

- "ანდორაში" თავიდანვე იოლად მოიკიდე ფეხი, როგორ

ფიქრობ, რა იყო ამის მიზეზი?
- სანაკრებო მატჩების გამო გუნდს ცოტა გვიან შევუერთდით მე, გიორგი შერმადინი და ავსტრიელი ტომას შრეინერი. გუნდში მისვლის პირველივე დღიდან მწვრთნელიცა და თანაგუნდელებიც გვერდში მიდგანან, მეხმარებიან. თავი "ანდორას" დიდი ხნის წევრად მაგრძნობინეს.

არ მომერიდება, თუ ვიტყვი - ერთი ოჯახივით ვართ. არის ზოგიერთი გუნდი, ყველა მხოლოდ საკუთარ თავზე ფიქრობს, თანაგუნდელები ნაკლებად აღელვებს. ჩვენთან პირიქითაა. მოედანზე, გასახდელში, თუ დარბაზის მიღმა ერთმანეთთან თბილი ურთიერთობა გვაქვს.

- წინა სეზონში "კორუნიას" ლიდერი იყავი, ბევრი ტყორცნა გიწევდა, ამჯერად სხვა ფუნქცია გაკისრია, ახალ გუნდში შენს როლზე გკითხავ...
- "ანდორაში" ჩატარებულ პირველივე ვარჯიშზე გამოჩნდა, რას ელოდა მწვრთნელი ჩემგან, შემდეგ იყო პირველი ამხანაგური მატჩი, შემდეგ ოფიციალური შეხვედრები...

კარგად ვაცნობიერებ, რა სჭირდება მწვრთნელს ჩემგან და ვცდილობ, ზედმიწევნით შევასრულო. ნამდვილად ვერ ვიტყვი, რომ ეს ყველაფერი ძალიან იოლია. ხან ცენტრის მეურვეობა მევალება, ხოლო დაზღვევაზე თამაშისას გამთამაშებლებსაც დავდევ. მეორე, მესამე და მეოთხე ნომრებზე ლაპარაკი არც არის. მწვრთნელის მითითებით მოხსნებზე კონტროლიც მევალება, როგორც დაცვაში, ასევე შეტევაში. იერიშებზე კი ძალიან სწრაფად გადავდივართ და არც ამ კომპონენტში უნდა ჩამოვრჩე.

სხვათა შორის, "ანდორა" სტატისტიკის მიხედვით ლიგის ყველაზე სწრაფი გუნდია, ყველაზე სწრაფად ჩვენ ვუტევთ. ერთი პერიოდი სათადარიგო ცენტრი სტევიჩი ტრავმირებული იყო, მე და მძიმე ფორვარდ ნაჩო მარტინს გვიწევდა წინა ხაზში თამაში. ამ დროს კიდევ უფრო მაღალ ტემპში ვუტევდით.

- "ანდორაში" ლიგის ერთ-ერთი ყველაზე ტანმაღალი ცენტრი, გიორგი შერმადინი თამაშობს და მაინც ყველაზე სწრაფი გუნდია...
- ეს გასაკვირი ნამდვილად არ არის, შერმადინი ხომ მოძრავი ცენტრია, კარგად შეუძლია სწრაფ შეტევაში გაქცევა. სხვათა შორის, "სარაგოსასთან" მატჩის ჰაილაითებში ის ეპიზოდიც მოხვდა, შერმადინი სწრაფი გარღვევის შემდეგ იერიშს ეფექტურად რომ ასრულებს. ცხადია, იგი ისეთივე სწრაფი ვერ იქნება, როგორიც 180 სმ სიმაღლის გამთამაშებელი ენდრიუ ალბისი, მაგრამ მთავარია, რომ იცის გუნდს როგორ წაადგეს და მშვენივრად ჯდება "ანდორას" მონახაზში.

თუ პირველი შეტევა ვერ გამოვიდა, მთავარ ფიგურად შერმადინი იქცევა - ცვდილობთ მას ბურთი ფარქვეშ ჩავუგდოთ და ვიცით, თუ ხელსაყრელ პოზიციაშია აუცილებლად ჩააგდებს, ხოლო თუ პერიმეტრზე რომელიმე პარტნიორია თავისუფალი, პასს არ უგვიანებს.

სხვათა შორის, სწორედ იმიტომ, რომ წინა ხაზში საიმედო ცენტრი გვყავს, მასზე მეტოქეებს დიდი ყურადღება გადააქვთ და დანარჩენებსაც გვიადვილდება გამოთავისუფლება.

- "ბარსელონა" მაღალი კლასის კალათბურთელებით დაკომპლექტებული გუნდია, თუმცა მასთან შეხვედრა ძალიან სტაბილურად ჩაატარეთ და გაიმარჯვეთ. რა იყო მოგების მთავარი მიზეზი?
- ბოლო ორი მატჩი წაგებული გვქონდა და საშინაო შეხვედრაში გამარჯვება ძალიან გვჭირდებოდა. ამასთან გვქონდა ექსტრამოტივაცია - ვეთამაშებოდით ევროპის ერთ-ერთ საუკეთესო გუნდ "ბარსელონას". შინ, ადგილობრივი გულშემატკივრის წინაშე თამაში ნამდვილად არ გვიჭირს, 6-დან 6 საშინაო მატჩი გვაქვს მოგებული. სტუმრად კი ერთი მოვიგეთ მხოლოდ. ეს აუცილებლად უნდა გამოვასწოროთ.



სწორ, გუნდურ კალათბურთს ვთამაშობთ და დარწმუნებული ვარ, გასვლით შეხვედრებშიც გვექნება შედეგი. რაც შეეხება "ბარსასთან" მატჩს, ის სწორედ მონდომებითა და გუნდური თამაშით მოვიგეთ. განსაკუთრებით კარგი გამოვიდა ბოლო წამები...

- როცა ჯერ "ტომიჩს" მიაღებინე "ანდორასთვის" ფასეული ფოლი, შემდეგ შეტევაში ორჯერ მოხსენი და გადამწყვეტ მომენტში გამთამაშებელ რაისს არ ჩააგდებინე...
- როგორც უკვე აღვნიშნე, მწვრთნელი ჩემგან ბევრს მოითხოვს. ამ შემთხვევაში ყველაფერი კარგად გამოვიდა. სხვათა შორის, ვიდრე რაისი გადამწყვეტს ისროდა, ერთხელ სცადა, გამცდენოდა, მაგრამ მყარად დავუდექი, ფეხი დავუტოვე, ჯარიმა კი მივიღე, მაგრამ ნამდვილად არ ვნანობ. ფოლი რომ არ მიმეღო, რაისი იმდენად სწრაფია, გამცდებოდა და ჩააგდებდა. მეორე შემთხვევაში, ბოლო წუთზე უკვე აღარ უცდია სისწრაფეზე გვერდის ავლა - აიწია და სტყორცნა. ხელი საკმარისად შევუშალე, რომ ბურთი არ ჩაეგდო.

- "ბარსელონასთან" გამარჯვება როგორ აღნიშნეთ?
- ჩვეულებრივად. მართალია, ძლიერ გუნდს მოვუგეთ, ძალიან გაგვიხარდა, მაგრამ ეს პროცესია, სეზონის ნახევარიც არ გასულა, ჩვენი ამოცანაა, პლეი ოფის საგზურის მოპოვება. ხოლო იანვრის შუაში კი სატურნირო ცხრილში ზედა რვა გუნდს შორის უნდა მოვხვდეთ, სამეფო თასზე რომ ვითამაშოთ.

"ბარსასთან" მოგების შემდეგ, როგორც წესი, მთელი გუნდი ერთად წავედით სავახშმოდ.

- ქალაქი ანდორა, ალბათ გიორგი შერმადინმა გაგაცნო.
- პატარა ქვეყანა, პატარა ქალაქია. ბარსელონისნაირი არ არის, რომ დიდი დრო დაგჭირდეს შემოსავლელად და გასაცნობად. ჩამოსვლისთანავე გიორგისთან ერთად ქალაქის ცენტრში ვიყავი, ერთად ვივახშმეთ. ხშირად ვსტუმრობთ სპა-ცენტრს, რომელიც მართლაც მაღალი დონისაა. ანდორა საკურორტო ქალაქია, სუფთა ჰაერით... ზამთრის სეზონში მას სათხილამუროდ ბევრი ტურისტი სტუმრობს.

- როგორც ვიცი, თქვენ, კალათბურთელებს, თხილამურებით სრიალს გიშლიან.
- კონტრაქტში არის ერთი პუნქტი, რომლის მიხედვით გვეკრძალება თხილამურებზე დგომა, ველოსიპედითა და მოტოციკლით სიარული. ეს გასაგებიცაა, კლუბის ხელმძღვანელობა ყოველმხრივ ცდილობს, კალათბურთელები ტრავმიან სპორტს მოარიდოს.

- ანდორაში ქართველი მორაგბეებიც არიან. ერთმანეთის თამაშებზე თუ დადიხართ?
- მოთამაშეებიც არიან და გუნდის მთავარი მწვრთნელიც ქართველია. აქამდე უფრო მეტი ჩვენიანი თამაშობდა "ანდორაში", თუმცა ამ სეზონის წინ სხვაგან გადავიდნენ. კარგი ურთიერთობა გვაქვს, რაგბის ყურებაც მსიამოვნებს, თუმცა ხშირად ვერ ვახერხებთ ერთმანეთის საგულშემატკივროდ სიარულს - დროში ვერ ვემთხვევით. მორაგბეებს შუადღეს აქვთ თამაშები, მათ საყურებლად რომ წავიდეთ ჩვენს ვარჯიშსა, თუ მატჩზე დავაგვიანებთ. თუმცა ყოველთვის ასე როდია - მათი თამაშიც ნანახი მაქვს და ისინიც დადიან კალათბურთზე.

- ევროპის ჩემპიონატზე საქართველოს ნაკრების მეტოქეების ვინაობა ვიცით. რომელიმე შენი ყოფილი თანაგუნდელი, მეგობარი ხომ არ თამაშობს მეტოქე გუნდის რიგებში?
- ახლო მეგობარი არ მახსენდება. ამხანაგური ტურნირისთვის თბილისში ჩამოსვლას აპირებს ჩეხეთის ნაკრები, რომელშიც სატორანსკი, ბალვინი თამაშობენ. მათთან "სევილიაში" ვიყავი. როდესაც საკონტროლო მატჩების განრიგი გამომიგზავნეს, ჩემს ანდორელ თანაკლუბელ ჩეხ დევიდ ჟელინეკს ვკითხე თბილისში ჩამოსვლის შესახებ. მითხრა - ჯერ არ ვიცი, მოვხვდები თუ არა 12 კალათბურთელს შორისო.

ასევე ამხანაგურად ვეთამაშებით ლატვიის ნაკრებს, თუმცა არ ვიცი, ჩამოვა თუ არა "ნიუ იორკის" ფორვარდი კრისტაპს პორზინგისი, რომელთანაც "სევილიაში" გამოვდიოდი.

- ევრობასკეტზე ჩვენს ჯგუფში რთულია ფავორიტ-აუტსაიდერების გამორჩევა...
- მძიმე მატჩები გველის. თუმცა ჩვენს ნაკრებს ნამდვილად შეუძლია მაღალი დონის გუნდებთან წარმატებით თამაში, რაც არაერთხელ დაუმტკიცებია. მთავარია, ამ ზაფხულს სათანადოდ მოვემზადოთ, მთავარ მატჩებს კარგ კონდიციებში შევხვდეთ, ყველა კალათბურთელი ჯანმრთელი იყოს ევროპის ჩემპიონატისთვის...

ყოველდღიური სპორტული გაზეთი "ლელო"