ქართულმა კლუბმა ევროპის საკლუბო ტურნირების ჯგუფურ ეტაპზე ბოლოს 2002 წელს ითამაშა - თბილისის "დინამომ" ევროპის "ჩელენჯ ქაფზე" ჯგუფში აზერბაიჯანული "ნტდ დევონისა" და უკრაინული "ხიმიკის" წინააღმდეგ იასპარეზა და პლეი ოფში გავიდა, სადაც ასევე უკრაინულ "აზოვმაშთან" ორივე მატჩის ჯამში დამარცხდა... მას მერე ქართულ კლუბებს ევროთასების ჯგუფურ ეტაპზე არ უთამაშიათ. რუსთავის "ენერჯიმ" 2007 და 2008 წლებში ევროჩელენჯზე ორჯერ იასპარეზა, თუმცა ამერიკელი ლეგიონერები ოფიციალურ მატჩებამდე ერთი კვირით ადრე დაიმატა და საკვალიფიკაციო ეტაპის ბარიერი ერთხელაც ვერ დაძლია. არადა, ჯგუფში თამაში ძალიან ბევრს ნიშნავს - გუნდს
2008 წლის შემდეგ პირველად სწორედ 2011-12 წლების სეზონში გამოთქვა ორმა ქართულმა გუნდმა ევროჩელენჯზე თამაშის სურვილი: ქვეყნის ჩემპიონმა "არმიამ" და მეოთხეადგილოსანმა - "სოხუმმა". ამ შეჯიბრებაში მონაწილეობისთვის საჭირო თანხა კლუბებმა 16 ივნისამდე გადაიხადეს და მას მერე ველოდებით ტურნირში მონაწილეთა რაოდენობისა და შეჯიბრების ფორმატის გარკვევას.
ვიდრე წილისყრა კარს არ მოგვადგა ევროჩელენჯის ორგანიზატორებმა ტურნირის შესახებ სიახლეები არ გამოაქვეყნეს. სჯობს გვიან, ვიდრე არასდროსო - ნათქვამია. ასე რომ, ევროთასების წილისყრამდე ერთი დღით ადრე გაირკვა ქართული კლუბების ბედი ევროჩელენჯზე.
***
დავიწყოთ იქიდან, რომ ჩვენს გუნდებს ევროპის ტურნირებზე არცთუ მაღალი რეიტინგი აქვთ. ამის მიზეზია ევროთასებზე ქართველთა წარუმატებელი გამოსვლა.
ამიტომ, ჩვენი ქვეყნის ჩემპიონი, "არმია" რიგით მესამე ევროშეჯიბრებაში ევროჩელენჯზე დაუშვეს (ევროთასსა და ევროლიგაზე ასპარეზობის უფლებას დამსახურება უნდა). თუმცა, ისიც კარგია, რომ საქართველოს ჩემპიონი "არმია" ევროჩელენჯზე საკვალიფიკაციო ეტაპის გაუვლელად ჯგუფურ ეტაპზე იასპარეზებს.
მასთან ერთად ჯგუფურ შეჯიბრებაში მოხვდნენ: "ანტვერპენი" (ბელგია), "ოსტენდე" (ბელგია), "კერავნოსი" (კვიპროსი), "გოვერლა" (უკრაინა), "ნიჟნი ნოვგოროდი" (რუსეთი), "ხიმიკი" (უკრაინა), "ერდინე" (თურქეთი), "გოტინგენი" (გერმანია), "პო ორტეზი" (საფრანგეთი), "ნიტრა" (სლოვაკეთი), "ტელეკომი" (გერმანია), "პარდუბიცე" (ჩეხეთი), "ტურკ ტელეკომი" (თურქეთი), "რუანი" (საფრანგეთი), "კლუჟი" (რუმინეთი), "ოლდენბურგი" (გერმანია), "ლეიდენი" (ჰოლანდია), "ფუენლაბრადა" (ესპანეთი).
მივიღეთ 19 კლუბი, რომლებიც ევროჩელენჯის ჯგუფურ ეტაპზე იასპარეზებენ. მათ ამავე ეტაპზე დაემატება ის რვა გუნდი, რომელიც ევროთასის შესარჩევ ეტაპს ვერ დაძლევს. ევროთასისთვის ითამაშებენ "არტლანდი" (გერმანია), "აზოვმაში" (უკრაინა), "ოსტენდე" (ბელგია), "ბეშიქთაში" (თურქეთი), "პროსტეხოვი" (ჩეხეთი), "ვენტსპილსი" (ლატვია), "ცედევიტა" (ხორვატია), "მონსი" (ბელგია), "შალონი" (საფრანგეთი), "ეთა ენგომი" (კვიპროსი), "გრან კანარია" (ესპანეთი), "ლე მანი" (საფრანგეთი), "ნორჩოპინგი" (შვედეთი), "აკადემიკი" (ბულგარეთი), "კარსიკაია" (თურქეთი), "სანკტ პეტერბურგი" (რუსეთი).
ამ 16 გუნდიდან საუკეთესო რვაეული ევროთასზე ითამაშებს, ხოლო დამარცხებული რვა გუნდი ევროჩელენჯის ჯგუფურ ეტაპზე მოხვდება. 19+8=27. მივიღეთ ევროჩელენჯის ჯგუფურ ეტაპზე მოასპარეზე 27 კლუბი, რომლებსაც საკვალიფიკაციო ეტაპიდან ხუთი გუნდი დაემატება. ხუთი ადგილისთვის კი 10 მსურველია: "სოხუმი" (საქართველო), "ტრაისკირხენი" (ავსტრია), "მინსკ 2006" (ბელორუსი), "ატომერომუ" (უნგრეთი), "ტამპერე" (ფინეთი), "სპარტაკ პრიმორიე" (რუსეთი), "ენისეი" (რუსეთი), "შოლნოკი" (უნგრეთი), "კრასნიე კრილია" (რუსეთი) და "ტრიუმფი" (რუსეთი).
***
როგორც მიხვდით, ევროჩელენჯის წლევანდელ გათამაშებაში სულ 32 კლუბი ჩაერთვება, რომლებიც ოთხგუნდიან რვა ჯგუფად გაიყოფა. თითო ჯგუფიდან საუკეთესო ორეული მეორე ჯგუფურ ეტაპზე გადავა, შემდეგ იქნება მეოთხედფინალი, ნახევარფინალი და ფინალი...
დღეს, ძნელია ქართული კლუბების ძალისა და პოტენციალის განსაზღვრა, რადგან არც "სოხუმისა" და არც "არმიის" ლეგიონერების ვინაობა არ ვიცით, თუმცა როგორც კლუბების წარმომადგენლები ამბობენ, ძლიერ უცხოელებს ჩამოიყვანენ და პირველ ჯგუფურ ეტაპზე აუტსაიდერები არ იქნებიან.
დაველოდოთ მოვლენების განვითარებას. მანამდე კი გეტყვით, რომ ევროთასების წილისყრა დღეს, თბილისის დროით 13 საათზე დაიწყება, გუნდებს ჯერ ევროჩელენჯზე გაანაწილებენ, შემდეგ - ევროთასზე, ბოლოს - ევროლიგაზე. ამ პროცედურას ესპანური ქალაქი ბარსელონა უმასპინძლებს. წილისყრას ქართული კლუბების წარმომადგენლებიც დაესწრებიან.
ყოველდღიური სპორტული გაზეთი "ლელო"
