საქართველოს 18 წლამდე გოგონათა ნაკრები ევროპის ლიგის მეორე წრეში ჩაება

18 წლამდე გოგონათა ნაკრები ევროპის ლიგის მეორე წრეში საასპარეზოდ ლატვიის დედაქალაქ რიგაში გაემგზავრა. ნინო ყიფშიძისა და ზვიად დიდბარიძის გაწვრთნილი გუნდი მეორე წრის ფარგლებში ჯგუფში 3 მატჩს გამართავს, ხოლო შემდეგ, დაკავებული ადგილის შესაბამისად საკვალიფიკაციო მატჩებში მიიღებს მონაწილეობას.

შეგახსენებთ, რომ საქართველოს 18-წლამდელთა ნაკრებმა პირველი წრე გასულ ოქტომბერში, უკრაინის ქალაქ ოდესაში ჩაატარა, სადაც გამართული 4 მატჩიდან გამარჯვება ვერ მოიპოვა და 8 გუნდში ბოლო ადგილზე გავიდა. მეორე წრეშიც 8 გუნდი მონაწილეობს. საქართველოს ჯგუფში ბელგიური “ანტვერპენი” და შვედური გუნდები – “ალვიკი” და “ლულეა” მოხვდნენ.

პირველი შეხვედრა საქართველოს ნაკრებმა დღეს “ანტვერპენთან” გამართა და 20:45 დამარცხდა. ჩვენს ნაკრებში ქულები ოთხმა კალათბურთელმა მოაგროვეს, რომელთაგან 11 ქულით საუკეთესო მარიამ ოქროპირიძე გახლდათ. ქართველები მეორე მატჩს დღესვე, თბილისის დროით 20:00 საათზე “ლულეასთან” გამართავენ, ხოლო ჯგუფის ბოლო შეხვედრა ხვალ, “ალვიკთან”, 11:00 საათზე გაიმართება.

ჯგუფის 2 საუკეთესო ნახევარფინალში გავა, ხოლო მე-3 და მე-4 ადგილებზე გასული გუნდები ტურნირის 5-8 ადგილებს გაითამაშებენ.

GBF.GE