გორის "ივერიონის" წარმატებული დებიუტი "ა" ლიგაში

დიმიტრი ჯაკობოვის გაწვრთნილმა "ივერიონმა" "ა" ლიგა გამარჯვებით გახსნა. გორის გუნდმა ჩინებული დებიუტი მოიწყო. შიდაქართლურმა გუნდმა გასულ სეზონში სუპერლიგიდან დაქვეითებული ისტორიულად ყველაზე ტიტულიანი ქართული გუნდი, დინამო დაამარცხა. მართალია, ეს დინამო თუნდაც დამოუკიდებელი პერიოდის დინამოს აჩრდილია, თუმცა გორელებისთვის ამ გამარჯვებას სოლიდური მნიშვნელობა ჰქონდა. პირველი მატჩი "ა" ლიგაში და პირველი დამაჯერებელი გამარჯვება.

გორის მერის, ლადო ხინჩეგაშვილის პირადი ინიციატივით წლეულს "ივერიონს" მუნიციპალური დაფინანსება გაეზარდა. საქმეში ჩაერთო გორის კერძო სექტორიც და "ივერიონის" სახით "ა" ლიგის კალიბრის საკმაოდ კონკურენტუნარიანი გუნდი ჩამოყალიბდა. გორის გუნდი წლებია, ცდილობდა "ა" ლიგაში მოხვედრას, მაგრამ ნაკლები სახსრებით მიზანს ვერ მიაღწია და სწორედ ამის შემდეგ ჩაერთო საქმეში გორის მერია და გუბერნია, რამაც შედეგი გამოიღო და სულ მალე შიდა ქართლის მთავარი ქალაქი ახალ სპორტის სასახლეში "ა" ლიგის მატჩებს უმასპინძლებს.

საბოლოოდ "ივერიონმა" 33 ქულით – 95:62 (სტატისტიკა) კი იმარჯვა, თუმცა მეორე პერიოდის ჩათვლით თანაბარი ბრძოლა მიდიოდა. დინამოელები ახალგაზრდული შემართებით ტოლ-სწორად ებრძოდნენ 3 ლეგიონერით გაძლიერებულ "ივერიონს, თუმცა დიდი შესვენების შემდეგ ვითარება კარდინალურად შეიცვალა. გორელებმა თამაშის სადავეები ბოლომდე ხელთ იგდეს და მესამე პერიოდის შემდეგ 14 ქულით დაწინაურდნენ. ბოლო პერიოდში დინამომ თეთრი დროშა გამოფინა და საბოლოოდ ივერიონმა დიდსხვაობიანი გამარჯვება გაიფორმა. 

გორელებს 24 ქულითა და 13 მოხსნით მამუკა ბაზუაშვილმა ულიდერა. 21-21 ქულა ლიგის მიღმა დარჩენილი ზესტაფონის მარგვეთისგან შემატებულმა ვიქტორ ლუისმა და ახალგაზრდა ნიკოლოზ კიშკომ მიითვალეს. 10 ქულა აიზია ლუისის ანგარიშზეა. დინამოში 16 ქულით სტივ კუმინდა გამოირჩა. 11 ქულა და 15 მოხსნა სუპერლიგის ვერადან დინამოში გადასულმა ვალერიან წულეისკირმა მოაგროვა.