დიდი ბრიტანეთის პარლამენტის წევრი მარკ პაუსი, რომელიც რაგბის სამშობლოს, ქალაქ რაგბის წარმომადგენელია, თბილისის "ლელო-სარასენსის" ბაზას – „ლელო არენას“ ეწვია და 60-წლიანი ისტორიის მქონე ბრიტანული ჟურნალის ქართული ვერსიის, Rugby World Georgia-ს პირველი ნომრის პრეზენტაციას დაესწრო.შეხვედრას ასევე ესწრებოდნენ გაერთიანებულ სამეფოში საქართველოს საგანგებო და სრულუფლებიანი ელჩი სოფიო ქაცარავა, რაგბის კავშირის პრეზიდენტი იოსებ ტყემალაძე, აღმასრულებელი დირექტორი ბაჩო ხურციძე, გამგეობის თავმჯდომარე დავით კაჭარავა, ადმინისტრაციული დირექტორი თორნიკე გოგებაშვილი, რაგბის კავშირის პრეზიდენტის მრჩეველი ნიკოლოზ ალავიძე, Rugby World Georgia-ს გამომცემელი დავით სამსონიძე და რაგბის კლუბ "ლელოს" დამფუძნებელი
პირველ ნაწილში სტუმრები "ლელოს" ასაკობრივი გუნდის ბავშვებს შეხვდნენ. მათ საჩუქრად გადაეცათ Rugby World Georgia-ს ბრენდირებული მაისურები, კეპები და ჟურნალის პირველი ნომრები. აღსანიშნავია, რომ მსგავსი შეხვედრები პერიოდულად სხვა კლუბებთანაც გაიმართება და არამხოლოდ თბილისში.
მეორე ნაწილში მხარეებმა ქართულ-ბრიტანული სარაგბო ურთიერთობების გაღრმავების შესაძლებლობებზე ისაუბრეს, როგორც ეროვნული და სხვადასხვა ასაკობრივი, ასევე საკლუბო და ბავშვთა რაგბის დონეზე. ბატონმა მარკ პაუსმა პირობა დადო, რომ აქტიურად ჩაერთვება ამ ურთიერთობის გაღრმავებაში:
„რაგბიში დიდი გამოცდილება მაქვს და ფანტასტიკურია ქართულ ენაზე ასეთი მაღალი დონის სარაგბო ჟურნალის გამოცემა. მიუხედავად ცუდი ამინდისა, ძალიან მომეწონა გარემო, განსაკუთრებით, ბავშვთა ჩართულობა. მნიშვნელოვანია, რომ მოზარდები ადრეული ასაკიდან ეზიარონ იმ თვისებებს, რასაც რაგბის მეშვეობით ეზიარებიან. დღევანდელი შეხვედრის შემდეგ კიდევ უფრო აქტიურად ჩავერთვები ქართულ-ბრიტანული სარაგბო ურთიერთობის განვითარებაში. ძალიან ბევრი კარგი მოთამაშეა საქართველოში, რომელთაც უნდა ჰქონდეთ შესაძლებლობა, გაიკვალონ გზა ბრიტანულ კლუბებში და ითამაშონ ინგლისის პრემიერშიფში“.
იოსებ ტყემალაძე: „ჩვენს ქვეყანას და მთელ სარაგბო სამყაროს ვულოცავ Rugby World Georgia-ს პირველი ნომრის გამოცემას. ეს არის ხიდი მსოფლიოს სარაგბო სამყაროსთან. ამ ჟურნალის მეშვებით, მთელ მსოფლიოს გავუზიარებთ ჩვენს ისტორიას, კლუბების, ნაკრების ცხოვრებას და მათგანაც მივიღებთ საჭირო ინფორმაცას. ის უნდა იქცეს სამაგიდო წიგნად, განსაკუთრებით, ბავშვებისთვის. მადლობა ყველას, ვინც იშრომა ამ გამოცემისთვის და ყოველ კვარტალში სიხარულით დაველოდები ახალ-ახალ ნომერს“.
„სტუმრად გვყავს ინგლისის პარლამენტის წევრი, რომელიც ქალაქ რაგბის წარმომადგენელია და სპორტის ამ სახეობასთან ბევრი რამ აკავშირებს. "ლელო" წლებია ინგლისურ კლუბ "სარასენსთან" თანამშრომლობს, რაც მნიშვნელოვანია და ეს ვიზიტი სწორედ ამ თანამშრომლობის გამოძახილია. ჩვენ გვაქვს ხანგრძლივი ურთიერთობები ფრანგულ კლუბებთან, მაგრამ ჯერჯერობით ცოტა ინგლისურ გუნდთან. ბატონ მარკთან განვიხილეთ მომავალი ურთიერთობების შესაძლებლობები არა მხოლოდ სანაკრებო, არამედ საკლუბო და ბავშვთა რაგბის დონეზე. გვაქვს დიდი გეგმები, რაშიც ინგლისელების მხარდაჭერა დაგვჭირდება და ამ მხრივ ბატონი მარკი დახმარებას დაგვპირდა“.
დავით კაჭარავა: „გამოვიდა მსოფლიოში ცნობილი სარაგბო ჟურნალის, Rugby World-ის ქართული ვერსია, რომელშიც ინგლისურ და ქართულ ენებზეა აღწერილი ქართული რაგბის ისტორია, დღევანდელი მდგომარეობა და სამომავლო მიზნები. ის როგორც საქართველოში, ასევე ევროპაში, ქართული რაგბის ცნობადობას აამაღლებს, რაც მომავალი განვითარებისთვის მნიშვნელოვანია. სტუმრად გვყავს დიდი ბრიტანეთის პარლამენტის წევრი მარკ პაუსი, ვისაუბრეთ რაგბის განვითარებაზე, რომელშიც ინგლისელები დიდ როლს თამაშობენ და ჩვენთვის მნიშვნელოვანია ამ ურთიერთობების გაღრმავება“.
Rugby.Ge
რაგბის კავშირის გამგეობის წევრი "ლაგუნა ვერესთან" მომხდარ კრიმინალურ გარჩევაში საკუთარ ბრალეულობას ბინძურ პროვოკაციას უწოდებს
