საქართველოს 19-წლამდელთა ნაკრებმა "შევარდენის სანაკრებო ბაზაზე" ინგლისის ოთხი საგრაფოს 20-წლამდელთა გუნდთან მეორე მატჩი გამართა და 13:25 წააგო. ისევე, როგორც პირველ შეხვედრაში, ახალგაზრდა მორაგბეებმა შესანიშნავი სანახაობა შემოგვთავაზეს.
მთლიანობაში, ჩვენი გუნდის ორივე თამაში დადებითად შეიძლება შეფასდეს. ცხადია, ხარვეზი ბევრია. ორივე შეხვედრაში განცდილი მარცხი კი ქართველი მორაგბეების მიერ დაშვებულმა წვრილ-წვრილმა შეცდომებმა გამოიწვია.
ცხადია, მეტოქეს, რომელიც ასაკითაც უფროსია და, შესაბამისად, ფიზიკური კონდიციებიც მეტად აქვს განვითარებული, ძნელია, წინააღმდეგობა გაუწიო.
მეორე მატჩში თითქმის პირწმინდად წავაგეთ დერეფანი. ტაიმნახევრის განმავლობაში მეტოქეს სტატიკურ მდგომარეობაში უდიდესი უპირატესობა ჰქონდა. ამას დაუმატეთ
ზორბა მოწინააღმდეგის შეჩერებას სამი-ოთხი ჩვენებურის ძალისხმევა სჭირდებოდა, რის გამოც რაკის ახლოს ზონა ხშირად დაუცველი რჩებოდა.
ყოველივე ეს ინგლისელებმა კარგად გამოიყენეს და ამჯერად უფრო მეტი, 12 ქულის სხვაობით მოგვიგეს. ცხადია, ჩვენი გუნდის თამაშში მარტო შეცდომები არ ყოფილა.
"უმცროსმა ბორჯღალოსნებმა", როგორც სჩვევიათ, თავდადებით ითამაშეს, მრავალფაზიანი შეტევებიც აკინძეს და მეტოქეს არაერთხელ გაუჩინეს თავსატეხი.
მეორე მატჩი პირველის იდენტურად დაიწყო. ინგლისელებმა თავიდანვე აგრესიულად შემოგვიტიეს, ხაზის გაჭრაც შეძლეს და საბოლოოდ საჯარიმოს დარტყმის უფლებაც გამოიმუშავეს.
ასე რომ, სტუმრებს პირველივე შეტევა შედეგიანი გამოუვიდათ და ანგარიში მე-2 წუთზე გახსნეს.
საჯარიმო მათმა მგეზავმა რობ ევერ-რაითმა გაიტანა - 3:0. წინა მატჩისგან განსხვავებით, "უმცროსმა ბორჯღალოსნებმა" ამჯერად მეტოქეს ინიციატივის დაუფლება არ დაანებეს და მრავალფაზიანი იერიში წამოიწყეს.
მალე ჩვენმა მორაგბეებმა ანგარიშის გათანაბრებაც შეძლეს. მე-9 წუთზე საჯარიმო საქართველოს ნაკრების მგეზავმა რევაზ ჯინჭველაშვილმა გაიტანა - 3:3.
ამის შემდეგ თამაში თანაბარ ბრძოლაში გაგრძელდა, თუმცა რამდენიმე ელემენტარული შეცდომა საკმარისი გამოდგა საიმისოდ, რომ ინგლისელები რვა ქულით დაწინაურებულიყვნენ. ევერ-რაითმა 23-ე წუთზე საჯარიმოთი დააწინაურა თავისიანები. რვა წუთში კი სტუმრებმა ლელოს გატანაც მოახერხეს.
ინგლისელებმა დერეფანი ჩვენი ჩათვლის მოედნიდან ხუთ მეტრში მოიგეს, მოლი შეკრეს, დაიძრნენ, თუმცა ჩვენმა მორაგბეებმა მისი შეჩერება შეძლეს. თამაში რაკში გადავიდა. რამდენიმე მოკლე დარტყმის შემდეგ ბურთი შერკინების ბურჯმა რიკი კანომ აიტაცა და ლელოში შეაღწია. ევერ-რაითმა ვერ გარდასახა - 11:3.
ტაიმის დასრულებამდე აღარაფერი რჩებოდა, როცა ჩვენმა მორაგბეებმა სახიფათო შეტევის განხორციელება შეძლეს, რომელიც მეტოქემ წესის დარღვევით შეაჩერა - 6:11. ასე დასრულდა პირველი ნახევარი.
შესვენების შემდეგ, ორივე გუნდის დიდი მცდელობის მიუხედავად, ანგარიში 20 წუთის განმავლობაში უცვლელი იყო.
ინგლისელებმა, ხელდახელ ბურთაობით რომ ვერას გახდნენ, აქცენტი ძალისმიერ თამაშზე გადაიტანეს და მე-60 წუთზე პირველ ტაიმში განხორციელებული შედეგიანი შეტევის მსგავსი იერიში წამოიწყეს.
აუტის მოგების შემდეგ სტუმრებმა ისევ მოლის დაძვრა სცადეს. წარმოქმნილი რაკიდან ბურთი პირველხაზელმა დევიდ ქოუნთსმა აიტაცა და ფარული გადაცემით გარღვევაზე ცხრა ნომერი ნიკ ფოსტერი გაიყვანა. ევერ-რაითმა ამჯერად გარდასახვა ზუსტად დაარტყა - 18:6.
საპასუხო ლელო ჩვენმა გუნდმა ოთხი წუთის შემდეგ გაიტანა. "უმცროსმა ბორჯღალოსნებმა" აუტი ინგლისელთა ლელოდან ხუთ მეტრში გაჭირვებით მოიგეს. შედეგად მოლის აგორება ვერ შეძლეს და თამაში რაკში გადავიდა.
იქ კი შეცვლაზე შესულმა თორნიკე ბუბუტეიშვილმა იყოჩაღა, მოწინააღმდეგის მიერ დაუცველი სივრცე დროულად შენიშნა და ჩათვლის მოედანში შეაღწია. ჯინჭველაშვილმა გარდასახვა ზუსტად დაარტყა - 13:18.
აღსანიშნავია, რომ ეს მოვლენები მაშინ განვითარდა, როცა საქართველოს ნაკრები რიცხობრივ უმცირესობაში იმყოფებოდა. მატჩის არბიტრმა ერთმანეთის მიყოლებით ორი მორაგბე გაგვისინბინა და რამდენიმე წუთი სულაც 13 მოთამაშით ვერაგბებოდით მოწინააღმდეგეს.
თამაშის დასრულებამდე დარჩენილ დროში მატჩის გადარჩენა, ცხადია, შესაძლებელი იყო, თუმცა საფინალო სასტვენამდე 10 წუთით ადრე ინგლისელებმა კიდევ ერთი ლელო მიითვალეს და საბოლოოდ 12-ქულიანი სხვაობით გაიმარჯვეს - 12:25.
საქართველო U19-ინგლისი U20 13:25
საქართველო: 15. გიორგი ტალახაძე (გიორგი აფციაური 41), 14. დავით გულიტაშვილი, 13. გიორგი ნათელაშვილი, 12. რეზო ბროძელი, 11. გიორგი ფრუიძე, 10. რევაზ ჯინჭველაშვილი, 9. ლაშა ნადირაძე (თემურ თუთბერიძე 41). 1. დავით ფხაკაძე, 2. გიორგი ტორაძე, 3. გიორგი მარგველანი, 4. როლანდ კვაჭაძე, 5. ნიკა გიგაური (თორნიკე ბუბუტეიშვილი 50), 6. ბადრი დანგაძე, 7. საბა შუბითიძე, 8. დავით პაპავაძე.
ლ: თორნიკე ბუბუტეიშვილი. გ,2ს: რევაზ ჯინჭველაშვილი.
ინგლისი: 15. ჯიმი უიგლსოურთი, 14. ჯეკ როსიტერი, 13. ეიდენ მოსი, 12. დევიდ მეისი, 11. ბენ რეთი, 10. რობ ევერ-რაითი, 9. ნიკ ფოსტერი. 1. რიკი კანო, 2. უილ რობერთსი, 3. დევიდ ქოუნდსი, 4. ჯოშ ფეთი, 5. გარეთ ბაქსთერი, 6. ჯორჯ ორემი, 7. ედვარდ ვებსტერი, 8. დევიდ ჯოუნსი.
3ლ: კანო, ფოსტერი, ორემი. 2ს,2გ: რობ ევერ-რაითი
სინბინი: ფრუიძე, გულიტაშვილი.
მსაჯი: გიორგი ამირხანაშვილი
ყოველდღიური სპორტული გაზეთი "ლელო"
