ფრანგული ყოველდღიური სარაგბო გამოცემა "მიდი ოლიმპიკი" საფრანგეთში ყველაზე პრესტიჟულ სარაგბო გაზეთს წარმოადგენს, რომელიც 1954 წლიდან ყოველწლიურად, "სარაგბო ოსკარით" აჯილდოვებს საფრანგეთის ტოპ 14-ში და მოგვიანებით უკვე "ჰეინეკენის თასის" სეზონის გამორჩეულ მორაგბეს. ნომინაციაში გამარჯვებული მორაგბე სანახაობრივად და ქარიზმატულად უნდა თამაშობდეს როგორც ტოპ 14-ში, აგრეთვე "ჰეინეკენის თასზე".
26 მარტს "მიდი ოლიმპიკმა", ჯილდოს არსებობის ისტორიაში, "ოსკარით" პირველად დააჯილდოვა ერთ-ერთი გამორჩეული ქართველი მორაგბე, "ბორჯღალოსნებისა" და ფრანგული "მონპელიეს" ლიდერი - მამუკა გორგოძე.
"მიდი ოლიმპიკს" მამუკა გორგოძისათვის ადრეც მიუნიჭებია ჯილდო - საფრანგეთში მოთამაშე საუკეთესო ლეგიონერი.
აღსანიშნავია, რომ
ეს პრესტიჟული ჯილდო აგრეთვე მოპოვებული აქვთ ისეთ გამოჩენილ მორაგბეებს, როგორებიც არიან: ფაბიენ გალტიე (როგორც მორაგბეს 2003 წელს, როგორც "მონპელიეს" მწვრთნელს 2011 წელს), მორგან პარა, დიმიტრი იაშვილი და სხვა.
rugby.ge
