მამუკა გორგოძე დაბრუნდა

ევროთასების გათამაშება 11 ოქტომბერს დაიწყო. გამორიცხული არ არის "ჰაინეკენის თასისა" და "ემლინ ჩელენჯ კაპის" ტურნირები წლეულს ბოლოჯერ ჩატარდეს, რადგან ინგლისური და ფრანგული კლუბების ინიციატივით, შესაძლოა, ახალი ევროპული საკლუბო შეჯიბრება "ჩემპიონთა ლიგა" დაფუძნდეს.

ერთი სიტყვით, ეს მომავლის ამბავია. ამჯერად კი, ყველაზე პრესტიჟულ "ჰაინეკენის თასის" გათამაშებაში ქართველ მორაგბეთა შვიდი ფრანგული და ერთი შოტლანდიური გუნდი ასპარეზობს.

ორი გუნდით არიან წარმოდგენილი ქართველი მორაგბეები "ემლინ ჩელენჯ კაპის" გათამაშებაში.

პირველი მატჩი სწორედ "ემლინ ჩელენჯ კაპზე" გაიმართა. პარიზში ზურაბ ჟვანიასა და დავით ქუბრიაშვილის "სტად ფრანსემ", რომელიც E ჯგუფის ბინადარია, ტურნირის დებიუტანტს, პორტუგალიურ "ლუზიტანოსს" უმასპინძლა და დიდი ანგარიშით დაამარცხა - 61:3.

აღსანიშნავია, რომ პორტუგალიელებმა ეს გუნდი სახელდახელოდ შეაკოწიწეს, რადგან ესპანურმა გუნდმა, რომელიც ამავე შეჯიბრებაში შარშან ასპარეზობდა, ფინანსური პრობლემების გამო ტურნირში მონაწილეობაზე უარი თქვა.

პარიზელთა უპირატესობა ცხადია, საგრძნობი იყო და მეტოქეს ცხრა ლელო გაუტანეს. ჟვანია ძირითად შემადგენლობაში გახლდათ და 56-ე წუთზე შეცვალეს, ხუთი წუთით ადრე თამაშში ქუბრიაშვილი ჩაერთო. ამავე ჯგუფში ინგლისური "ლონდონ აირიში" იტალიურ "პრატოს" უმასპინძლებს.

გოდერძი შველიძისა და კარლენ ასეიშვილის "ბრივი" C ჯგუფში ითამაშებს. ჩვენებურთა ეს გუნდი პირველ შეხვედრას სტუმრად გამართავს იტალიაში "კალვიზანოსთან". შველიძე ტრავმირებულია და ვერ ითამაშებს, ასეიშვილს მწვრთნელებმა დასვენების საშუალება მისცეს.

ამავე ჯგუფში, რუმინეთის "ბუქარესტი" შინ მიიღებს ინგლისურ "ნიუკასლს".

ემლინ ჩელენჯ კაპი
I ტური
A ჯგუფი
სეილ შარქსი (ინგ)-ბიარიცი (საფ) 33:10, ოიონაქსი (საფ)-ვორსტერი (ინგ)

B ჯგუფი
ნიუპორტი (უელ)-მოლიანო (იტ), ბორდო (საფ)-ბასი (ინგ)

C ჯგუფი
ბუქარესტი (რუმ)-ნიუკასლი (ინგ)ს, კალვიზანო (იტ)-ბრივი (საფ).

D ჯგუფი
ბაიონი (საფ)-გრენობლი (საფ), ვიადანა (იტ)-ვოსფსი (ინგ)

E ჯგუფი
სტად ფრანსე (საფ)-ლუზიტანოს (პორ) 61:3, ლონდონ აირიში (ინგ)-პრატო (იტ)

როგორც უკვე ვთქვით, "ჰაინეკენის თასის" გათამაშებაში ქართველ მორაგბეთა რვა გუნდი იასპარეზებს.

A ჯგუფში პირველ ტურში საფრანგეთის ჩემპიონი, ანტონ ფეიქრიშვილის "კასტრი" შინ ითამაშებს ინგლისურ "ნორსჰემპთონთან". აღსანიშნავია, რომ ეს ჯგუფი სხვებთან შედარებით თანაბრად ძლიერი გუნდებითაა დაკომპლექტებული.

ფეიქრიშვილი ინგლისური კლუბის წინააღმდეგ ძირითად შემადგენლობაში ითამაშებს. ამავე ჯგუფში უელსური "ოსფრიზი" შინ მიიღებს ირლანდიურ "ლენსტერს".

B ჯგუფში ითამაშებს "ჰაინეკენის თასის" ამჟამინდელი მფლობელი ლევან ჩილაჩავასა და კონსტანტინე მიქაუტაძის "ტულონი", რომელიც პირველ შეხვედრას შინ გამართავს შოტლანდიურ "გლაზგოსთან".

შეხვედრა ძალზე საინტერესო უნდა გამოდგეს, რადგან გლაზგოელები "კელტთა ლიგაში" შესანიშნავად ასპარეზობენ და პირველ ადგილზე არიან. "ტულონი" მატჩს სერიოზულად უდგება და სტუმრებს საბრძოლო რაზმით დაუპირისპირდება. ქართველი მორაგბეები განაცხადში არ არიან.

C ჯგუფის ბინადარია ჯაბა ბრეგვაძისა და ვასილ კაკოვინის "ტულუზი", რომელიც პირველ ტურში შინ მიიღებს იტალიურ "ზებრეს".

ცხადია, ამ შეხვედრაში ფავორიტი ჩვენებურთა გუნდია, თუმცა ტრავმების გამო ქართველი მორაგბეები ვერ ითამაშებენ. ამავე ჯგუფში ირლანდიური "ქონოთი" შინ ითამაშებს ინგლისურ "სარასენზთან".

სავარაუდოდ, ჯგუფში პირველი ადგილისთვის "ტულუზთან" ერთად სწორედ "სარასენზი" იბრძოლებს.

D ჯგუფში ქართველ მორაგბეთა ორი ფრანგული გუნდია. პირველ ტურში სწორედ ისინი დადგებიან ერთმანეთის პირისპირ. დავით ხინჩაგიშვილის "მეტრო რასინგი" პარიზში დავით ზირაქაშვილის "კლერმონს" უმასპინძლებს.

საქართველოს ნაკრების შერკინების ორივე ბურჯი ძირითად შემადგენლობაშია.

ჩვენებურთა გუნდებს საკმაოდ სერიოზული კონკურენცია ელის ჯგუფის სხვა წევრებისგან.

ინგლისური "ჰარლიქვინზი" პირველ ტურში უელსურ "ჰლანეჰლის" უმასპინძლებს. ამ ჯგუფში გამარჯვებულის წინასწარ განჭვრეტა შეუძლებელია.

E ჯგუფის ბინადარი იქნება მამუკა გორგოძისა და მიხეილ ნარიაშვილის "მონპელიე", რომელიც პირველ ტურში სტუმრად დაუპირისპირდება იტალიურ "ბენეტონს". გორგოძემ ტრავმა მოიშუშა და ტრევიზოში ძირითად შემადგენლობაში ითამაშებს, ნარიაშვილი განაცხადში არ არის.

მონპელიეს მთავარი მეტოქეები ამ ჯგუფში ირლანდიური "ალსტერი" და ინგლისური "ლესტერ ტაიგერზი" იქნებიან.

პირველ ტურში ამ გუნდებს შორის შეხვედრა ირლანდიაში გაიმართება.

ორი "ქართული გუნდი" ითამაშებს F ჯგუფშიც. დიმიტრი ბასილაიას შოტლანდიური "ედინბურგის" მეტოქე საკუთარ არენაზე ირლანდიური "მანსტერი" იქნება.

ბასილაია ძირითად შემადგენლობაშია და ფლანკერის პოზიციაზე ითამაშებს. გიორგი ჟღენტის "პერპინიანი" კი, ინგლისში "გლოსტერს" შეხვდება. შერკინების ქართველი ბურჯი სათადარიგოთა შორისაა.

ჰაინეკენის თასი
I ტური
A ჯგუფი
კასტრი (საფ)-ნორსჰემპთონი (ინგ), ოსფრიზი (უელ)-ლენსტერი (ირლ)

B ჯგუფი
ექსეტერი (ინგ)-კარდიფი (უელ), ტულონი (საფ)-გლაზგო (შოტ).

C ჯგუფი
ქონოთი (ირლ)-სარასენზი (ინგ), ტულუზი (საფ)-ზებრე (იტ).

D ჯგუფი
ჰარლიქვინზი (ინგ)-ჰლანეჰლი (უელ), მეტრო რასინგი (საფ)-კლერმონი (საფ).

E ჯგუფი
ალსტერი (ირლ)-ლესტერ ტაიგერზი (ინგ), ბენეტონი (იტ)-მონპელიე (საფ).

F ჯგუფი
ედინბურგი (შოტ)-მანსტერი (ირლ), გლოსტერი (ინგ)-პერპინიანი (საფ).

ყოველდღიური სპორტული გაზეთი "ლელო"