ინგლისური რაგბის მექა "თვიქნემი" შვიდკაცა რაგბის მსოფლიოს სერიის ბოლო ეტაპს უმასპინძლებს. ლონდონის შვიდკაცაზე, პარალელურად, მომავალი სეზონის შესარჩევი ტურნირიც გაიმართება, სადაც საქართველოს ნაკრებიც იასპარეზებს.
ჩვენმა მეშვიდკაცეებმა ბოლო შესარჩევ ეტაპზე თამაშის უფლება ჰონგ-კონგის შვიდკაცა რაგბის ტურნირზე მოიპოვეს.
საქართველოს ნაკრებმა მსოფლიოს სერიაში ადგილის დასამკვიდრებლად მინიმუმ სამეულში უნდა გააღწიოს.
ამ სამი საგზურისთვის ლონდონში, ჩვენი გუნდის გარდა, კიდევ შვიდი ნაკრები იბრძოლებს. ესენია: შოტლანდია, ჰონგ-კონგი, ზიმბაბვე, პორტუგალია, ესპანეთი, ტონგა და რუსეთი.
რვა გუნდი ორ ჯგუფშია განაწილებული. "შვიდკაცა ბორჯღალოსნები" A ჯგუფში შოტლანდიის, ჰონგ-კონგისა და ზიმბაბვეს ნაკრებებთან გაარკვევენ
ჰონგ-კონგის შვიდკაცა ტურნირისგან განსხვავებით, საქართველოს ნაკრები ლეგიონერების გარეშე იასპარეზებს. მიუხედავად ამისა, გუნდში ბევრია საკმაოდ გამოცდილი მოთამაშე: ლაშა ხმალაძე, ირაკლი გეგენავა (ორივე-ლელო), მერაბ შარიქაძე (აკადემია), ირაკლი ღვინჯილია (ლოკომოტივი) და გიორგი ფრუიძე (აია).
საქართველოს ნაკრები
ირაკლი გეგენავა, ლაშა ხმალაძე, თორნიკე ცერცვაძე (სამივე-ლელო), ალეკო ხუციშვილი (არმაზი), მერაბ შარიქაძე (აკადემია), ლევან გოგოლაშვილი, გიორგი ჯიმშელაძე, ბახვა კობახიძე (სამივე-არმია), ირაკლი ღვინჯილია (ლოკომოტივი), შავლეგ მახარაშვილი, გიორგი ფრუიძე, ზურაბ ძნელაძე (სამივე-აია).
A ჯგუფი: საქართველო, შოტლანდია, ჰონგ-კონგი, ზიმბაბვე.
B ჯგუფი: პორტუგალია, ესპანეთი, ტონგა, რუსეთი.
ყოველდღიური სპორტული გაზეთი "ლელო"
