ქარის თასის ორი ნახევარფინალისტი გარკვეულია

ქარის თასის რეგულარული გათამაშების დასრულებამდე ერთი ტურიღა დარჩა. პლეი ოფში თამაშის უფლება ორმა, "ნატალ შარქსმა" და "ვესტერნ პროვანსმა" დაიბევა. დარჩენილი ორი საგზურისთვის კი სამი გუნდი "ბლუ ბულზი", "ჩიტაზი" და "ლაიონზი" იბრძვის.
მე-13 ტურის მთავარი შეხვედრა პრეტორიაში გაიმართა, სადაც ადგილობრივმა "ბლუ ბულზმა" მეორეადგილოსან "ვესტერნ პროვანსს" უმასპინძლა და უმწვავეს ბრძოლაში 36:32 მოუგო. პრეტორიელებმა პირველი ტაიმი 10:16 წააგეს, თუმცა მეორეში ძალების მობილიზება შეძლეს, მეტოქეზე ერთით მეტი, სამი ლელო გაიტანეს და დამსახურებულად გაიმარჯვეს.
"ბლუ ბულზიდან" ყველაზე შედეგიანი იყო მგეზავი იაკო პოთხიტერი, რომელმაც გუნდს 18 ქულა მოუტანა (სამი გარდასახვა და ოთხი საჯარიმო). სტუმრებს შორის გამორჩეული, როგორც თითქმის ყველა მატჩში, ასევე მგეზავი ვილემ და ფაალი გახლდათ, რომელმაც ორი გარდასახვა და ექვსი საჯარიმო გაიტანა (22 ქულა).
"ბლუ ბულზი" ბოლო ტურში სტუმრად ეთამაშება უმოტივაციო "გრიკასს". პრეტორიელებს რვა ქულაზე ნაკლები სხვაობით წაგებაც აძლევთ ხელს, რადგან ერთ საპრემიო ქულას მიიღებენ და უახლოეს მდევარ "ლაიონზისთვის" მიუწვდომელნი შეიქნებიან.
იოჰანესბურგის "ლაიონზს" საბედისწერო მარცხი აგემა მესამეადგილოსანმა, ბლუმფონტეინის "ჩიტაზმა" - 43:37. თამაში უხვლელოიანი გამოდგა, გუნდებმა ათი ლელო გაიტანეს. აქედან ბლუმფონტეინელების ანგარიშზე ექვსი ლელოა. ექვსიდან ორი კი მესამეხაზელმა ეშლი იონსონმა მიითვალა. ცუდად ურტყა კარში მგეზავმა ლუის სტრიდომმა, რომელმაც ექვსიდან მხოლო ორი ლელო გარდასახა. "ჩიტაზმა" პირველი ტაიმი 11:20 წააგო.
შესვენების შემდეგ, ბლუმფონტეინელებმა ხუთი ლელოს გატანა მოახერხეს და პლეი ოფისკენ დიდი ნაბიჯი გადადგეს. ბოლო ტურში ჩიტაზელების მეტოქე გასვლით მატჩში აუტსაიდერი "ლეოპარდსი" იქნება და, სავარაუდოდ, იოლად მოიგებენ, რითაც პლეი ოფის საგზურს ოფიციალურად გაიფორმებენ.
გათამაშების ლიდერმა და ერთ-ერთმა მთავარმა ფავორიტმა "ნატალ შარქსმა" შინ სწორედ "ლეოპარდსი" გაანადგურა - 63:6. "ზვიგენებმა" მეტოქეს ცხრა ლელო გაუტანეს, აქედან ორ-ორი პირველხაზელ იან დუ პლესის, მესამეხაზელ კიგან დენიელისა და გარემარბ ოდვა ნდუნგანეს ანგარიშზეა. მგეზავმა ანდრე პრეტორიუსმა ცხრავე გარდასახა.
"ნატალ შარქსის" მომდევნო მეტოქე საშინაო მატჩში მეორეადგილოსანი "ვესტერნ პროვანსი" იქნება. ამ თამაშის შედეგს მნიშვნელობა მხოლოდ დასავლელებისთვის აქვს. გამარჯვების შემთხვევაში ისინი რეგულარულ გათამაშებას მეორე ადგილზე დაასრულებენ და ნახევარფინალში პირველ ადგილზე გასულ "ნატალ შარქსს" ასცდებიან.
შეგახსენებთ, რომ ნახევარფინალში პირველადგილოსანი მეოთხე ადგილზე გასულს ხვდება. მეორე ფინალისტის ვინაობა კი მეორე და მესამე ადგილსნების დაპირისპირებაში გაირკვევა.
XIII ტური
ნატალ შარქსი-ლეოპარდსი 63:6, ბლუ ბულზი-ვესტერნ პროვანსი 36:32, პუმასი-გრიკასი 31:61, ჩიტაზი-ლაიონზი 43:37.
სატურნირო მდგომარეობა
1. ნატალ შარქსი - 52 ქულა, 2. ვესტერნ პროვანსი - 44, 3. ჩიტაზი - 42, 4. ბლუ ბულზი - 42, 5. ლაიონზი - 37, 6. გრიკასი - 36, 7. პუმასი - 18, ლეოპარდსი - 5.
XIV ტური
გრიკასი-ბლუ ბულზი, ლეოპარდსი-ჩიტაზი, ვესტერნ პროვანსი-ნატალ შარქსი, ლაიონზი-პუმასი.