უკრაინის მოვლენების გამო რუსეთის წყალბურთელთა ნაკრებს მსოფლიო ჩემპიონატზე ქართველები შეცვლიან

ოფიციალურად დადასტურდა, რომ საქართველოს წყალბურთელთა ეროვნული ნაკრები, ისტორიაში პირველად, მსოფლიო ჩემპიონატზე ითამაშებს.

საწყლოსნო სახეობათა საერთაშორისო ფედერაციის (FINA) ბიუროს 2022 წლის 8 მარტის გადაწყვეტილების შესაბამისად, რუსეთის ჯარების უკრაინაში შეჭრის გამო რუსი და ბელარუსი სპორტსმენები, ასევე, ოფიციალური პირები, შეჯიბრებებიდან მოკვეთეს. მათ ნაცვლად მოახლოებულ ჩემპიონატზე საქართველოს ნაკრები იასპარეზებს.

საქართველოს ნაკრები მსოფლიო ჩემპიონატის საგზურთან ახლოს იყო - ჩვენმა წყალბურთელებმა ევროპის ჩემპიონატი მე-10 ადგილზე დაასრულეს, რუსები კი მე-8 ადგილზე გავიდნენ (მეცხრეადგილოსან გერმანიას საგზური მოპოვებული ჰქონდა).

ფინალური ეტაპის წილისყრა 12 აპრილს გაიმართება.