ნიკოლოზ ბასილაშვილმა საფრანგეთის ღია პირველობის საკვალიფიკაციო მოგებით დაიწყო

ქართველი ჩოგბურთელი ნიკოლოზ ბასილაშვილი 20 მაისს საფრანგეთის ღია პირველობის საკვალიფიკაციო ბადეში ჩაება.

სტარტზე სერბ ლასლო ჯერეს დაუპირისპირდა. ჩვენებურმა ორივე სეტი დამაჯერებლად წარმართა და მეტოქე ერთნაირი ანგარიშით - 6:4, 6:4 დაამარცხა, რითაც 8 სარეიტინგო ქულა გამოიმუშავა.

ამჟამად ბასილაშვილი მსოფლიო კლასიფიკაციით 135-ე ადგილზეა. მეორე წრეში ამერიკელ ბიორნ ფრატანჯელოს შეხვდება. ამ უკანასკნელმა, რომელიც რეიტინგით 147-ე საფეხურზეა, პირველ წრეში ავსტრალიელ ალექს ბოლტს მოუგო - 6:4, 7:6.

გერმანულ ნიურნბერგში (საპრიზო ფონდი 250.000 დოლარი) წყვილთა პაექრობაში ძალებს ცდის ოქსანა კალაშნიკოვა. იგი რუს ევგენია როდინასთან არის შეამხანაგებული. უკვე ვწერდით, რომ ქართულ-რუსული ტანდემი ნახევარფინალში გავიდა. გუშინ მათი მეტოქე გამოვლინდა: მეორე ნომრად განთესილმა ჰაო-ჩინ ჩენმა (ტაივანი) და ანაბელ მედინა-გარიგესმა (ესპანეთი) სანდრა კლემენშიცი (ავსტრია) და ანტონინა ლოტნერი (გერმანია) დაამარცხა - 6:4, 6:1.

მეორე ნახევარფინალში ითამაშებენ: ელენა ბოგდანი (რუმინეთი), ევა ჰროინოვა (ჩეხეთი)-ლარა არუაბარენა (ესპანეთი), რალუკა ოლარუ (რუმინეთი).

იტალიაში ჩოგბურთელ ქალთა 25.000-იანი ტურნირის ერთეულთა თანრიგს გამოეთიშა სოფიო შაფათავა, რომელიც მეორე წრეში ადრიანა ლეკაჯთან (ხორვატია) დამარცხდა - 6:7, 2:6, ხოლო ეკატერინე გორგოძემ მასპინძელი კრისტიანა ფერანდო დაჯაბნა - 6:4, 6:3 და მეოთხედფინალში გავიდა, სადაც ასპარეზობის მეშვიდე ნომერ თურქს - იპეკ სოილუს გაუწევს მეტოქეობას. ამ უკანასკნელმა გზიდან მასპინძელი კლაუდია ჯოვანი ჩამოიშორა - 6:1, 4:6, 6:2.

წყვილები: ეკატერინე გორგოძე, სოფიო შაფათავა-ნადია პოდოროვსკა (არგენტინა), რენატა ზარაზუა (მექსიკა) - 6:2, 6:3, სოფიო ქვაცაბაიამ და იზაბელა შინიკოვამ (ბულგარეთი) რეიტინგფავორიტები - ვიქტორია გოლუბიჩი (შვეიცარია) და ანა ვრლიჩი (ხორვატია) დაჯაბნეს - 7:6, 6:4.

(იბეჭდება მცირე ცვლილებით)
ყოველდღიური სპორტული გაზეთი "ლელო"