სეზონის მიწურულს, ქალებს შორის ნებისმიერ ტურნირს დიდი მნიშვნელობა ენიჭება წლის შემაჯამებელ ჩემპიონატში მოხვედრის ჭრილში. ამ მხრივ, პეკინის ტურნირზე ყველასთვის ორიენტირი იყო ამერიკელი მედისონ კისი, რომელიც მერვე ადგილს იკავებდა "ჩემპიონთა რბოლაში".კისმა პეკინში უშუალო კონკურენტების ჩამოცილება შეძლო - მერვედფინალში სვეტლანა კუზნეცოვას გაუსწორდა, მეოთხედფინალში კი პეტრა კვიტოვას მოუგო, რაც ერთგვარი მოულოდნელობა გახლდათ. კვიტოვამ ჩინეთში ფანტასტიკური ფორმა აჩვენა და ზედიზედ რვა მატჩი მოიგო, რამაც ქალაქ უჰანის ტურნირის მთავარი პრიზი მოუტანა. მაგრამ, როგორც ჩანს, კისთან მეოთხედფინალში დაღლა დაეტყო.
თუმცა, პეტრა ამ შეხვედრაში უშანსოდ არ
მედისონ კისს კიდევ ერთი მოგება სჭირდებოდა იმისთვის, რომ გაენაღდებინა სინგაპურში თამაში. ამიტომაც, საჭირო იყო ნახევარფინალში იოჰანა კონტას დამარცხება, რომელიც, თავის მხრივ, ასევე იბრძვის სინგაპურში მოსახვედრად. კონტამ შეძლო ამ უმნიშვნელოვანესი მატჩის მოგება, რომელიც ისტორიული აღმოჩნდა ბრიტანული ჩოგბურთისთვის. პირველად ბოლო 32 წლის განმავლობაში, ბრიტანეთს ჰყავს თავისი წარმომადგენელი ქალთა რეიტინგის TOP10-ში. ამ მოგებით, იოჰანამ ჩემპიონთა რბოლაში დომინიკა ციბულკოვას გაასწრო და მერვე ადგილზე გადავიდა.
ბადის მეორე ნახევარში ფავორიტი იყო ანჟელიკ კერბერი, მაგრამ მსოფლიოს პირველმა ჩოგანმა უკვე მესამე წრეში წააგო. გერმანელი კარგად იწყებდა ორივე სეტს ელინა სვიტოლინას წინააღმდეგ, მაგრამ შემდეგ, ბევრ შეცდომას უშვებდა, რითაც უკრაინელი კარგად სარგებლობდა. შედეგად, სვიტოლინამ ამ სეზონში მეორედ შეძლო მსოფლიოს პირველი ნომრის დამარცხება - 6:3, 7:5. უფრო ადრე, მან რიოს ოლიმპიადაზე მოუგო კლასიფიკაციის მაშინდელ ლიდერს სერენა უილიამსს. საერთოდაც, სვიტოლინას წელს, ხუთი მოგება აქვს TOP5-ის წევრებთან.
მეოთხედფინალში ელინამ დარია გავრილოვას მოუგო, ფინალში გასასვლელად კი აგნიეშკა რადვანსკას დამარცხება იყო საჭირო. თავიდან სვიტოლინა ცუდად არ გამოიყურებოდა, 5:3 დაწინაურდა და 30:0 ჰქონდა მეტოქის მოწოდებაზე. და უცებ, თამაშის სურათი მკვეთრად შეიცვალა - რადვანსკამ მომდევნო 13 ქულიდან 12 აიღო. უკრაინელმა სეტბოლი მოიგერია და ტაი-ბრეიკამდე მივიდა, მაგრამ იქ აგნიეშკა უკეთ მოქმედებდა. მეორე სეტში პოლონელმა ორმაგი ბრეიკით წაიყვანა ანგარიში და გაიფორმა სეზონში ბოლო "პრემიერის" ფინალში თამაში.
გადამწყვეტ მატჩში პოლონელს დიდი უპირატესობა ჰქონდა გამოცდილების მხრივ. ის თავისი მე-20 ტიტულისთვის იბრძოდა, კონტასთვის კი ეს იყო მხოლოდ მეორე ფინალი კარიერაში. კორტზე ეს კარგად იგრძნობოდა.
აგნიეშკა მალე დაწინაურდა, თან ორმაგი ბრეიკით. მიუხედავად ამისა, კონტამ შეძლო გაბრძოლება და კინაღამ დაეწია მეტოქეს, თუმცა, ბოლოს უხეში შეცდომები დაუშვა და დაეხმარა მეტოქეს სეტის მოგებაში. მეორეში თამაშის სურათი არ შეცვლილა და აგნიეშკამ უპრობლემოდ მოიგო კარიერაში მე-20 ტიტული.
პეკინი (ჩინეთი)
ფინალი
აგნიეშკა რადვანსკა (პოლ, 3)-იოჰანა კონტა (ბრიტ, 11) 6:4, 6:2.
ჩემპიონთა რბოლა
1. ანჟელიკ კერბერი (გერ) 7995*
2. სერენა უილიამსი (აშშ) 7050*
3. აგნიეშკა რადვანსკა (პოლ) 1989*
4. სიმონა ჰალეპი (რუმ) 4728*
5. კაროლინა პლიშკოვა (ჩეხ) 4100*
6. გარბინ მუგურუსა (ესპ) 3677
7. მედისონ კისი (აშშ) 3527
8. იოჰანა კონტა (ბრიტ) 3455
9. დომინიკა ციბულკოვა (სლოვაკ) 3445
10. კარლა სუარეს-ნავარო (ესპ) 3061
11. სვეტლანა კუზნეცოვა (რუს) 3000
* - გარანტირებული აქვთ წლის შემაჯამებელ ტურნირზე თამაში
ყოველდღიური სპორტული გაზეთი "ლელო"
