ევროპის ახალგაზრდობის ოლიმპიურ ფესტივალამდე, რომელსაც 2015 წელს თბილისი უმასპინძლებს, კარგა დროა დარჩენილი, მაგრამ ასპარეზობის პროგრამაში შემავალი სპორტის სახეობათა მესვეურები აქედანვე ზრუნავენ ახალგაზრდა ათლეტთა მომზადებასა და კონკურენტუნარიანი გუნდების ჩამოყალიბებაზე. ამ მხრივ მოცურავეებიც გამოირჩევიან. ტალანტების წარმოსაჩენად უკვე რამდენიმე შეჯიბრება ჩატარდა, შეირჩა პერსპექტიული გოგო-ბიჭების ჯგუფი, რომლის რვა წევრმაც (12 წლის 6 ბიჭი და 10 წლის 2 გოგონა) ოდესაში 1999-2002 წლებში დაბადებულთა საერთაშორისო ტურნირში იასპარეზა.
საპრიზო ადგილებისთვის ბრძოლაში ისინი უკრაინელ და მოლდოველ თანატოლებს მეტოქეობდნენ. სულ ტურნირზე ოთხ ასაკში 430-მა ნორჩმა მოცურავემ მოსინჯა ძალები. მათ
ასეთი კონკურენციის პირობებში შესანიშნავად იასპარეზა "ლაგუნა ვერეს" წარმომადგენელმა ილია პაპიძემ (მწვრთნელი მანანა თურქია), რომელმაც ამას წინათ რუსთავში სასელექციო შეჯიბრებაში ბრასით 100 და 200 მეტრზე პირველი ადგილები დაიკავა. ოდესაში მან 50, 100 და 200 მეტრი გაცურა ბრასით და 130 ქულით ბრინჯაოს მედალი დაიმსახურა.
რაც შეეხებათ დანარჩენ ქართველ მოცურავეებს, სხვადასხვა დისციპლინაში მათ რვა საპრიზო ადგილი დაიკავეს: ირაკლი კვარაცხელია ("ტონუსი") 200 მ კომპლექსურ ცურვაში მე-3 იყო. ასევე, მესამე ადგილები ერგოთ გორელ გივი დუდაშვილს (100 მ ბატერფლაი) და გიორგი ხვედელიძეს ("ტონუსი", 200 მ გულაღმა ცურვა).
გოგონებში რუსთაველ რუსუდან გოგინაშვილს 200 მ ბრასით მე-2, ხოლო 50 მ ბატერფლაით მე-3 ადგილები ხვდა, მერი მუმლაძე ("ტონუსი") კი ერთ მეორე (100 მ თ/ყ) და ორ მესამე ადგილს (50 და 200 მ თ/ყ) დასჯერდა. ამგვარი შედეგების მიუხედავად, პაპიძის გარდა, ყველა ჩვენებური უმედლოდ დარჩა.
როგორც საქართველოს ჭაბუკ მოცურავეთა ნაკრების მთავარმა მწვრთნელმა გიორგი აბზიანიძემ გვითხრა, 1999-2001 წლებში დაბადებული ჩვენი 16 მოცურავე (4 გოგონა, 12 ბიჭი) 17-19 მაისს ნახჭევანში აზერბაიჯანის ყოფილი პრეზიდენტის - ჰეიდარ ალიევის ხსოვნის ტურნირში იასპარეზებს.
ყოველდღიური სპორტული გაზეთი "ლელო"
