საქართველოს მშვილდოსანთა ნაკრების კორეელმა მწვრთნელმა ან იონ სეუნმა ოფიციალურად დაასახელა ქალთა გუნდის შემადგენლობა, რომელიც 3-10 ივლისს ტურინში მსოფლიოს ჩემპიონატზე იასპარეზებს: ხათუნა ნარიმანიძე, ქრისტინე ესებუა, ასმათ დიასამიძე. არსებითად, მან ეს სამეული ადრევე შეარჩია, მაგრამ ანთალიაში ჩატარებულ მსოფლიოს თასს მაინც დაელოდა. იმის მიუხედავად, რომ იქ ლანა ვერულიძემ ურიგოდ არ იასპარეზა - შესარჩევში მხოლოდ ნარიმანიძეს ჩამორჩა, პლეი ოფში კი ერთადერთი იყო ჩვენი გუნდიდან, ვინაც ორი რაუნდი გაიარა, მწვრთნელმა ადრინდელ განაცხადში ცვლილება მაინც არ შეიტანა.
კორეელის გადაწყვეტილებით, ტურინში მხოლოდ ქალთა ნაკრები გამოვა, რადგან ვაჟების
შეგახსენებთ, რომ გუნდურ პირველობაში პლეი ოფში 16 საუკეთესო გუნდი გადის. ჩვენებს ამ სიაში მოხვედრა არ უნდა გაუჭირდეთ, მაგრამ საჭიროა, რაც შეიძლება მაღალი ადგილით შევიდეთ, პლეი ოფში უფრო სუსტ მეტოქეს რომ შევხვდეთ. თუ იმ რვა მოწინავე გუნდს შორის ბრიტანეთიც მოხვდება, რომელსაც მასპინძლობის გამო საგზურები ავტომატურად ეკუთვნის, მაშინ IX-XVI ადგილებზე გასული გუნდები დამატებით ცალკე ტურნირს ჩაატარებენ, მისი გამარჯვებული ნაკრები კი ასევე მიიღებს ლიცენზიას. დაგვეთანხმებით, ახლებური წესით საგზურის მოპოვება ბევრად გართულებულია ადრინდელთან შედარებით, როცა ლიცენზიას ჯერ პირად პირველობაში 64, მერე კი 44 მონაწილე იღებდა. ახლებური წესის ერთადერთი უპირატესობა ისაა, რომ ახლა თუ ამ ბარიერს დაძლევ, ერთბაშად სამ საგზურს იღებ, მაშინ კი ყველას ცალ-ცალკე უნდა მოეპოვებინა. ოლიმპიადაზე სამი მონაწილე იმას ნიშნავს, რომ იქაც შეგეძლება გამოსვლა გუნდურ პირველობაში. აქვე შეგახსენებთ, რომ მშვილდოსან ქალთა ნაკრები დღემდე ერთადერთია, ოლიმპიადაზე გუნდურ პირველობაში რომ გამოსულა - სიდნეიში.
ჩვენები იტალიაში 22 ივნისს გაფრინდებიან და ჩემპიონატის დაწყებამდე ტურინში შეკრებას გაივლიან. ოფიციალური ვარჯიში 3 ივლისსა დანიშნული, შესარჩევი ეტაპის შეხვედრები კი 4-5 ივლისს გაიმართება. თუმცა მანამდე - 1-2 ივლისს ტურინში მშვილდოსნობის საერთაშორისო ფედერაციის კონგრესი გაიმართება, რომელსაც ჩვენი ფედერაციის გენერალური მდივანი არტემ სანიშვილი დაესწრება.
