ტურინში გუშინ დაწყებულ მშვილდოსანთა მსოფლიოს ჩემპიონატში, რომელშიც ლონდონის 2012 წლის ოლიმპიადის ლიცენზიებიც თამაშდება, ჩვენი ქალთა ნაკრები არცთუ წარმატებით ჩაება. პირადი პირველობის საკვალიფიკაციო ეტაპში ხათუნა ნარიმანიძის, ქრისტინე ესებუას და ასმათ დიასამიძის საერთო მონაგარი 3931 ქულაა, რაც 16 ნაკრებს შორის მე-14 შედეგი აღმოჩნდა. ამდენად, პლეი ოფში მათი მეტოქე მესამეზე გასული მასპინძელი იტალიაა, რომელსაც ხვალ შეხვდებიან. ვერაფერს იტყვი - მეტოქე ნამდვილად არაა ღვთის საჩუქარი, გუნდურში თუნდაც ერთი წრის გავლა კი იმიტომაა საშური, რომ საუკეთესო 8 გუნდი ლიცენზიას იღებს.
ტურნირში მხოლოდ ქალთა ოლიმპიურ დისციპლინაში
ესებუამ 70-იანზე შედარებით უკეთ კი გამოვიდა - 328 ქულა დააგროვა, რაც მე-15 შედეგი აღმოჩნდა, მაგრამ 60-იანზე საერთოდ გაუმრუდდა სამიზნე - მხოლოდ 321 ქულა და 76-ე ადგილი. 50-იანზეც ცუდად ისროლა - 42-ე იყო, ბოლოს კი გაისარჯა უკეთ - 350 ქულით მე-14 ადგილზე გავიდა, მაგრამ შუალედებში ჩავარდნების გამო მდგომარეობის გამოსწორება ვეღარ შეძლო.
სამწუხაროდ, დიასამიძე თავიდანვე აუტსაიდერთა შორის იყო - მისი საუკეთესო მაჩვენებელი ბოლო სერიაში მოპოვებული 54-ე ადგილია.
ჩვენებურებს გუნდურში თუნდაც ერთი ქულით მეტი რომ დაეგროვებინათ, შესაძლოა, ფრანგებისთვის გაესწროთ, რითაც იტალიელებთან შეხვედრას აიცილებდნენ და ხვალ მათ ნაცვლად ინდოელებს დაუპირისპირდებოდნენ. მართალია, დიდი გამართლება არც ეს იქნებოდა - ინდოელთა ლიდერი დეეპიკა კუმარი საკვალიფიკაციოში 1343 ქულით მე-9 ადგილზე გავიდა და ტურნირში ფავორიტადაც მიიჩნევა, მაგრამ მათი ნაკრები იტალიელებზე უფრო სუსტი გვგონია. აპენინელთა გუნდი იქნებ არაა ტიტულებით დახუნძლული, მაგრამ ანგარიშგასაწევი ძალა ნამდვილადაა. თან საკუთარ კედლებში იბრძვის.
მოლოდინისამებრ, გუნდური პირველობა კორეელებმა მოიგეს 4088 ქულით, მეორეზე ჩინელები გავიდნენ - 4027-ით, მესამეზე კი იტალიელები არიან 4012-ით. ხუთეულში ინდოეთი და აშშ-ც შევიდნენ.
ისე არ გაგვიგოთ, თითქოს ჩვენი ნაკრების წარმატება არ გვინდოდეს და წინასწარ ვითხრიდეთ საფლავს, მაგრამ ამ წყვილში უპირობო ფავორიტად იტალიელები მიგვაჩნია. მით უფრო, ჩვენებურთა ბოლოდროინდელი არასტაბილურობის ფონზე (თუმცა ეს ნარიმანიძეს არ ეხება). ამიტომ უპრიანია, ისიც განვიხილოთ, მათთან წაგების შემთხვევაში ლიცენზიის მოპოვების რა შანსი გვრჩება. როგორც გუშინდელ წერილში გაცნობეთ, საგზურს გუნდურ პირველობაში გასული 8 საუკეთესო გუნდის სამივე წევრი მიიღებს ანუ 24 მშვილდოსანი. ამათ გარდა, ლიცენზიას მიიღებს პირადი პირველობის შედეგებით 8 საუკეთესო მსროლელი იმ ნაკრებებიდან, რომლებიც ლიცენზირებულთა შორის ვერ მოხვდნენ. ამდენად, ჩვენებს კიდევ აქვთ საგზურის მოპოვების შანსი, თუმცა საამისოდ ინდივიდუალურის პლეი ოფშიც უნდა გაიარონ 1-2 წრე. სამწუხაროდ, ბოლო ხანებში ისინი ვერც ამ გამოთიშვით სისტემაში გვახარებდნენ, თუმცა ახლა ნარიმანიძეს პირველსავე ეტაპზე სუსტთან შეხვედრა გარანტირებული აქვს. შედეგად, ყველაზე მეტი შანსიც მას აქვს.
საკვალიფიკაციო ეტაპი კორეელმა ბო ბაე კიმ მოიგო მართლაც ფანტასტიური შედეგით - 1389 ქულით. მას საუკეთესო შედეგი ჰქონდა პირველ სამ დისტანციაზე, 30-იანზე კი მხოლოდ ამერიკელ ჯენიფერ ნიკლოშს ჩამორჩა. საერთო ჩათვლაში მეორეზეც კორეელი - დესომი იუნგი 1361-ით და მისი შედეგიდან გამომდინარე, თავად დაასკვნით, კი რამდენად კარგად გამოვიდა. მესამეზე ჩინელი იუტინგ ფანგია 1358-ით, ვალეევა მეექვსეა, ამერიკის სახელით მოასპარეზე ხათუნა ლორიგი (ქვრივიშვილი) მე-20, თურქეთის სახელით მოასპარეზე ნატო ნასარიძე - 49-ე. საკმაოდ სუსტად გამოვიდა ბრიტანელი მსოფლიოს ვერცხლისა და ოლიმპიადის ბრინჯაოს მედალოსანი ალისონ ვილიამსონი - 53-ე, თუმცა თავი დიდად არც უკრაინისა და რუსეთის გუნდების ლიდერებს გამოუჩენიათ. პირად პირველობაში პლეი ოფები 7 ივლისს გაიმართება და ვნახოთ, რა მოხდება.
ყოველდღიური სპორტული გაზეთი "ლელო"
