29-30 ივნისს "ლოკომოტივის" სტადიონის სათადარიგო მოედანზე გაიმართება თბილისის ჩემპიონატი მშვილდოსნობაში. ორგანიზატორებმა მასში მონაწილეობისთვის არათბილისელებიც მოიწვიეს, მაგრამ ჩამოსვლას ვერც ბათუმელები ახერხებენ და ვერც - ქუთაისელები. თან ბათუმელებს სულ მალე საკუთარი ტურნირი აქვთ და იმისთვის ემზადებიან.
შეჯიბრებაში არც უკრაინიდან გადმობირებული იულია ლობჟანიძე გამოვა, რომელიც სავარჯიშოდ თბილისიდან ბათუმში გადაბარგდა.
სამაგიეროდ, იასპარეზებენ მსოფლიოს ვიცე-ჩემპიონი ქრისტინე ესებუა და ვაჟთა ნაკრების ლიდერი ლაშა ფხაკაძე. ესებუასთვის ეს ოლიმპიადის შემდეგ ერთ-ერთი პირველი სტარტი იქნება და საინტერესოა, როგორ გამოვა.
ეს ტურნირი შესარჩევი და ძალზე მნიშვნელოვანი იქნება ნაკრების კანდიდატებისთვის. მისი
საამისოდ ქალებს ისევ მოუწევთ სავალდებულო კვოტის - 1320 ქულის, ვაჟებს კი 1270-ის შესრულება.
ამასობაში გაირკვა 15-20 ივლისს ბუქარესტში გასამართ ევროპის ასაკობრივ თასზე მოასპარეზე ახალგაზრდებისა და ჭაბუკების ნაკრებების შემადგენლობა.
ახალგაზრდა ბიჭებში იქ ფხაკაძე, ჯაბა მოსეშვილი და ლევან ჩიტაშვილი გამოვლენ, გოგონებში - თეონა კუტალაძე, თეონა არჯევანიძე და ანა დუმბაძე.
ჭაბუკთა ასაკში ბიჭებში არჩილ ფარსენაძე, აკაკი ლეკვეიშვილი და ზურაბ მესტვირიშვილი ისვრიან, გოგონებში - მედეა აბულაძე, ციალა ფუტკარაძე და ანა დუმბაძე. ეს მონაწილეები საკონტროლო შეჯიბრების შემდეგ შეარჩიეს და გოგონებში თუ ყველა ძველი ლიდერი მოხვდა, ბიჭებში მესტვირიშვილი და ჩიტაშვილი ახალი სახეები არიან.
ფედერაციას რუმინეთში ჭაბუკთა ასაკის ორი მონაწილის წაყვანაც სურს - ვლადიმერ დოლიძის და დიანა გორგოშაძის.
ისინი ჭაბუკთა უმცროს ასაკს მიეკუთვნებიან, რომლებსაც გაისად ჩინურ ნანჯინგში გასამართი ახალგაზრდული ოლიმპიური თამაშები უწევთ, იქ მოსახვედრი საგზურები კი წლეულსვე უნდა მოიპოვონ ჩინურ ვუქსში, მსოფლიოს ახალგაზრდულ ჩემპიონატში. ეს ბავშვები შედეგებით სარუმინეთო ნაკრებში ვერ ხვდებიან და სატურნირო პრაქტიკისთვის სურთ, სადმე გამოსცადონ ისინი.
ფედერაციამ მათი დაფინანსების თხოვნით საქართველოს ეროვნულ ოლიმპიურ კომიტეტს მიმართა და, იმედია, დააფინანსებენ კიდეც.
სიტყვა ფინანსებზე ჩამოვარდა და გეტყვით, რომ ახალგაზრდული ნაკრების ბულგარეთში დაგეგმილ შეკრებას საფრთხე შეექმნა. იქ წასვლა მათ რუმინულ ტურნირამდე სურდათ უკეთ მომზადების მიზნით, მაგრამ ახლა ყველაფერი სპორტისა და ახალგაზრდობის საქმეთა სამინისტროზეა დამოკიდებული - იმედია, ისინიც გამოძებნიან თანხებს ახალგაზრდების დასაფინანსებლად, რაც მათ აღზრდას წაადგება.
ყოველდღიური სპორტული გაზეთი "ლელო"
