საქართველოს მოკრივეთა ნაკრების წევრი, მსოფლიოს ბრინჯაოს პრიზიორი კობა ფხაკაძე, რომელმაც წლეულს 64 კგ.წონით კატეგორიაში იასპარეზა, მთავარ მიზნად ლონდონის ოლიმპიადის ლიცენზიის მოპოვებას ისახავს. მართალია, იგი ახლახან ბაქოში გამართულ მსოფლიო ჩემპიონატზე მეოთხედფინალსა და შესაბამისად ოლიმპიადის ლიცენზიას ვერ შესწვდა, მაგრამ იმედს მაინც არ კარგავს, რომ ამის შანსი მომდევნო ტურნირებში მიეცემა და ნიჭიერი მოკრივე მის გამოყენებას შეეცდება.
გთავაზობთ კობა ფხაკაძესთან ინტერვიუს.
- საქართველოს წინა ჩემპიონატში არ გიასპარეზია, რადგანაც გარკვეული ხანი აზერბაიჯანში იმყოფებოდი და იქ პროფესიულ რინგზე გამოდიოდი. ჩვენს მეზობელ ქვეყანაში კონკრეტულად რა ორთაბრძოლებში მონაწილეობდი?
- ოქტომბრის დასაწყისში ბაქოში მსოფლიოს ჩემპიონატზე იასპარეზე, სადაც მეორე ბრძოლაში აზერბაიჯანელ მოკრივესთან დამარცხდი. არადა, მეოთხედფინალში გასვლის შემთხვევაში ლონდონის ოლიმპიადის საგზურსაც გაინაღდებდი.
- მსოფლიო ჩემპიონატზე 64 კგ წონით კატეგორიაში გამოვედი. ყაზახეთში გავიარეთ ნაყოფიერი შეკრება და საკმაოდ კარგად ვიყავი მომზადებული. პირველი ბრძოლა განელ მაიკლ ბედიაკოს აშკარა უპირატესობით 29:5 მოვუგე. მომდევნო კი აზერბაიჯანელი გაიბატულა გაჯიალიევი იყო, რომლისთვისაც ადრე ორჯერ მქონდა მონაგები. თანაც, ბაქოს კლუბშიც ერთად ვიყავით, მე პირველ ნომრად, ის კი სათადაროგოდ. ერთი სიტყვით, მჯეროდა აზერბაიჯანელს ახლადაც დავამარცხებდი და მსაჯებს მასპინძელი მოკრივის მიმართ აშკარა სიმპატიები, რომ არ გამოეჩინათ მის დამარცხებას ახლაც შევძლებდი.
- მსაჯების რა გადაწყვეტილებამ იქონია შედეგზე გავლენა?
პირველი ორი რაუნდი თანაბარ ბრძოლაში მიმდინარეობდა. შემდეგ უპირატესობა მოვიპოვე და მასპინძელმა სხვა გზა რომ ვერ ნახა, თავი სახეში ჩამარტყა. ეს აშკარა დარღვევა იყო. იატაკზე აღმოვჩნდი. რეფერის 10 დათვლამდე რომ არ წამოვმდგარიყავი, აზერბაიჯანელს დისკვალიფიკაციას მისცემდნენ და მე-3-ე წრეში გავიდოდი. მაგრამ გადავწყვიტე, რომ ბოლომდე მებრძოლა. ყველა ნორმალური მოკრივე ასე მოიქცეოდა.
ბრძოლა ბოლომდე უნდა ჩაატარო და წარმატებას ამგვარად მიაღწიო. წესით აზერბაიჯანელისთვის გაფრთხილება უნდა მიეცათ, მაგრამ მსაჯებმა ეს არ გააკეთეს. კარგადაც შევუტიე და მეტოქეს სამი დარტყმა მივაყენე, მაგრამ, როცა გამარჯვებული გამოაცხადეს ყურებს არ დავუჯერე. მსაჯებმა გაჯიალიევის მოგება 18:15 დააფიქსირეს. არასწორი მსაჯობა როგორ არ მინახავს, მაგრამ ასეთი აშკარა მიკერძოება თუ შეიძლებოდა, ვერ წარმომედგინა. თავად აზერბაიჯანელები იყვნენ გაოცებული და ყველა აღნიშნავდა, რომ მოგება მე მეკუთვნოდა. ამ მარცხის გამო გულნატკენი ვარ, მაგრამ ყველაფერს ვიღონებ, რომ ოლიმპიადის ლიცენზია მომდევნო ტურირებზე მოვიპოვო.
- რამდენიმე დღეში საქრთველოს ჩემპიონატი დაიწყება, რას აპირებ?
- დიდი გულმოდგინებით ვემზადები ამ ტურნირისთვის. სწორედ ჩემპიონატის შედეგების მიხედვით უნდა ჩამოყალიბდეს საქართველოს ნაკრები, რომელიც შემდეგ შეუდგება სალიცენზიო ტურნირებისთვის მზადებას. ამდენად, პირველ რიგში საქართველოს ჩემპიონობა უნდა მოვიპოვო.
- შიდა პირველობაში ღირსეულ კონკურენციას თუ ელოდები?
- წელიწადია საქართველოში ოფიციალურ ტურნირებში არ გამოვსულვარ, თუმცა, ვიცი, რომ ძლიერი ახალგაზრდა მოკრივეები წამოვიდნენ, რომლებმაც ევროპის ჩემპიონატზე კარგი შთაბეჭდილება დატოვეს. ისინი ახლა დიდებში გადმოდიან და, იმედია, ჩვენი კონკურენტები და ღირსეული მოწინააღმდეგეები იქნებიან.
- ამბობ, რომ შენი მთავარი მიზანი ოლიმპიადის ლიცენზიის მოპოვებაა, თუმცა კრივში ამის მიღწევა ძალზედ რთულია.
- ოლიმპიადაზე მოხვედრა ჩემი ოცნებაა და ცდას არ დავაკლებ, რომ საწადელს მივაღწიო. მთავარია იღბალიც ჩემს მხარეს იყოს.
- ადრე 60 კგ-ში გამოდიოდი და ამ წონაში ორი წლის წინ მსოფლიოს ჩემპიონატზე ბრინჯაოს მედალიც მოიპოვე, ახლა კი 64-ში ასპარეზობ, საოლიმპიადოდ რომელ წონაში აპირებ ბრძოლას?
- ჯერ არ გადამიწყვეტია რომელ წონაში დავრჩები. ეს კრივის მსოფლიო ფედერაციაზეა დამოკიდებული, რომელმაც უნდა დაალაგოს რომელ წონაში რამდენი ლიცენზია გათამაშდება. სადაც მეტი შანსი იქნება, წონასაც ამის მიხედვით ავირჩევ.
ყოველდღიური სპორტული გაზეთი "ლელო"
