საუდის არაბეთი უარს ამბობს ლონდონის ოლიმპიადაზე ქალი სპორტსმენების გაგზავნაზე. ქვეყნის ეროვნული ოლიმპიური კომიტეტის პრეზიდენტის, პრინც ნავაფ იბნ ფეისალის მკაცრი პოზიციის გამო, საუდის არაბეთი, შესაძლოა, საერთოდ არ დაუშვან 2012 წლის ოლიმპიადაზე.
პრინცმა გამორიცხა ზაფხულის თამაშებზე სამეფოს ქალთა გუნდის გამოსვლა. მან ხაზი გაუსვა იმას, რომ ბრიტანეთის დედაქალაქში მხოლოდ მამაკაცი სპორტსმენები გაემგზავრებიან.
"ჩვენ არ მივესალმებით ქალების მონაწილეობას ოლიმპიადებსა და მსოფლიოს ჩემპიონატებში, - ამბობს ნავაფ იბნ ფეისალი. - არსებობენ
ათასობით არაბი ქალები, რომლებიც სპორტს მისდევენ, მაგრამ ამას კერძო ხასიათი აქვს".
რამდენიმე წლის წინ, ქვეყნის
მთავრობის აზრით, თუ ქვეყანაში ქალები სპორტით აქტიურად დაკავდებიან, ისინი "უხამსი ტანსაცმლის" ტარებას მიეჩვევიან და ბევრ დროს გაატარებენ სახლის მიღმა. გარდა ამისა, მათ უცხო მამაკაცებთან ურთიერთობის საშუალება ექნებათ, რაც შარიათის მიხედვით, აბსოლუტურად დაუშვებელია.
მარტში საუდის არაბეთში გამოქვეყნდა ლონდონის ოლიმპიადაზე წამსვლელთა პოტენციური სია, რომელშიც რამდენიმე ქალის გვარიც ეწერა. მაშინ საერთაშორისო ოლიმპიურმა კომიტეტმა იმედი გამოთქვა, რომ საუდის არაბეთი მზად არის პირველად გაუშვას ქალი სპორტსმენები უმაღლეს სპორტულ ფორუმზე. მაგრამ ეროვნული ოლიმპიური კომიტეტის პოზიცია უცვლელი დარჩა, რამაც სპორტული საზოგადოების კრიტიკა გააძლიერა.
ასე მაგალითად, ქალთა სპორტისა და ფიტნესის ფონდის აღმასრულებელმა დირექტორმა სიუ ტიბალსმა საუდის არაბეთის ოლიმპიადიდან მოკვეთა მოითხოვა.
"იმედი გვაქვს, რომ საერთაშორისო ოლიმპიური კომიტეტი თავისი რიგებიდან გარიცხავს საუდის არაბეთს, - განაცხადა მან. - ქალის სპორტსმენებისთვის დაწესებული აკრძალვები ეწინააღმდეგება სოკ-ის ფუნდამენტალურ პრინციპებს. ოლიმპიური ქარტია გვეუბნება, რომ ქვეყნის ან ადამიანის მიმართ ნებისმიერი დისკრიმინაცია შეუთავსებელია ოლიმპიურ მოძრაობასთან".
"მოლაპარაკებები გრძელდება და ჩვენ ჯერ კიდევ ვმუშაობთ იმაზე, რომ იქაურ ქალებს ლონდონის ოლიმპიადაზე გამოსვლის უფლება მისცენ", - თავის მხრივ, წერია სოკ-ის განცხადებაში.
2012 წლამდე სამი ქვეყნის ქალები არ იყვნენ წარმოდგენილი ოლიმპიადაზე - საუდის არაბეთი, ბრუნეი და კატარი. ამ უკანასკნელის ეროვნული ოლიმპიური კომიტეტი ორ სპორტსმენს გაგზავნის ლონდონში - მოცურავე ნადა არკაჯისა და ნურ აო-მაქლის, რომელიც მოკლე მანძილებზე სირბილში ცდის ბედს.
ყოველდღიური სპორტული გაზეთი "ლელო"
