უახლოეს უქმეებზე თბილისში გასამართ ვაჟ ძიუდოისტთა მსოფლიოს თასთან დაკავშირებით გუშინ საქართველოს ძიუდოს ფედერაციაში პრესკონფერენცია გაიმართა, რომელსაც ფედერაციის პრეზიდენტი გიორგი ალექსიძე და ნაკრების მთავარი მწვრთნელი პეტერ ზაიზენბახერი უძღვებოდნენ. თავად ტურნირთან დაკავშირებით იმას ვიტყვით, რომ ბოლო დღეს, როცა განაცხადების მიღების ვადა იწურებოდა, კიდევ უფრო გაიზარდა მონაწილეთა რიცხვი - როგორც პრესკონფერეციაზე გვითხრეს, მსაჯთა დონეზე წარმოდგენილთა ჩათვლით, 50 ქვეყანა გვეწვევა.
თუმცა ჩვენთვის ამ რეკორდულ ციფრებზე უფრო საინტერესო ოლიმპიურ ჩემპიონ ზურაბ ზვიადაურის დაბრუნება აღმოჩნდა და პრესკონფერენციის ძირითადი ნაწილიც ამას დაეთმო.
ზაიზენბახერმა გაიხსენა საქართველოში ჩამოსვლის პირველი
"მასში ჯერ ისევ არის დიდი სპორტსმენი, ოღონდ მთავარია, მან საჭირო დროს გაიღვიძოს" - აღნიშნა მწვრთნელმა. ზაიზენბახერის თქმით, ზვიადაურის მდგომარეობას ის ართულებს, რომ ამჯერად გართულებულია ლიცენზიების მოპოვების სისტემა და ახლა სპორტსმენი იძულებულია, მთელი სეზონი პიკში იყოს.
ზვიადაური ამ მარათონში ნული ქულით ერთვება ანუ ბევრად ცუდ სასტარტო მდგომარეობაშია - მან ზედიზედ უნდა იჭიდაოს ხუთი ტურნირი, ლამის შესვენებების გარეშე.
"ზვიადაურმა რომც ვერ შეძლოს ლიცენზიის მოპოვება, დაბრუნების გადაწყვეტილება მაინც გმირობაა და ეს უნდა დავაფასოთ. ლიცენზიის მოპოვება ძნელი იქნება, მაგრამ მას შეუძლია სასწაულის მოხდენა", - თქვა ავსტრიელმა.
ოლიმპიური ჩემპიონის ახლანდელ მზადყოფნასთან დაკავშირებით ზაიზენბახერმა დასძინა, რომ ის თანდათან უმატებს და ოლიმპიადისთვის ფორმის პიკში შესვლა არ იქნება პრობლემა. პრესკონფერენციაზე ასევე დიდი ადგილი დაეთმო ვალერი ლიპარტელიანის თემასაც. ზაიზენბახერმა თქვა, რომ ზვიადაურის დაბრუნებას ლიპარტელიანთან არანაირი კავშირი არ აქვს, თვით ლიპარტელიანის წარუმატებლობის მიზეზად კი ახალ სტილთან შეუთავსებლობა და ფსიქოლოგიური მოუმზადებლობა დაასახელა.
ცხადია, დავინტერესდით ნაკრების კიდევ ორი ტრავმირებული ლიდერის - ამირან პაპინაშვილისა (60) და ირაკლი ცირეკიძის (100) ჯანმრთელობის მდგომარეობით, როდის შეძლებენ ისინი ტურნირებში გამოსვლას. პაპინაშვილზე გვითხრეს, რომ მან არსებითად, უკვე მოირჩინა ტრავმა და პარიზის "დიდ მუზარადზე" იასპარეზებს, ცირეკიძეს კი ჯერ ისევ აწუხებს ნატკენი ნეკნი და მისი დაბრუნების შესახებ ამ ეტაპზე ვერაფერს ამბობენ. პაპინაშვილს თურმე თბილისშიც უნდოდა გამოსვლა, მაგრამ ბოლოს მწვრთნელებმა მაინც დასვენება ურჩიეს.
ზაიზენბახერმა საინტერესო ამბავი გვამცნო იმ შემთხვევისთვის, თუ ერთ წონაში ორ ან მეტ საგზურს მოვიპოვებთ. თურმე ამ დროს დაგროვილი ქულები გადამწყვეტი სულაც არ იქნება - ორივე კანდიდატის ძლიერ და სუსტ მხარეებს აწონ-დაწონიან და ვინაიდან უკვე ცნობილი იქნება სხვა ქვეყნების ოლიმპიელთა ვინაობა, იმასაც დაითვლიან, ჩვენებურებს მათგან ვისთან აქვთ დადებითი ბალანსი და ვისთან - უარყოფითი, ვინ ვისთვისაა უხერხული მეტოქე, ვინ როგორ სტილში ჭიდაობს, ვის ვისთან ექნება მეტი შანსი და გადაწყვეტილებასაც ასე მიიღებენ.
პრესკონფერენციის დასასრულს ეროვნული ნაკრების ვარჯიშიც დაიწყო. სხვებთან ერთად დარბაზში ზურაბ ზვიადაურიც გამოჩნდა, რომელიც ჟურნალისტებთან ურთიერთობას აქამდე ერიდებოდა, თუმცა ამჯერად უარი არ გვითხრა და მცირე ინტერვიუზე დაგვთანხმდა.
წინასწარ გეტყვით, რომ ავსტრიულ მიტერსილში, საწვრთნელ კემპზე ყოფნისას მისი დაბრუნების ცნობამ თურმე დიდი გაკვირვება გამოიწვია. ბუნებრივია, ზვიადაური გადაჭრით ვერ ამბობს, როგორ დამთავრდება ლიცენზიისთვის ბრძოლა, თუმცა ამბობს, რომ ნებისმიერ ვარიანტში სპორტში დარჩება და მომავალშიც გააგრძელებს კარიერას.
საინტერესოა, რომ სპორტში დასაბრუნებლად მას მთელი 20 კილოგრამი დაუკლია.
- როგორი განწყობით ხვდებით თბილისის ტურნირს, ხართ ფორმაში?
- დავბრუნდი, გავიარე რამდენიმე ეტაპი, თუმცა ჯერ არ ვარ სასურველ ფორმაში. თუმცა ჩავერთვები შეჯიბრებებში და ვნახოთ, როგორ წარიმართება მოვლენები.
მთელი 20 კილოგრამი დავიკელი და ამ ეტაპისთვის რაც მომეთხოვება, იმ კონდიციებს ვაკმაყოფილებ, თავსაც ნორმალურად ვგრძნობ, მაგრამ ფორმაზე ჯერ ადრეა ლაპარაკი.
- ამ ტურნირზე რა შედეგს უნდა ელოდოს თქვენგან ქომაგი?
- შედეგზე წინასწარ არასოდეს არ ვლაპარაკობ. შეჯიბრება გვაჩვენებს ყველაფერს.
- ოლიმპიადისთვის შესარჩევი მთავარი ეტაპი იწყება. ძალიან ძნელი ბრძოლა გელოდებათ.
- არა მარტო ოლიმპიადისთვის, რადგან მე არ ვაპირებ ამაზე გაჩერებას - ოლიმპიადაზე მოვხვდები თუ არა, ამას არსებითი მნიშვნელობა არ აქვს, მაინც დავრჩები და გავაგრძელებ სპორტში ვარჯიშს სანამ შევძლებ.
- მეტოქეები როგორ შეხვდნენ ცნობას თქვენი დაბრუნების შესახებ?
- ყველას გაუკვირდა - ჯერ მწვრთნელის რანგში მხედავდნენ, ახლა კი ისევ სპორტსმენად დავბრუნდი. თუმცა ეს გასაკვირი არა მარტო მათთვის, ჩემთვისაც იყო.
მართალია, საკმაოდ რთული იყო დაბრუნების გადაწყვეტილების მიღება, მაგრამ მაინც ასე გადავწყვიტე და დავბრუნდი. მიხარია, რომ ასეთ დასკვნამდე მივედი.
- ეტყობა, ეს ერთი წელიწადი ძალიან გაგიჭირდათ ჭიდაობის გარეშე იმის მიუხედავად, რომ მაინც აქ იყავით.
- ძალიან გამიჭირდა. შარშან, როცა მივდიოდი, არც მინდოდა წასვლა და მერეც არ მეგონა, წასული თუ ვიყავი. მართალია, მწვრთნელად ვმუშაობდი, მაგრამ მაინც ტატამზე მინდოდა ყოფნა და ჭიდაობა, სულიერად არ ვიყავი წასული.
- თუმცა ამ პირობებში დაბრუნება ძნელია - ახლა განსაკუთრებული ყურადღების ქვეშ იქნებით.
- რა თქმა უნდა, ძნელია, რადგან ხალხის ინტერესი გაიზარდა. იქნება გაორებული დამოკიდებულებაც, თუმცა ვიმეორებ - მე დაბრუნების გადაწყვეტილება მივიღე და ამას ჩემთვის არსებითი მნიშვნელობა არ აქვს. შანსები 50:50-ზეა და ოლიმპიადის მერეც გავაგრძელებ ვარჯიშს, თუ ტრავმები არ შემაფერხებს.
ყოველდღიური სპორტული გაზეთი "ლელო"
