რიო დე ჟანეიროს "დიდი მუზარადის" მეორე დღეს ფინალში გასული სამივე ქართველი ჩემპიონი გახდა. გამარჯვებულის სარგო 5 000 დოლარი და ოქროს მედალი ვალერი ლიპარტელიანმა (90), ირაკლი ცირეკიძემ (100) და ადამ ოქრუაშვილმა (+100) მოიპოვეს.
ამავე დღეს მოასპარეზე კიდევ ორი ჩვენებური - ავთანდილ ჭრიკიშვილი (81) და ლომერ ჟორჟოლიანი (100) კი მეხუთეზე გავიდნენ. ამდენად, ბრაზილიური ტურნირი საქართველოს ნაკრებმა ოქროს 4 და ბრინჯაოს 2 მედლით დაასრულა.
შეგახსენებთ, რომ პირველ დღეს ჩემპიონი ბეთქილ შუკვანი (60) გახდა, ამირან პაპინაშვილი (60) და ლაშა შავდათუაშვილი (66) კი მესამეზე გავიდნენ.
ვაჟთა შორის გუნდური პირველობაც ქართველებს ერგოთ, ხოლო საერთო გუნდურ ჩათვლაში, სადაც ქალთა მონაცემებიც შედის, ჩვენები მხოლოდ ბრაზილიელებს ჩამორჩნენ, რომლებმაც სწორედ ქალთა შედეგებით გვაჯობეს.
როგორც გუშინ ვწერდით, ეს ტურნირი და მომავალ უქმეებზე ბუენოს აირესში გასამართი მსოფლიოს თასი საოლიმპიადოდ მთავარი შესარჩევი შეჯიბრებებია და მათი შედეგები გადამწყვეტი აღმოჩნდება.
ბრაზილიაში გაორებული წონებიდან მხოლოდ ორნი ჭიდაობდნენ და შეჯიბრების მეორე დღეს 100 კილოგრამშიც ზუსტად ის ვითარება შეგვექმნა, რაც თავდაპირველად 60-ში მივიღეთ - სალიცენზიო რეიტინგში დაწინაურებულ ჟორჟოლიანს ცირეკიძემ აჯობა.
60-ისა არ იყოს, ახლაც ნაკრების მთავარი მწვრთნელის, პეტერ ზაიზენბახერის გადასაწყვეტია, ვის წაიყვანს ლონდონის ოლიმპიადაზე.
აი, ლიპარტელიანისა და, ალბათ, ოქრუაშვილის საკითხი კი გარკვეულია, როგორც შავდათუაშვილის, ტატალაშვილისა და ჭრიკიშვილისა. ლიპარტელიანი ამ წონაში ჩვენი ერთადერთი ოლიმპიელია და ძალიანაც რომ მოვინდომოთ, მას ვერავინ შეცვლის.
ღმერთმა დაიფაროს და ტრავმაც რომ მიიღოს, მაშინაც კი! იგივე ითქმის შავდათუაშვილზე, ტატალაშვილსა და ჭრიკიშვილზეც, რადგან ამ წონებში 22-ში მხოლოდ ისინი შევიდნენ.
ოქრუაშვილს წონაში ლიცენზიის მოცილე კი ჰყავს - ზვიად ხანჯალიაშვილი, რომელიც ასევე მოხვდა რეიტინგის 22 საუკეთესოში, მაგრამ მხრის ტრავმის გამო მას არც იაპონია-კორეაში გამართული შეკრება გაუვლია და სამხრეთამერიკულ ტურნირებსაც გამოაკლდა. თან ოქრუაშვილი რეიტინგშიც გვარიანად უსწრებს.
ლიპარტელიანის პროგრესი თვალშისაცემია და, საბედნიეროდ, რიოში დაამტკიცა, რომ ჩელიაბინსკში ევროპის ჩემპიონატზე მისი აღმავლობა შემთხვევითი არ ყოფილა - ფინალში არგენტინელი ჰექტორ კამპოსი 36 წამში ზუსტად იმავე ფანდით დააიპონა, როგორითაც ევროპის პირველობის გადამწყვეტ შეხვედრაში რუს გრიგორი სულემინს სძლია - ვარდნაში შესრულებული გდებით ბეჭებზე დასცა. მანამდე ჩვენებურმა ბრაზილიელი ენრიკე სილვა და ჩილელი ტომას ბრიკენო დააიპონა.
ეს ტურნირი რომ სუსტი გამოდგა, გუშინაც ვწერდით და იქნებ ფალავანთა შესაფასებლად არც ისე კარგი საშუალებაა, მაგრამ ცირეკიძემაც სამი წმინდა მოგება მიითვალა, რაც ასევე საყურადღებოა.
ბრაზილიელმა ბრუნო ალტოემ 2 წუთზე მეტი თუ გაუძლო, ნახევარფინალში არგენტინელი კრისტიან შმიდტი გადავლებაზე ჩახვეული გარესარმით 18 წამში დააიპონა, ფინალში კი ერთი წუთი მოანდომა ბრაზილიელ ჰუგო პესანასთან წმინდა მოგებას.
ჟორჟოლიანი პირველივე წრეში დამარცხდა სწორედ პესანასთან, რომელიც 90-ის ფალავანია, თუმცა ამჯერად წონა არ დაიკლო და 100-ში იასპარეზა. ცირეკიძემ ჟორჟოლიანთან დაუსწრებელ პაექრობაში შედეგის გარდა ის უპირატესობაც მოიპოვა, რომ ულაპარაკოდ აჯობა მის მომგებ პესანას.
ბრაზილიაში უწყვეტი პროგრესი დაამტკიცა ოქრუაშვილმაც, რომელმაც ტურნირზე სამივე შეხვედრა მასპინძლებთან ჩაატარა და ყველა იპონით მოიგო - გაბრიელ სანტოსთან, დავიდ მოურასა და ვალტერ სანტოსთან.
მართალია, არცერთი მიეკუთვნება ბრაზილიის ნაკრების ლიდერებს (თუმცა ვალტერ სანტოსმა ნახევარფინალში იქაურთა მეორე ნომერი, ლიცენზირებული დანიელ ჰერნანდესი დაამარცხა), მაგრამ ჩვენებურმა სამივე მაინც გასაოცრად ლაღად და თავისუფლად დაჯაბნა.
თითქოს ბავშვებს ავარჯიშებდა, ისე ჭიდაობდა მათთან. ფინალში ის ჰერნანდესის მომგები სანტოსი პირწმინდად დაჩაგრა - ჯერ იუკო აართვა, მერე - ვაზარი, ბოლოს კი შებოჭა.
ჩვენი ნაკრები რიო დე ჟანეიროში დარჩება და რამდენიმე დღით ერთობლივ წვრთნებში ჩაერთვება, კვირის ბოლოს კი არგენტინაში გადაინაცვლებს და, როგორც გითხარით, მომავალ უქმეებზე ბუენოს აირესში მსოფლიოს თასზე იჭიდავებს.
ოღონდ იქ რიოში მოასპარეზე შემადგენლობიდან პაპინაშვილი, ტატალაშვილი და ლიპარტელიანი არ გამოვლენ. პირველი ორი ამ შეჯიბრებას ტრავმის გამო გამოტოვებს, ლიპარტელიანს კი მეტი ტურნირი აღარ სჭირდება.
ის ერთობლივ შეკრებას გაივლის და პარასკევს, როცა შუკვანი, შავდათუაშვილი, ჭრიკიშვილი, ცირეკიძე, ჟორჟოლიანი და ოქრუაშვილი არგენტინაში გაემგზავრებიან, ის თბილისისკენ გამოემართება, ხოლო პაპინაშვილი და ტატალაშვილი დღესვე წამოვლენ ბრაზილიიდან. პაპინაშვილი იქ ჩასვლამდეც ავად გახდა და მისი წაგებაც დიდწილად ამან განაპირობა, ტატალაშვილმა კი პირველივე შეხვედრაში ნეკნი იტკინა.
ბრაზილიური ოქროს ტრიო (იბეჭდება მცირე ცვლილებით)
ყოველდღიური სპორტული გაზეთი "ლელო"
ასევე იხილეთ:
ქართველი ძიუდოისტების 3 მედალი და 3 ფინალი რიოს მუზარადზე
