მთავარი მწვრთნელის დამტკიცების გარდა, გუშინდელი აღმასკომის ერთ-ერთი ძირითადი თემა ვადამდელი საპრეზიდენტო არჩევნები იყო. აწ უკვე ყოფილმა პრეზიდენტმა დილარ ხაბულიანმა აღმასკომს გადადგომის შესახებ წერილობითი განცხადება წარუდგინა, რაც დააკმაყოფილეს. აღმსკომმა მიიღო გადაწყვეტილება, რომ წლის ბოლომდე გაიმართოს ვადამდელი საარჩევნო ყრილობა, თუმცა კონკრეტული თარიღი ჯერ უცნობია.
აღმასკომიდან გამოსული სხდომის მონაწილეები ერთხმად აღნიშნავდნენ, რომ მომხდარი საკადრო ცვლილებები ერთხელ და სამუდამოდ აღმოფხვრის დაპირისპირებას ქართულ ძიუდოში და მას ძველ წარმატებებს დაუბრუნებს. თავად ლიპარტელიანმა სხდომის შემდეგ ასეთი კომენტარი გააკეთა: "აქცენტს ძირითადად ახალგაზრდებზე გავაკეთებ. ყველამ უნდა დავივიწყოთ წყენა - ფედერაციის ხელმძღვანელებმაც და მწვრთნელებმაც, თუ გვინდა, რომ ოლიმპიადაზე შედეგი გვქონდეს. თამაშებამდე არც ისე დიდი დროა. თან თაობათა ცვლის პერიოდია, ახალგაზრდებმა უნდა შეავსონ ეროვნული გუნდი, მაგრამ ყველაფერს გავაკეთებთ ოლიმპიადაზე წარმატებით გამოსასვლელად".
