25 ივნისს, დილით, საქართველოს ვაჟ ძიუდოისტთა ნაკრები ჩეხეთში გაფრინდა, სადაც ოლიმპიადისთვის მზადების პროგრამით 25-28 ივნისს, ქალაქ ნიმბურკში, ევროპის ძიუდოს ფედერაციის მიერ ორგანიზებულ საწვრთნელ კემპში მიიღებს მონაწილეობას. ჩვენებურთა ავსტრიელმა მთავარმა მწვრთნელმა პეტერ ზაიზენბახერმა ჩეხეთში 8 ლიცენზირებული ძიუდოისტი იახლა: ბეთქილ შუკვანი, ამირან პაპინაშვილი (ორივე - 60), ლაშა შავდათუაშვილი (66), ნუგზარ ტატალაშვილი (73), ავთანდილ ჭრიკიშვილი (81), ლომერ ჟორჟოლიანი, ირაკლი ცირეკიძე (ორივე - 100), ადამ ოქრუაშვილი (+100).
ამათ ჭაბუკებში ევროპისა და მსოფლიოს შარშანდელი ვიცე-ჩემპიონი შალვა ჩოჩელიც (90) დაემატა.
როგორც ვხედავთ, ევროპაში არ წასულა კიდევ
ნაკრები ნიმბურკში 28 ივნისის ჩათვლით დარჩება, მერე კი ესპანეთში გადაინაცვლებს და 29 ივნისიდან 6 ივლისამდე კასტელდეფელსში ანალოგიურ კემპში მიიღებს მონაწილეობას.
გუნდი საქართველოში 6-ში, გვიან ღამით ჩამოფრინდება, მეორე დღეს კი ზაიზენბახერი გაორებულ წონებში ოლიმპიური გუნდის მონაწილეებს დაასახელებს - 7-ში საერთაშორისო ოლიმპიურ კომიტეტში განაცხადების წარდგენის ვადა იწურება და საკითხს მეტად ვეღარ დააყოვნებს.
შეგახსენებთ, რომ გაორებული მდგომარეობა, ანუ წონაში ერთზე მეტი მონაწილე სამ კატეგორიაში გვყავს - 60, 100 და +100-ში, დანარჩენებში კი ოლიმპიადას უცილობლად ისინი იჭიდავებენ, ლიცენზიები ვინც მოიპოვეს - შავდათუაშვილი, ტატალაშვილი, ჭრიკიშვილი და ლიპარტელიანი. ძალიანაც რომ გვინდოდეს, მათ ვეღარ შევცვლით.
ევროპიდან დაბრუნებული ნაკრები საოლიმპიადო მზადების ბოლო, დასკვნით შეკრებას საქართველოში გამართავს, ოღონდ არა დუშეთში, როგორც თავდაპირველად იყო დაგეგმილი, არამედ - ბორჯომში.
ძიუდოისტები ერთ-ერთი პირველები ჩაებმებიან ოლიმპიადაში - თამაშები 27 ივლისს იხსნება, ესენი კი მეორე დღესვე, 28-ში იწყებენ ტურნირს.
განრიგი ამჯერადაც ოლიმპიადისთვის ტრადიციულია - იწყებენ ყველაზე მჩატე წონიდან, ანუ 60 კილოგრამიდან და მიჰყვებიან ზევით, დღეში კვლავაც მხოლოდ თითო წონა.
